ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

akbar rezayiمشهدی ماحمودون یاس تؤره‌نی
اکبر رضایی مولان

اینسان اوشاقلیق ایللرینی یاشادیغی یئری چوخ سئوه‌ر؛ بونو بیر حقیقت کیمی هاممی یاخشی بیلیر. من‌ده دوننلری قدیمکی محله‌میزدن کئچیردیم. ائله هر زامان اورانین ائولری و کوچه‌لرینه دیقتله باخیردیم؛ بیردن گؤزوم ساتاشدی بیر اؤلوم اعلانینا. عکسینی بیرینه بنزتدیگیمه گؤره دایاندیم اوخودوم؛ گؤردوم کی اؤلن آدام بیزیم نئچه ایللیک قونشوموز مشهدی ماحموددور. مچیت تؤره‌نی‌نین واختینی یادیما آلیب، یاس تؤره‌نینه گئتمه‌گیمی اؤز- اؤزومله قارارلادیم.
مشهدی ماحمود چوخ یوخسول بیر اینسان ایدی؛ ائله بیر عؤمور یوخسوللوقلا چالیشاردی؛ ایلک باخیشدا و داورانیشدا آجیقلی نظره گَلَردی، آمما چوخ ساده و مئهریبان بیر اینسان ایدی. ائله همه‌شه بئکار واختلارینی کوچه‌نین باشیندا اوتوراردی. من اؤزوم اوشاقلیق زامانلاریمدان بئش اون ایل قاباغاجان اونون هئچ بیر یئره گئتمه‌سینی گؤرمه‌دیم. جسارتله دئیه بیلرم کی شهریمیزدن بیر کره چیخدیغی و ان اوزاق گئتدیگی یئر و محله‌میزدن اوزاقلاشماسی مشهد شه‌هرینه گئتمه‌سی اولموشدور.
بیر گون سونرا قاراریما دایر حاضیرلانیب، گئتدیم مچیده. یازیق مشدی ماحمود یاددان چیخمیش بیر آدام کیمی‌ایدی. مچیدده اون، اون بئش نفر محله‌نین قاری قوجاسیندان آرتیق کیمسه یوخ ایدی. بو آرادا مچیت بوش اولدوغونا گؤره منیم ده دورماغیم گلمه‌دی و تؤره‌نین سونونادک اوتورماغ ایسته‌دیم. بیر قرآن کیتابینی الیمه آلیب، الیمله جیلدینین توزونو تمیزله‌ییب، آلنیما دایاییب، اؤپدوم و باشلادیم اوخوماغا. چوخ اینسانلاری تانیرام کی منیم یانیمدا قرآنی های- کویونان اوخویورلار. سورورام کی معناسینی بیلیرسن دئییر یوخ. من ساده‌جه اوخویارام، ائله اونا گؤره ده من چوخ زامانلار هر آیه‌نی اوخودوقدان سونرا معناسینی دا اوخویارام و داها آرتیق موقددس قرآنمیزا یاخینلاشارام. آنجاق او رحمتلیگین دینجلیگینه خاطیر موقددس قرآن کیتابیمیزدان بیر آز اوخودوم، ائله یاپیشدی منه کی حقیقتا اؤزومونده روحوم دینجلدی.
یاخشی بیلیرسیز کی هر مجلیسین بیر آپاریجیسی اولور بو مجلیسین آپاریجیسی(عرشه‌خوان)ی کئچدی میکرافون دالینا. بیر قورتوم سو ایچیب، باشینی قیراغا اَییب بیر ایکیسینی اؤسگوروب، اؤزونو دیکلتدی و باشلادی. موقددس قرآن کیتابیمیزدان نئچه آیه‌لر اوخویوب و بیر آزدا نیسگیللی سؤزلر دئییب، سونرا باشلادی مجلیس تعریفینه. بیلدیگینیز کیمی اونلاریندا اؤزل دیل‌لری و دانیشیق‌لاری واردیر…
بیردن عرشه خان قارداشیمیز باشلادی:
معزا خانواده‌لر طرفیندن تمامی تشریف گتیرنلردن تقدیر و تشککور اولونور؛
استادان ، دانشجویان، معلمان و مدیران محترم مدارس
همچنین دانش آموزان عزیزدن تشککور اولونور؛
مدیران محترم ادارات
مقامات کشوری و لشگری
رؤسای ادارات شهریمیز
جامعه اسلامی ادارات استان
مجمع بسیج کارگری و کارمندی استان
همچنین هنرمندان، شعرا و نویسندگان چیره دست
انجمن های ادبی و هنری استان
حوزه هنری و اداره محترم فرهنگ و ارشاد اسلامی استان
معاونت فرهنگی و اجتماعی شهرداری محترم شهریمیزدن تقدیر و تشککور اولونور؛
میهمانان بزرگواری که اقصا نقاط استانیمیز و مملکتین باشا باشیندان شرف حضورلاری وار
میهمانان عزیز و ارجمندی که شهرستانهای اطراف و محلات مختلف دن قدم رنجه ائدیبلر
همکاران و دوستان نزدیک مرحوم حاج ماحموددان کی متحمل زحمت اولوبلار
و تمامی عزیزان و بزرگوارلاردان، از طرف معزا خانواده‌لر قدردانی اولونور.
آقای احمد حسین احمدی تابلو تسلیت‌نن اظهار همدردی ائدیبلر اموات‌لری یاد اولسون و …
فاتحه وئریلدی، بیر فاتحه اوخویوب، مشهدی ماحمودا اولو تانریدان رحمت دیله‌دیک. آجیغلانمیشدیم؛ ایسته‌ییردیم دورام، آمما حقیقتا مجلیسین بوش اولدوغونا گؤره دورمادیم. ائله هئی چای دی کی گتیریرلر قوجالار ایچیر، من‌ده ایچیرم، بو آرادا اونلار تئز- تئز دوروب گئدیب یونگولله‌شیب گلیرلر، یئنه ده چای ایچیرلر و یئنه ده …. آنجاق بیر ایکی نفر ده گئتدیلر. سایدیم مسجیدده اون ایکی آدام وارایدی. عرشه خوان قارداش باشلادی موقددس قرآن کیتابیمیزدان اوخویوب یئنه ده باشلادی:
بنده از طرف معزالار
کسبه‌ی محل و فعّالان اقتصادی شهریمیز
علما، فضلا و دانشمندان ارجمند شهریمیزدن
همچنین اداره کل و نواحی پنجگانه ی آموزش و پرورش‌دن تقدیر و تشککور ائدیرم.
اعضای محترم شورای اسلامی شهریمیزدن
منتخبین مردم در مجلس شورای اسلامی دن
اداره کل بهداشت و درمان
اداره کل بیمه تامین اجتماعی استان
اداره کل صنعت و معدن
اداره کل میراث فرهنگی استان
شهرداری مرکز و ادارات زیرمجموعه دن
خلاصه تمامی ادارت کل، ارگانها و نهادهای انقلابی دن
نیروی انتظامی استان
استانداری محترم و ادارات تابعه دن
و عزیزیمیز حاج رسول آغانین شرف حضورلاری وار مجلیسیمیزی مزین ائدیبلر تقدیر و تشککور اولونور.
و …
او قدر آجیقلانمیشام و حیرس بوغازیمی کسیر کی اوخودوغوم موقددس قرآن لذت‌لری ده منیم یادیمنان چیخیب. گیج قالمیشام.
اؤز- اؤزومه دئییرم:
– آی الله من هاردییام!!! بورا هارادی!!! مشهدی ماحمودوو من نییه ایندییه نه جان تانیمامیشام!!!
دئدیم بس خیال گؤرورم. ساغ الیمله ساغ قیچیمی چیمدیکله‌دیم گؤردوم کی آییغام…
باش آغریسی اولماسین ائله بیر مجلس اولموشدوکی اگر من مشهدی ماحمودون یئرینه اؤلموش اولسئیدیم، دوروب گلیب بو عزت عظمتی تاماشا ائده‌ر‌دیم.
یاس تؤره‌نی بیتدی، اوخویان قارداش دوران کیمی من ده دوردوم. ائشیکده یاخالادیم دئدیم:
– سالام علیکم قارداش یورولمیایاسان، بو نه ایشدی قارداش!!! او سایدیغین اداره‌لر، اینسانلار، مقامات، دانشمندلر، مقامات کشوری و لشگری و … هاردایدیلار؟!!! نییه بئله ائدیرسیز؟؟؟!!! هله توتاق کی اولسونلار، آخی هر اینسانین اؤز یئری اؤز حؤرمتی واردیر، باشقالارینی نییه او بیرسی‌لرین گؤزونه سوخورسوز؟!!! دوز ایش ده‌ییر کی آخی!!!
دئدی:
– قارداش بیزده پول آلیریق کی بو سؤزلری دییک ده، ایشیمیزین آدی نه دیر بس؟!!!
دئدیم:
– قارداش پول حالالین اولسون، آخی یالان دانیشیرسان. من اونلاری سورورام.
بئله جاواب وئردی:
عزا صاحیب لری تاپشیردیلار کی مشهدی ماحمود چوخ کیمسه‌سیز آدام ایدی، خواهیش ائدیریک عزا مجلیسینی عظمتلی آپاراسان، افتخارلی مجلس اولسون.
گؤردوم یازیق دوز دئییر. چوخلارینی گؤرموشم کی حیاتینین باشا باشی بیر چلوکاباب یئمه‌گه ایمکان تاپا بیلمیر. آمما هامان آدام اؤلن کیمی یوزلر آدام ییغیشیب اونون چلوکابابینی یئییرلر. یازیغین دیریسیندن اؤزونه بیر دنه یوخ، آمما اؤلوسوندن باشقالارینا یوزلر چلوکاباب چیخیر و قارنی توخ آداملار ییغیشیب یئییرلر، ایچیرلر، میرتلاشا- میرتلاشا اؤلن آدامادا رحمت اوخویورلار. هامان دونن مشدی ماحمودو یادا سالمییان دوستلار، تانیشلار و یاخینلار قارا کؤینه‌یی گئییب سوفرانین باشیندا اوتورولار و اؤزلرینی چوخ چوخ حوزونتولو گؤستریرلر و دوغرو اولمایان بیر شرایط ده باشلاییرلار یازیق اؤلن آدامی تعریفله‌مه‌یه کی: چوخ بئله آدام ایدی چوخ ائله بیر اینسان ایدی… خلاصه یاخشی بهانه‌لر ایله اوتوروب چای ایچیب و یازیقدان قالان نه وارسا هامیسینی یئییب اؤلنین پولسوز پاراسیز عائیله‌سینی بؤیوک آللاها آمانات تاپشیریب، یولا دوشورلر و اوزون ایللر بیر کره ده خبر توتمورلار کی اونلار آژدیلار؟ توخدولار؟ کئچیم‌لری نئجه دیر؟!!!
آنجاق ائله بوردان بوتون دونیاسینی ده‌ییشمیش اینسانلارا اولو تانریدان رحمت دیله‌ییب و قالان اینسانلارین بیر-بیرینین دردینه قالیب و یاخشی یامان گونلرده یاردیمدا بولونمالارینی ایسته‌ییریک. عشق اولسون.
11/1/93

7 پاسخ

  1. sayin GUNESH
    dunya yashami ve besher hayati serhedleri yashadi ve maansiz oldugunu dushundu. demeli indi dunyanin bashabashinda ustun milletler serhedleri her nede olursa olsun sindirmag uzeredirler menje olabilerki varligimizin her mevzusunda bizde bu ishleri bashlayag. yeni bir katagoryada yaratmali olsag etmeliyik ve davam vermeliyik. olsunki buda bir yol olsun. anjag gunsel ve kultural meseleleri analiz etdek ve gorekki neylemeliyik. xosh sozlerinize gorede teshekkurler. sag olun sag yashayin

  2. سایین صادق صدیق قارداشیم

    گؤزه ل سؤزلره گؤره میننتدارام.
    سیزلرین سئوگی و محبت لرینیز منیم ان بؤیوک وارلیغیم و زنگینلیگیم دیر. تانیش لیق وئرمه دیگینیز اوچون اوزولدوم. سیزین کیمی گؤزا اینسانلار فخر ائتمک لازیمدیر. تانیشاریق ایشالله بیر گون. ساغ اولون ساغ یاشایین.

  3. سایقی لاریملا

    یوروم یازان مئهریبان اوخوجولارا،

    ایشیقی ایزله ین ایشیق سئوه رلره،

    اوره ک دولوسو تشککورومو بیلدیریرم.

    قونشو قارداش دئمیشکن: ایی کی وارسینیز

  4. yazini oxudum. yazichinin ellerine sagliq, ama mene, bu yazini hansi katagoriye yerleshdirmek bir az chetin gelir. ne yazinin dili ureye yatan deyil, sanki bir rapora benziyir. yazichiya bacarilar dileyirem
    tenz kimi tenzdei nede ciddi bir hikayedir.

  5. یاشاسین استاد رضایی جنابلاری حقیقتا گونسل موشکوللردن یازیبسینیز. الله مشهدی ماحمودا رحمت ائله سین کی بئله یازی تؤرتماغا سببکار اولوبدور.
    من بایرام گونلری تبریزده استاد اکبر رضایی نین اؤزه ل کیتاب سرگی سیندن گؤروش ائتدیم. اینسانلارلا داورانیشی و مهربانلیقلا و سایقی ایله دانیشماسی دوغرودان کی کؤنلومو اوخشادی او گونون خاطره سی هئچ زامان یادیمنان چیخماز. فخر ائتدیم آذربایجانیمیزین بئله سی یازار و شاعیرلرینه. هامینیز ائلیمیزین کئشیگینده سیز آللاه کؤمه یینیز اولسون

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *