اوخوماق زامانی: < 1 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

nahani_2
سنسیزلیک‌لر(۱۹)
مجتبی نهانی

(۱)
ماوی‌لره بویانیر گونلر
سن باخدیقجا
ایشیقلی، شنلی
سسسیزلییین تام اورتاسیندا.

(۲)
هارداسان؟!
گَل بیرلیکده اوچاق
تانینمازلیغا دوغرو
وار اولان یوخلوغا
سسی چیخان سسسیزلیییه
سندن، مندن اوزاق گزن موتلولوغا.

(۳)
ساریلماق ایسته‌ییرم سنه-
دویونجا
دومانلی باخیشلاردان ایراق.
چکیلین گؤزوم قاباغیندان
ساچ‌سیز گونلره-
داراق گزدیرن‌لر.

(۴)
هؤرولو ساچینین تئلینه-
دولاشان یئل ده اولا بیلرم
اوزونو ساخلاماسان مندن.

(۵)
دوپ-دولو ایشیغینا
چکیرم گؤوده‌می
هر هاردان گلسن
جانیما قان دوشه‌جک.

(۶)
باتماق ایسته‌ییر-
اووجومداکی گونش
بیر آی اوغورلاییرام-
آل یاناقلی اوزوندن
گؤزو باغلی گزیر دونیا
سن منیم دالیمجا
من سنین آرخانجا.

(۷)
الیم اوزانیر-
آی درمه‌یه
دوداغین بوزولور
قاشین قالخیر
گئجه‌م دارالیر
بارماغیم کسیلیر.

(۸)
گولوشونده،
اوزوم سالخیملاری آسلانیر
آغلاماغین جیجییی گلیر-
دوداغینداکی سئوینجه
نه اولورسا، اولسون
کیم گؤز وورورسا، وورسون
سن سایما، چال تخته‌یه.

(۹)
یاخاما ووردوغون گول
بوغازیمدا قالان سؤزلری
قوپاریر، آپاریر
گلیب، کئچیب هر شئی
هله ده بوراخمیر او گولون عطری
هر واخت آچیرام گئجه دفتریمی

(۱۰)
آزالیرام
آز-آز
بیر-بیر
سندن،
تک من قالمیشام
اوتانیرام اینان-
سنسیزلیکدن.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *