بوگون دوشنبه 30 فروردین 1400 ساعات 12:32
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

roozbeh samadi
بیزلری یاد ائیلیه‌جکلر
روزبه صمدی نیراوغلو

گئنه رأی واختی چاتیب بیزلری یاد ائیلیه‌جکلر
گئنه‌ پول مول داغیدیب اؤلکه‌ده آد ائیلیه‌جکلر
گئنه‌ده یاغ دوگو یوخسوللارا احسان اولاجاقدیر
گئنه شوکر آللاها مظلوملاری یاد ائیلیه‌جکلر
قافارین چایخاناسین ارزاقا انبار توتاجاقلار
قنبرین قوشخاناسین کتده سیتاد ائیلیه‌جکلر
رقیبین گؤزلرینه سوخماقا باش بارماغی اوخ تک
یونتویوب بیر نئچه آی تینلی میداد ائیلیه‌جکلر
سؤزلرین قویروغونا ایپ دولویوب کش وئره‌جکلر
گئجه گوندوز گئنه‌ده زیرنانی باد ائیلیه‌جکلر
مظلومون حاققینین اوستونده اسرکن نئچه مدّت
اوْد سالیب کورکونه ظالیمله عیناد ائیلیه‌جکلر
جنگ اولان چاغدا گئدیب خاریجه‌ده درس اوخویانلار
چیرماییب قوللاری مجلیس‌ده جهاد ائیلیه‌جکلر
بعضی‌سی تا خارالین آغزیناجاق کوپلییه بیلسین
اوزده قرآن اوْخویوب دالدا فیساد ائیلیه‌جکلر
بعضی‌سی حق دانیشیب اؤلکه‌ده گؤزدن دوشه‌جکلر
حق دئین کس‌لری پیسلیکده نماد ائیلیه‌جکلر
نه ساغیندان گؤروروک یاخشی عدالت، نه سولوندان
بار ایلاها نه زامان عدل ایله داد ائیلیه‌جکلر؟
بسدی شاعیردییه‌سن کی گینه زایواقلییاجاقسان
آند ایچیبلر بو سفر میللتی شاد ائیلیه‌جکلر
اوغرونون اللرینی کسمه‌یه قانون قوْیاجاقلار
اختلاس محکمه‌سین یئرلی نهاد ائیلیه‌جکلر
«برجامی» گئت گئده «یارانه» کیمین سویمویاجاقلار
چاره‌سیز دردیمزه بلکه ضماد ائیلیه‌جکلر
هر کسین ائششه‌یی واردیر ده‌ییشیب آت وئره‌جکلر
انس‌اوغلون چیخادیب تخته موراد ائیلیه‌جکلر
دیللرین اؤلکه‌ده تدریسینه دستور وئره‌جکلر
حتتا تورکون‌ده دیلین دوْغما نژاد ائیلیه‌جکلر
داها بوندان سورا بیر کیمسه بئکار قالمییاجاقدیر
قوبادا چیققا قویوب حاجی قوباد ائیلیه‌جکلر
اریدیب قیشدا دوْنان بیمه‌لری دوپ دورو یاغ تک
چاتلییان اللره هر یئرده پماد ائیلیه‌جکلر
خیاوان کؤرپه‌لرین بیر گئجه آج قویمویاجاقلار
آپاریب مدرسه‌ده اهل ساواد ائیلیه‌جکلر
بیر اثر قالمیاجاق اؤلکه‌ده دینسیز باهالیقدان
آرخایین‌لیق سپرین خلقه قاناد ائیلیه‌جکلر
باش باشا دؤرد ایلی مجلیسده گئدیب یوخلاسالاردا
تنگ اولان یوللاری البته گوشاد ائیلیه‌جکلر

2 پاسخ

  1. دوز…!
    دوز آی حکیم!
    دوُز…! بیر نءچه دوْز . . .
    خسته یَم –
    بیر آتیم دا، بارینج،
    سورمه آپتءکین، کرکره چپرین.
    باغلاما،!
    آچ…!
    گوزلرین –
    گءرچکدن،
    کرچک – زءیرک،
    بادام یاغی،
    درمانلار پوتولقاسی./ ق /
    @@@@@@@@@@

  2. اکیرم تورپاغی،
    دونور اللریم، هردن دولور اللریم.
    دونن‌ده اکیردیم، آغ تارلا!
    گیریردیم، آغ-آپپاق یوخوویا،
    چینقی اود قاپدی، چین اوراغیمدان،
    کول اولدو هاوادا،
    توستولدی ایش یئریمیز، قاپاندی قاپیلاری.
    داراق آلتی اولمادی، جهره‌میزه!
    یورولمادان، یوزوملادیق، دورمادیق،
    دؤیوشمه‌دیک، وورمادیم، ساواشمادان،
    یاریشدیق، دارتیندیم.
    دارتیلدیق،
    باریش دئیرمانینین، فیرلانتیسیندا.
    دولدوق، آرپا، بوغدایا
    سامان یئلین اولدو،
    آرپا، خیلین.
    آه… بوغدایا آجی‌دیم، دیری آرپادان آز! بوغدایا…
    آج، آجینا،
    آجینی – آجــــی!
    باغریما باسدیم.
    دووارلار دالیسیندا، کوسدوم، ساری قوسدوم.
    اورت قاپینی…! دئدیم:
    « دولماسین زهَر ائوه »
    موقدس یوغرولان بوغداسی، آدام یئمی،
    اللریم کافیر، آتلی قاچدی بیر تیکه چؤرک،
    قاچار آخی…! هرنه کافیردن.
    آرپا… قورد- قوش پایی،
    قوشلار… تولکولر یئمی،
    قوتور سوروسو ،
    یوخوجولار، سوره یی،
    قوزولار…! قودوز ایت یئمی !
    یئنه… اکیرم،! بیچیرم،! مرد دئیمی!
    ایچیرم درد مئیمی، بیچیرم، هـــر گئیمی!
    و اینسانلار راکت یئمی.
    آجیما سن، منه!
    گل-گل، بوشلا دونیانی،
    بیزیم اوز دونیامیز وار،
    یوخ‌لار – یوخولار دونیاسی!
    دیکسیندیرمه هله! بوشلا دونیانی
    بوش وئر…!
    وئر…! یئر تانریلارینا.
    ……………………….

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *