قیسا شعرلر(۹)
فریبا مرتضایی

(۱)
یارادان الله‌دیر،
اؤلدورن سن؛
آی بالا، سن کیمسن؟!

 (۲)
بیزی سئویرم،
بیزده سن وارسان.

(۳)
های قوپوبدور من اؤلموشم
دوغرودور، من اؤلموشم؛
بوراخین
آداملیغیم دورسون ایاق اوسته!

(۴)
گؤزلریمدن آخان داملالار –
سوزوب یاناغینی یالار؛
دیلیم کوسوب بوغازیما قاچار؛
یوخسان
بو هارای هارایا چاتار؟،
کیم بو دیلی دیله توتار،
کیم باریشدیرار؟!

(۵)
سون باهارین یارپاقدیر
گلن گئدن آیاقلاییر؛
خوشونا گئدیر
خیشیلدادیر؛
نه آپاران وار، نه دیندیرن،
یازیق اوره‌ییم
تک باشینا ازیلیر!

(۶)
سن اولاندا باشیم سنه دولانیر،
سن اولمایاندا
مئیداندا توپ اولور!
بیری گلسین
سنه ساری شوتلاسین،
نه اولور!

(۷)
سون باهاری سئویرم،
آمما قیش گلسین!
قیشدا، بورنومون اوجو بئله قیزارار –
اوتانارام!
آمما سندن نه گیزلین،
بو صحنه‌نی یاشاماق ایسته‌رم؛
سنینله قارلارین اوستونده یئرییم،
یاواش-یاواش، ال-اله
بیردن دؤنوب اوزومه باخاسان،
من اوتانام، سن گوله‌سن؛
سونرا بورنومون اوجون توتوب سیخاسان؛
اوره‌ییم دؤزمور…
گل ائویمیزه دؤنک، سن دونارسان!
بو اَن گؤزل دویغو،
اَن گؤزل ائوه ساری دؤنوشدور…