گئجه‌نین بئشینده
رقیه کبیری
یوخو، قاپ قارا بیر کپنک‌دیر
گئجه‌نین بئشینده باشیمدان گئری اوچور
بهمن‌ین شاختا- سازاغی
قیشین توفه- توفوو
تبریزین توت‌سوز، یارپاقسیز فصیلی
کؤرپولرین آلتیندا یاتانلاری
گُور ایچینده ائو قورانلاری دئمیرم
ایپک قوردو بئله، قابیغینا دؤنمه‌یی گلیر…
ایچیمده بیر خیال‌باز قادین
بو قیروولانمیش قارانلیقدا
آری‌لارین بال دامیزدیران دؤشلرینی
قاریشقالارین دؤشلرینده تاخیل آنبارلارینی
و میغ‌میغالارین قانا دولموش دؤشلرینی دوشونور.
قورخمایین!
یوخو باشیمدان اوچسا دا، عاغلیم اوچماییب
ساده‌جه اینسان ایله حشره‌نی توتوشدورورام
بال کیمی سؤزلر
تاخیل آنبارلار
قانلی أللر
آه…بو قانلی أللر… بو قانلی أللر… بو قانلی أللر
بو آغ- آپباغ، پامبیق کیمی یومشاق قانلی أللر…
بو قارا نفته یئیریکله‌ین عاغیل‌لار
آفریقادان توتدو تا اورتا دوغویا جان
تورپاقلاری چیرکابا بولاشدیردیلار
قانا بله‌شدیردیلر
قارا بایراقلاری ایله
بیلک‌لرینه باغلانمیش سوییس مارکلی ساعاتلاری ایله
زامانا ترسه نال چالدیلار
مدرن تویوتالاری ایله
مدرن سیلاحلاری ایله
بو شرقی مفعول‌لاری
بئش اون شاهی‌یا، جینسل کؤله‌لییه ساتدیلار
قارا بایراقلارینین اوزه‌رینده یازیلمیش مقدس آددان قورخمادیلار
قیزجیغازلارین بکارتینی بئله بمباردمانلادیلار
و قولچاقلارین گولوشلری
قورخودان دوداقلاریندا سیندی!
بیزیمکی‌لر چیراغ ایدی، آیاق آلتینی گؤرمه‌دیلر
آغ سارای قول وئرمیشدی قوللارینا
باکینگهام چرچیل‌ین درسینی أزبر ایدی،
ایز ایتیرمیشدی هر زامانکی کیمی
باشینی قاتمیشدی اورپا اتفاقیندان گئری چکیلمه‌یه
مرکل، شرقی مفعول دئیلدی، دوربونو زوم ائله‌میشدی اورتا دوغویا
کرملین روس شووَه‌نی سالمیشدی
ائلیزه سوسموشدو
واتیکان سوسموشدو
قادینلاری بئش اون شاهی‌یا جینسل کؤله‌لییه ساتاندا
تانری بئله سوسموشدو
گؤیدن داش یاغدیرمادی
یئتمیش ایکی میلّتدن توپلانمیش، اردونون بئلیندن ویرمادی…
آخ… بو گئجه یوخو قاپ قارا بیر کپنک‌دیر،
باشیمدا قاناد چالیر
اونلار، اؤلومه مشغول اولورکن
منسه پیس قوخویان نفت ایله
گول قوخویان قادینلارین اورتاق نوقطه‌لرینی آختاریرام
وسوسه…
ائحتیراس…
پارا…
آخ…
آمان بو نفت دوشکونلویو،
قادین دوشکونلویو،
قان دوشکونلویو اولان مودریک‌لرین عاغلیندان!…
گؤزومو یومورام
چئوره‌مده‌کی قیروولانمیش قارانلیقدان
باشیمداکی عاغیلمدان بئله قورخورام
سوسورام!
اینسان ایله حشره‌نی توتوشدورورام
یوخ!
بو بال او بال دئییل
بو تاخیل او تاخیل دئییل
بو قان او قان دئییل…
دان سؤکولوب،
تبریزده، زامان وطن ساعاتی ایله ایشله‌ییر
کپنک، ساچیمین قاراسیندا گیزله‌نیر
منسه عاغیلدان- باشدان
قادین قیلیغیندان چیخماغیم
آری‌یا
قاریشقایا دؤنوشمه‌ییم گلیر
میغ‌‌میغا اولوب اینسانلیغی سانجماییم گلیر….
۹۵٫۱۱٫۷
یک پاسخ
چوخ اعلا و گؤزل تصویرلر یارادیبسیز و بو سیزین باجاریلی اولماغینیزی گؤستریر و اوندان اوستون خالقین دردینی گؤزل شکیلده شئعیره چکیبسینیز
ساغولون اللرینیزه ساغلیق