تبریز
کریم خجیر- باریش
(1311- 1376)

 ای آنام دیرلی دوغما دیاریم

پوزولماز گولشنیم، سولماز گولزاریم

باخیشی اوره‌ییم سئزن قراریم

آرزومون گول آچان بوتاغی تبریز.

***

سسیندن آییلمیش، دویوخموش زامان

الیندن آلیبدیر ایگیدلر نیشان

هر سحر تک دوغان “دان”اولدوزومسان

یوردومون ایشیقلی چیراغی تبریز.

***

چؤللرین، قوشلارین شن اؤلنگی‌دیر

حوسنونون جیلوه‌سی شافاق رنگی‌دیر

آچیلمیش گوللرین ائل چلنگی‌دیر

حیاتین گولومسر دوداغی تبریز.

***

تاریخی عؤموردور کئچن هر دمین

سینانمیش ائلیندیر یاخین همدمین

آلیب سهنددن ووقار گؤرکمین

اؤنملی دوستلارین دایاغی تبریز.

***

یول آچدین قلبیمه گؤز ببه‌گیمدن

ان اؤنده دوروبسان هر گره‌گیمدن

وارلیغین دوغولموش ایلک دیله‌گیمدن

گونشلی سئوگیمین ساچاغی تبریز.

***

ائللرین سوردوگو هر بیر چاغیندا

حؤکمونون متنی وار هر بوجاغیندا

شاعرلر یاتیبلار سیخ قوجاغیندا

شعریمین توکنمز نووراغی تبریز.

***

سؤزونو دانیشان دیلیندیر دیلیم

نه قده‌ر واریمسان اولماز نیسگیلیم

وورولموش عاشیقم سنسن سئوگیلیم

یاشاییش عشقیمین ماراغی تبریز.

***

ستارخان آدینا باغلانیب آدین

افتخار یارادیر هر گنج ائولادین

تملین قازیبسان سن استبدادین

انقلاب اوردونون اوجاغی تبریز.

***

(۱): ادبی جمعیتیمیزده “باریش” آدی‌لا تانینان آذربایجان شاعری کریم خجیر1311ینجی ایلده آذربایجان جمهوریتی‌نین بولاق شهرینده دونیایا گوز آچمیش، دؤرد یاشینداایکن عائله‌سیله بیرلیکده تبریز شهرینه کؤچموشدور. 1340ینجی ایلده انگلیس دیلی اوزره  لیسانس آلیر و 1362ینجی ایله دک معلم لیک ائدیر. باریش اللینجی ایللردن آذربایجان دیلینده شعر دئمگه باشلاییر. اونون شعرلرینین اساس غایه‌سینی وطنپرورلیک، آزادلیق سئورلیک و اجتماعی لیریسم تشکیل ائدیر. اؤز انقلابی احوال- روحیه‌لی شعرلریله انقلاب عرفه‌سینده بؤیوک اوخوجو رغبتینی قازانیر و انقلابدان سونرا “آل شفق‌لر” عنوانلی کیتابی چاپدان چیخیر. اؤز انقلابی و وطنپرور شعرلریله تانینان کریم باریش 1376ینجی ایلین شهریور آییندا وفات ائدیر. اونودولماسین- دئیه، خاطره‌سینی عزیز ساخلاماق اوچون، اوستادین بیر شعرینی سیز عزیز اوخوجولارا تقدیم ائتدیک.