گئیینیبسن بویالارلا سن آل الوان، کپنک
ایپک اینجه او قانادلارینا قوربان، کپنک
ذووق آتیرسان چمنه چؤل‌لره سن هر بیر آنی
اولوب عالم و هر اینسان سنه حئیران کپنک
گول لرین کئیفینی بیر- بیر سوروسان یاد ائدیسن
سئوگی‌دن باده نی دولدورموسان آسان کپنک
چالینیر شانینه چؤل‌لرده توتک، نئی، بالابان
سن سئویرسن چوبان اولسون یادا سولطان کپنک
یئل ووروب سیندیرا شاید او نزیک بال و پری
او ظرافت ائدیر هر خسته‌نی درمان کپنک
سن حیات ایچره محبت باغی‌نین بیر گولوسن
قالاجاقسان سنی گر وورسادا توفان کپنک
سنسیز آسوده یاشارسامدا گؤزه‌للیکسیز اولور
ایستیرم سن اولاسان کؤنلومه مئهمان کپنک
گئجه‌لر جوشه گلیر دویغولاریم، آغلاییرام
سنی سنسیز یاشاماق ائیله‌ییر افغان کپنک
دونیانین درد و غمیله دؤزه‌رم من یاشارام
سنسیز آمما یاشاماق اولموری آسان کپنک
دردیمین درمانی تک سن یاییلیرسان جانیما
داماریم روحوم ایچینده ائله جوولان کپنک
سیغماز البته کی سئوگیم ایکی دونیایه منیم
سن منیم سئوگیمه بیر آیتی قورآن کپنک
قیرسادا هر سئویلن یا کی سئون پیمانین
سن او خالیقله منیم سئوگیمه پئیمان کپنک
هر گؤروشدن آلیرام روحیله جانین نَفَسین
سنسیز اولدوقجا دولور گؤزلریمه قان کپنک
ای منیم دردلریمین درمانی گَل دور یانیما
سن نَفس سن منه دولدور منی هر آن کپنک
لوطف ائدیبسن منه رویون گؤرونوب گؤزلریمه
داغیدیر قلبیمی هر آن غمی پونهان کپنک
گل بو چؤل لرده محبتله منیم دویغومو دوی
بیر ساریل بوینوما سن اول منه جانان کپنک
هئی قاچیرسان گلیرم من سنین آرخانجا هر آن
بیر دایان قوی ساریلیم بوینونا بیر آن کپنک
حق بیلیر کؤنلومون عشقین کی محبت باغی دیر
گل بو سئوگیمده منی ائتمه پریشان کپنک
سن قاچیب بوردان اورا ائتمیسن آواره منی
سئوگی قویمازکی منی، سیندیرا هیجران کپنک
دویغولار سینسادا سئوگیم یاشادار بیل کی منی
اینجیمز قلبیم اینان جور و جفادان کپنک
سندن اؤزگه منیم اولمازکی سئویلمکده پاییم
بیر دوشون سنده منی سن منی بیر قان کپنک
من مرام اهلیلرین ساده جه بیر وورغونویام
«سَسسیز»م تکجه بودور منده کی نقصان کپنک
93 بایرام گونلری
اکبر رضایی
چئویرن: اکبر رضایی
ترجمه: اکبر رضایی
سسلندیرن: اکبر رضایی
- شعر
- اوخوماق زامانی: 2 دقیقه
- https://ishiq.net/?p=8336
چاپ
2 پاسخ
yashasin
sag olun firuz bey
Sas
Azərbaycan yashasin