(لاپ قیسا حئکایه)
داش اوستونده‌یم. دوردوغوم یئرده قرارسیزجا اوتورموشام. نه باشیما فیریلدایان میلچک وار، نه بورنومون یاخینلیغینا دولانان کپنک. کاسیب یئمه‌یی میلچکدن و لاکچری‌لرین ناهاری اولان کپنکدن، هر ایکیسیندن ده یوخسونام. کاسیبلیق پئیسه‌ریمه بیر چیزگی چکمیش. او چیزگی‌دن بیر قاریش آشاغی‌دا، داش اوستونده‌یم. کیمسه بیلمه‌یه‌جک دایاندیغیم یئرده بخته‌ورلیکدن هانسی‌سا بیر گؤله شیرجه ووراجاغام، یوخسا آلتیمداکی داشین سَرتلیییندن اؤزومو بوغماغی دوشونه‌جه‌یم. هر شئی منیم لحظه‌ده‌کی توتدوغوم تصمیمدن آسیلی‌دیر. چیزگی‌لری سوووشماغی دوشونورم. رکوردلاری سیندیرماغی. من کاسیبلیق قهرمانی، میلچکسیز گونلری بیر تَهَر یاشاییرام. یوخسوللوق المپیک‌لرین بیرینجیسی، آجلیق فئستیواللارین، اَن اوجا آتلانان شامپیونو. من بو گؤلون غریب قورباغاسی، من اؤزومون آغاسییام…
۱۴۰۴/۰۵/۱۵
