آغلاما آنا، آغلاما!
هاشم ترلان
دؤزومون اولسون آنا
گؤزونده‌كى سونسوز كدر،
اؤزومون اولسون آنا.
باخيب طبيعتين بويونا
نه دئييم اونا؟
دئسم نـورسوز بير عالمسن
گۆنشين آجيغى توتار،
دئسم تورپاق نه ظالیمسن
يئرين بركتى قاچار
نه دئييم آنا.
بابكين فاجعهسينه دؤزدون،
چالدیران واقعهسينه دؤزدون،
خاقانلارين قلينجينا دؤزدون
يئنه دؤزومون اولسون آنا.
سئوينجيم سنين
كدرين اؤزومون اولسون آنا.
دؤزومه عزمين اولسا،
يارالارين يوز مين اولسا
“كۆرهيينده كل گيزلنن “
“اۆرهيينده ول گيزلنن “
ايگيد ائولادينين
مرحم ايله ساغالار آنا.
اولو قارداشين تبريز،
بالا قارداشين زنجان،
آناميز آذربايجان،
قوللارينى آچا-آچا
اورهكلرى پارچا- پارچا،
ديزينه باش قويوبلار آنا.
آمما!
ساغالمايان مين ياران وار،
بو نه يوروش، نه هــوجومدو؟
اللى بئش مين قيزيل باشلار
اوردوسوندان گؤزون یـومدو.
آغلاما قاراداغ، آغلاما،
دؤزومون اولسون آنا.
سئوينجيم سنين،
كدرين اؤزومون اولسون آنا.