بنؤوشه
یوسف جوادی
خزان قوجاغیندا سولان بنؤوشه
اوره‌گی پاییزدان دولان بنؤوشه
تورپاغین آغریسین آلان بنؤوشه
یاغیش کدرینی سیله‌جک، دایان!
ساچلارین دولاشیب قارانلیقلارا
گونش تومارلارسا چیخار آشکارا
گؤرسه‌ده یایلیغین بورونوب قارا
خینالی باشیندان بیله‌جک، دایان!
یئللر قانادیندا اسن گونلرین
یاغیشی باغرینا باسان گونلرین
گونشی تئلیندن آسان گونلرین
یئنه‌ده او گونلر گله‌جک، دایان!
هله تئزدی بئله سولما بنؤوشه
گله‌جک سنین‌دیر اؤلمه بنؤوشه
گله‌نه بیر قونچا گولمه بنؤوشه
باهار دوداغیندا گوله‌جک، دایان!
