آغ کؤینکلیم
معصوم جبارپور

توپراق سیزیلتیمدان بئزمیش،
جانسیزلار!
ائشیدیرسن می؟
آغ کؤینکلیم
یوخلوغون بیر وحشی قافلان کیمی
اوره‌ییمی بوجاق- بوجاق چئینه‌ییر
بای- بای قورتولورام
کیم سئوگیمیزی یاساقالادی!؟
توتساقلاندیغیمی کئشکه سیله‌یدی
یالانچی رئال دونیادان
بیریسینین سئوگیسینی بو گئجه چالاجاغام
آنام سایاغی تیکه‌جه‌یم بخیه‌لری یاساق سئوگی‌یه
کئشکه
بوتون داریخمالارین قوجاغیندان
کؤکسونه سورگون اولایدیم
تکلیلیک باغلاریمدا
یالنیزلیق برکینیبدیر
گل
تانینماز آغ کؤینکلیم
اوره‌ییم دئییشمه‌دن اسکی تانیش اول
قورتار ایکی دوشونجه اورتالیغیندان،
کئشگه
گؤره بیلسن رویالاردا قانچیل شئعرلر اوستونده
قاچیرام!
آغلاییرام!
سونرا یوخولاریندان سیلینیرم-
دارماداغین تک یاتاغیما،
گل
کیریتمه بو قیزجیغازی تبریزین خیاوانلاریندا،
داها
گولوشلو دوداقلارا آلینمارام
گئج قالسانا-
بیر دهشت فیکیر گوزله‌ییر
گلسن ده گلمه سن ده
بیر داها تاپیلمارام
…
یورولدوم یولون سونونا باخماقدان
قوجاق قوجاق
قارانفیل نذیر وئردیم گلن یوللارا
یول قارالدی
چن دوشدو
بیر…
ایکی…
ماتاماتیک ساییلار دان یورولدو
باجارا بیلمه‌دیم
اورییمدن سیلمه‌یی
گئدیرم
وارلیغیمی بیله- بیله
گؤمدون منی…
سن یاشا یئتر