کرمی!
ح. هریزلی
یورقون خیالیمی یئنه بیر کره-
نغمه قانادینا میندیر کرمی!
دولاندیر داغ به داغ، دره به دره
اصلی‌م دیاریندا اندیر کرمی!
آرزیم دوستاق اولوب بدن ایچینده
قورخورام چورویه کفن ایچینده
سرحد اسیری‌یم وطن ایچینده
شیغا سرحدلری سیندیر کرمی!
هارای-هارای چکدیم هایا گلن یوخ
آغلادیم گؤزومون یاشین سیلن یوخ
سئودالی کؤنلومون دیلین بیلن یوخ
دیندیر اوره‌گیمی دیندیر کرمی!
چکمیشم چکه‌رم وطن غیرتى
بو یولدا خوشلارام هر مصیبتی
آجینى، آغرینى، دردى، حسرتى
سیزلا جانیمیزا سیندیر کرمی!
عشقین آتشینه من وورولموشام
یانارام اودونا هر سحر آخشام
سنین اوجاغیندا یانماغا خوشام
یاندیر «هریزلی»نی، یاندیر کرمی!
