کیم دئییر اؤلکه‌ده خان خانلیقدی،
یئل اسیر، شاختادی، طوفانلیقدی؟
باهالیق اولسادا یاد اؤلکه‌ده‌دی
شوکر اولا بیزلره ارزانلیقدی
هر نه ایستر اوره‌یین واردی داداش
بورا ایراندی، فراوانلیقدی
بیر نفر اوغرو تاپیلماز بوردا
امن امانلیقدی، مسلمانلیقدی
بو قدَر قاپ قاچا گیر وئرمه گولوم
بو اوغرولوق دگی، احسانلیقدی
ارلی آروادلار اؤزون هاردا ساتیر‌؟
بئله سؤزلر دئمه‌، بهتانلیقدی
بونلارین هاممیسی دوشمن سؤزودی
دوشمنین سؤزلری شیطانلیقدی
بوردا هر بیر شئیه قانون یازیلیب
بئله فیکر ائتمه بیابانلیقدی
فرقی یوخدور کاسیبین اربابیلان
هاممی بیردیر، بورا میزانلیقدی
بوردا حاکیمده اگر جرم ائله‌سه
یئری زیندان، ایشی دیوانلیقدی
عیبی یوخ کندلر اگر ویران اولوب
عمرانین اوّلی ویرانلیقدی
ییغیلیب کندلری آباد ائده‌ریک
هله مقصد بیزه سلطانلیقدی
بیز گرک دونیادا بیر قدرت اولاق
عیبی یوخ اؤلکه‌ده ویرانلیقدی
بو اوشاقلار کی گزیر تنگه‌ده آج
بولارین هاممیسی قوربانلیقدی
من دئیردیم بیزی آمریکا چاپیر
یالانین ریشه‌سی بئیمانلیقدی
اوغرو باشچیللاری مسئوللاریمیش
اولارین قصدی سلیمانلیقدی
بیری یوخدور بولارا بسدی دییه
ائله بیل اؤلکه‌میز اورمانلیقدی
تولکولر اورتادا جولان ائله‌ییر
آسلانین مسکنی دووشانلیقدی
یئرده دیندن بیزه بیر آددی قالان
دین اؤلوب باش داشی سیمانلیقدی
دینده والله بونو تعلیم ائله‌ییر
هر نه‌یین قلّه‌سی انسانلیقدی
گؤز دَییب بیزده کی انسانیته
فیکریمیز خسته‌دی، درمانلیقدی
دردیمیز ساده دَییل درمان اولا
بیر مریض‌لیکدی کی لقمانلیقدی
درد الیندن جانا گلدیم والله
قلبیم ایللردی کی شان شانلیقدی
سیز «نیراوغلوندان» اوزاق گزمه‌لیسوز
بئینی چون نئهره‌دی ، آیرانلیقدی