گیری گیری آختاریردیلار، دونیانین سونونجو میلچه‌یینی. اکوسیستم ده‌ییشمیش، هاوالار داها میلچکلر اوچون اویغون دئییلدی. بییولوژی اوزمانلاری هر دیری میلچه‌یه مینلر دلار تعیین ائتمیشدی. هر یئرده سؤز میلچکدن گئدیردی. تزه شخصیت صاحیبی اولان، مقام تاپیب، قونوم قازانان، دونیانین سونونجو میلچه‌یینی آختاریردیلار. دیری تاپا بیلمک اوچون، بالاجا میلچک‌تاپان سئنسورلو دستگاهلار بئله تاسارلانمیشدی. پیف پاف فابریکالاری ورشیکست چیخیب، پلاسکولارداکی میلچک اؤلدورن نسنه‌لر آنبار اولموشدو. داها یئنی ضرب‌المثللر اورتالیقدا دانیشیلیردی. «وجودون میلچک کیمی کیمیا اولوب!»
ضرب‌المثللر ده ده‌ییشیلمک زوروندا ایدی. داها موزاحیم بیریسینه «میلچکلنمه» دئییلمه‌یه‌جکدی. «سن پوخونو یئمکده اول» سؤیله‌نیلمه‌یه‌جکدی میلچک صیفت و سوءاستفاده‌چی اینسانلارا. داها هر یئرده باشی اوجا ظاهیر اولاجاقدیم. عؤمور بویو میلچک سسله‌نن من.