اوزاق گز، بالا…!
حمید آرش آزاد
دوكتور بويورور: «مين جوره نعمت‌دن اوزاق گز
تاپسان، يئ بيرآز سووزو- چؤره‌ك، ات‌دن اوزاق گز»
ائو صاحيبي، دستور بويورور: «ايل باشا چاتميش
مستأجر آقا! آرتيق اقامت‌دن اوزاق گز»
واعظ بويورور: «پول‌كي وار، ال چيركينه بنزه‌ر
قوي من تالاييم، سن، بالا! ثروت‌دن اوزاق گز»
گئتسه قيزا ائلچي، آناسي تئز وئره‌ر اخطار:
«ائوله ماشينين اولماسا، وصلت‌دن اوزاق گز»
وارلي وئره‌ر احسان، ائله‌ير پوللونو دعوت
سؤيلر فقيره: «گئت، بو ضيافت‌دن اوزاق گز»
آرواد بويورار: «آل منه بير بوللو جواهر
يوخدوري پولون، ائوده محبت‌دن اوزاق گز»
قبره قويولان گون‌ده، «نكير» سؤيله‌يه‌جك‌دير:
دوز سؤيله جواب، يئرسيز حكايت‌دن اوزاق گز»
قبر اوسته گليب گون‌ده، طلبكار دئيه‌جك‌دير:
«بوش چيخدي چكين، بوردادا راحت‌دن اوزاق گز»
قورخوم بودو، محشرده ملايك‌ده بويورسون:
«پولسوزلارا يئر قالمادي، جنّت‌دن اوزاق گز»
گئتسه‌م‌ده بهشته، منه «رضوان» دئيه‌جك‌دير:
«مئيوه يئمه، آرخلارداكي شربت‌دن اوزاق گز»
حوري دئيه‌جك: «بيرجه قاريش‌دير بويون، آنجاق
يورما الي، شومشاد كيمي قامت‌دن اوزاق گز»
چوخلار منه چوخ سؤز دئميش، هم ده دئيه‌جك‌دير
آنجاق دئمه‌ييرلر كي: «فلاكت‌دن اوزاق گز»
تنقيد يازانين، باش- قولاغي ساغ قالا بيلمز
«آرش»! بو مقامات‌لا ظرافت‌دن اوزاق گز!