اگر اؤلسم
شهرک ميرزا
دئييرم اگر اؤلسم، بؤيوك شاعر اولارام،
احتراملي، حؤرمتلي تاريخلرده قالارام.
ياد ائيله‌يرلر ائللر مندن بير نابغه تك،
ختم مجلسلريمه گول گلر اتك- اتك.
متعهد بير آتا، گؤزل مهربان قارداش،
باشي اوجا بيركيشي، خانيمينا بير سيرداش.
بؤيوك- كيچيك آنلايان، عظمتلي، وقارلي،
گؤركملي شخصيتي، انضباط، اقتدارلي.
گؤزومو يومماميشدان تلفونلار دوشر ايشه،
باخ سسلرده رعشه‌يه، اوركلرده تشويشه.
تشيعيمه گلمه‌يه مسابقه قويولار،
افسوسلا، آه – وايلا دولار قولاقلار، دولار.
چوخلار گؤزياشي تؤكوب، عزيزيم، دوستوم دئير،
ديريليكده اؤلئيديم مندن توتمازدي خبر.
عكس، تصوير چكيلير گؤزلرين سيلنلردن،
ياديم، خاطرم‌ايله آغلاييب، گولنلردن.
ائله تحليل ائدرلر اؤزومده حيران قاللام،
هنريمي، علميمي سئير ائديب، واله اوللام.
بيلرم، دوشونرم كيميديم، نه‌ايميشم،
اؤزوم باشا دوشمه‌دن نه يازيب، نه دئميشم.
تلويزيون، راديودان سسله‌نر آديم، شانيم،
ياييلار دونيالارا شانلي شهرتيم، شانيم.
افتخارلا عكسيمي سالاجاق مجله‌لر،
فيلميمي گؤتورمه‌يه خبرنگارلار گلر.
بير ميداندا قويارلار شايدده هيكليمي،
شاه اثر يازا- يازا قلملي اللريمي.
ناطقلر دئيجكلر مثلي گؤرونمه‌ميشدي،
حاييف- حاييف كي وقتيسز دونياسيني دييشدي.
سؤز آچيلار يازارلار عالي استعداديمدان،
حقسيزلييين قارشيندا داديمدان، فرياديمدان.
دئيرلر نه مداللار حقيم‌ايدي، آلماديم،
ميزي، پستي، مقامي ايستمه‌ديم، اولماديم.
اثرلريم چاپ اولار كتابلاريم ياييلار،
تعريفيمي ائشيدن اولاري جوت- جوت آلار.
تأسف‌لر اولونار شاعرين فقدانيندان،
مقاله‌لر يازيلار يولوندان، ايمانيندان.
صحبتلرين عنواني صفا و صداقتيم،
بؤيوك حسن ساييلار دئمك ان پيس عادتيم.
تانييام تانيمايام يوزلر دوستوم تاپيلار،
جانلانار خاطريمده اولمايان خاطره‌لر.
گيزلين، آشكار دئيرلر بنده‌يه اجحاف اولوب،
منه لايق عنوانلار رقيبه اتحاف اولوب.
چيخاجاق بير- بير اوزه مينلر گؤزل خصلتيم،
محفل‌لرين نوغولو شيرين سؤزوم، صحبتيم.
كدرلي آهلار چكر شاعري گؤرمه‌ينلر،
يا گؤروب تانيماييب، اونلا ال وئرمه‌ينلر
تئز- تئز اوتوروب، دوروب يئريمي بوش گؤررلر،
عيبلريم اؤرتولر، ناخوشو خوش گؤررلر.
دئيرلر حق جارچيسي ائللرين عاشقي‌دي،
مجلسلرين گؤرکمي، شاني- ياراشيغي‌دي.
رقيبلر سبقت آلار دوستلوقلا بير- بيريندن،
خياللاري راحاتدي ميداندان چيخميشام من.
بيرينين بوندان سورا يئريني دار ائتمه‌رم،
سوسوب، آجي ديليمله كيمسني اينجيتمه‌رم.
نقشه چكمك ايسته‌مز مني بايكوت ائتمه‌يه،
هله بير علم يوخدور اؤلونو ديريلتمه‌يه.
اؤلولرين دالينجا نه آساندي دانيشماق،
اؤلويله وداعلاشيب، عؤمور بويو باريشماق.
پس منيم اؤلوم گونوم دئمك ياخشي گونومدور،
دونيادان گئدن گوندن گؤزل دونيا منيمدير.
مجتيم اوركده، آديم ديللر ازبري
گؤرون هارا چاتميشام آنجاق اؤلندن بري.
اؤلسم گؤررم يقين كيم‌ايديم، نئيله‌ميشم،
يئرسيزدير بو اؤلومو ديريلييه دييشم.
