دنیز، اینسانین یاساق آدی‌دیر
رقیه کبیری

«دنیز، سرحد‌سیز بیر خیال
دنیز، گئنیش اوره‌کلی اولار
آرپایا تؤکسن، آت یئمز،
سومویه وورسان، ایت یالاماز دنیزی
بونونلا بئله،
شعر، نازلاما، ناغیل جوشدورار، دنیز.
دنیز وفاسیز، دنیز نامرد اولار،
قوجاق آچار
اوولایارسان
اوزرسن،
ایترسن،
باتارسان،
أل- آیاق چالیب، بوغولارسان.

یئر وار، گونش دنیزده دوغولار
یئر وار، گونش دنیزده باتار

گون وار، گونش دنیزده اوینار
گون وار، گئجه‌سی دنیز بویو گؤز اولار، بولودا دولار
ایلان ووران یاتار، دنیز چالخالانار،
و چالخالانان دؤشونده دَن تؤکر دنیز قوشلارینا.

گون گلر زامان آدینی دَییشر،
آخار اولدوزا دؤنر،
داش دوشر دنیزین باشینا.
دنیز دوزلاق اولار، گؤز آجیشدیرار
باتلاق اولار، پیس قوخویار،
اؤلوم قاپیسیندا یاتالیق یاتار، دنیز.
و مرد اولان  بشر،
گئنه شعر یازار شورانلیغا
ناغیل یازار باتاقلیغا
جوشغولاری، نازلامالاری، شعرلری، ناغیللاری
نامرد دنیزدن گئری ایسته‌یر.
دنیز، تورپاغا تاپشیریلاندان سونرا بئله
شورانلیغی بورجلو قالار بشره.»
بالیق‌سیز، زنگله‌سیز
گؤز بویدا بیر گؤلده
سینیق لؤتگه‌ده اوتورموش، قوجا بیر بالیقچی
دنیز ناغیلینی، سؤیله‌دی دنیز آدلی قیزینا!

مهر. ۱۳۹۴