قبیرلرین آراسیندا

شعیر اوخوماق اولارمی؟

اوزون بیر پیچیلداشماق

روژسوز بیر انتحار

اوره‌ییزده یارانارمی؟

اولمایا قورخولو باش سالامات قالیر گئنه؟!

جمهوری خیاوانی اؤپوشسوز سنی گؤزلور

باخما

قانلی یاناقلارینا

باشقا بیر سئوگیلی

گؤزلریزده تیکیله‌جک

منی اؤپه جکسن‌می؟

اؤپوش؟!

اؤپوشمک ایمکانسیزدیر خانیم

تبریزیم سؤزباز اولاجاق

اوتوبوس سنسیز منی میندیرمه‌یه‌جک

روزنامه لر سنسیز منه ایش تاپمایاجاق

سنسیز کیتابلاریم مجوزسیز قالاجاق

گئدیرسن

گئت

پالتارسیز سرین سو سپه‌رم دالینجا

یول گؤزله‌رم…..

بوشلا جانیم

سنسیز خیاواندا رئژه گئتمزلر

ایچیمده بیر اولدوز آخیر

تقویملر سنین آد گونونده مجوزسیز اولارلار!

تئز اول گئت

قار یاغیر دوستاغا

اورکدن سیزیلتی سسی گلیر

باش کسیرلر

گل قاباغا

قان سورتوم آلنیوا

گؤز وورماسینلار سنی!

۸ تیر ۱۳۹۰