اوزونه تامارزی / ائلتاش صالحی
چئویرن: ایشیق
ترجمه: ایشیق
ایشیق
00:00
00:00

eltash
اوزونه تامارزی
ائلتاش صالحی

پاریلداییر شهرین ایشیق‌لاریندا
اوتاغیمین قارانلیغی
تیر چکیر خییاواندا ایشیق‌لار
تیر چکیر قلمیم
تیتره‌دیر پرده‌لری سؤزلریم
و تیتره‌ییر پرده‌لرین…
قانایان آنی‌لاریمدا
پنجره‌لر قلب قیریزینه کئچه‌سی‌دی،
سنسیزلیگیمین ایحتیرامینا
سؤنور شهرین پنجره‌لری بیر به بیر؛
بوتون قاپی‌لار سنی آسقیریر
سویوغون ده‌ییمیش خییاوان‌لارا!!
قیش بورویوب شئعرلریم
هر سؤزجوک سنی فیسیلدادیر
کاغیذلارین قارلی گؤزلمینه
هله‌ده…
قاپی دالیندا آسقی‌لانیب عطرین
هله‌ده باشماق‌لیغیم یئریک‌دی باشماق‌لارینا؛
دووارلاردان آسیلیب بارماق‌لاریم
دووارلار آسیلیب بارماغیما
اوزونه تامارزی‌دی اللریم
تام آرزی‌دی اللرین!!
قیزیشیر شئعرلریم
لیمانچی‌لارین اود چللگینده،
قولاغینا دئییرم شئعریمین
”انا خلقناکم من الگؤزلری…”
مین سطیر باخیش یازیلیر گؤزلریمه
یاغیر اووجونا دوداق‌لاریم
اوپدوگوم هر سیقارین،
سیقار پاکئت‌لریندن آلیرام دوداغینین تامین
یاغیر آیاق ایزلرینه دوداق‌لاریم
یا قیر آیاق ایزلرینله دوداقلاریمی
اؤپوش فیلتئرلری دولدوروب شهری
شهرین سوفراسیندا کیفسه‌نیب سئرچه‌لرین اؤتوشمه‌گی،
یولجولاردان اؤنجه
گؤز یاشلاری مینیر آوتوبوس‌لارا
تله‌سیک سولانیر سنسیزلیگین چؤره‌یی
باخیرام قول ساهاتیما
بیر ساهات سنسیزلیگیمه آرتیلیب…

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

اوزونه تامارزی / ائلتاش صالحی

ایشیق
www.ishiq.net

آذربایجان ادبیات و اینجه‌صنعت سایتی