گئجه نین …
رقیه کبیری
گئجه نین دوققوز اوتوزو
سویقون وار ایچیمده
دوققوز اوتوز بئشده توتوقلانیرام
چالیب، چاپدیغیم سئوگینی محکمه یه بیراخیرام
سویقونچو من
حاکیم من
تک باشینا قاضی اؤنونده یم…
ساعاتین اون بیر اوتوزو
اعتراف ائدن من
اؤزومو ساووروب، سووران من
یالنیزلیغا محکوم اولان من
تیق…تیق…تیق…
قاضی ماساسیندا اون ایکی دنگه سیز تیققیلتی
آدسیز زامان
عقرب لر بیر-بیرینه سانجیلان
بیرلشدییی
سئویشدییی آن
یالنیزلیغیم قولاغیمدا زیل چالیر
قارانلیق
سوکوتا جومور….
————–
ایضاح:
بو شعر “ازادلیق” سایتی‌نین“کئچیرتدیگی ملی شعر، حکایه و رمان مسابقه‌سینده آلتینجی یئری قازانمیشدیر. رقیه خانیم کبیری بو مسابیقه‌یه ایکی شعرله قاتیلمیشدیر.
