قیسا شعرلر(۱۸)
فریبا مرتضایی
(۱)
گل گزدیریم سنی
سنسیز
اؤلدویوم یئرلری
(۲)
منی اؤلدورن سن سن
قبریمین اوستونده
نه گزیرسن
قورخما اؤلن دیریلمز
تورپاقین اوزو سویوقدور
سن بیردن اوشومویه سن؟
(۳)
سن
سئودیییم قادین
اذن وئر،
سنی سس‌سیز دوشونوم
سنی دینمه‌دن دانیشیم
باخمادان آغلاییم
بویور بو من،
بو سس‌سیز‌لیییم
آخان گؤزلریم
آغزیمدا یوخ اولان دیلیم
بویور دیلیم-دیلیم
بودا سون دوراق،
گل
چییین-چییینه
چاره سیزلیییه دایاناق
(۴)
باخ
سنی هر کسدن گیزلتمیشم
اللریم سولومدا قالیب
کؤینه‌ییمین
دوگمه لرین ساخلاییب
(۵)
اؤز دیلیمده سئو منی
شیرین شیرین
دادی چیخسین داماغیمدا
