اؤلو باز ملت
مجيد يالقيز
اؤلوباز بير دلي خلقيک بيزه بو ارث‌دي باشدان
کئچه‌ريک بير اؤلودن خاطيره مينلر ديري باشدان.
اؤلو حقينده قوشوب، يازديغيميز نوحه، مراثي
ديري‌لر سهل‌دي قان ياش چيخارار قاپ قارا داشدان.
اؤلونون آرديجا احسان وئره‌ريک پاي دوگو تاي- تاي
ديري اؤلمکده آجيندان پايي يوخ بير کاسا آش‌دان.
اؤلويه مقبره، مرقد، نه رواقلار کي تيکرلر
ديري ياتميش کوچه‌ده يورغاني گؤي، ياسديغي داشدان.
اؤلوبازلار دياريندا اؤلو حاکمدي بو سؤزسوز
ديري انسان دئيه بيلمير کي وارام من‌ده ياواشدان.
شاعر آزاددي بو يئرده يازا غم، غصه‌لي سؤزلر
حقي يوخدور يازا لاکين قارا گؤزدن، قارا قاشدان.
اؤلويه مدح مجازدير يازيلا هر نه جور اولسا
ولي يوخ يازماغا حقي ديريليکدن، قورو- ياشدان.
ديرينين جراتي يوخدور اؤلويه معترض اولسون
تؤکولوب چونکي وورارلار دوشر حالدان، گئده‌ر هوشدان.
سن‌ده ”يالقيز“ بو ياتان خلقي جهالت يوخوسوندان-
سسله‌ييب قيشقير، اوياندير، دايانيب قالما تلاشدان.