سوس!.. گلدیم
همت شهبازی

  آوتوبوس دایاناجاغیندا دورموشدوم قولتوغومدا کیتاب، الیمده کی بئش تومن لیک بیلیطی بارماغیما دولاییب آچیردیم. دایاناجاغین آرخاسی گؤزل چمن لیک و چمن لیین اورتالاریندا بیر نئچه آغاج گؤیرمیشدی. بو آغاجلارین کؤلگه سینده آداملار، اؤزللیکله اؤیرنجیلر اوتوروردولار. بو چمن لیین اوزونلوغوندا آرابیر نئچه اسطول دا قویولموش و بو اسطوللارین اوزرینه آغاجلارین کؤلگه سی  دوشموشدو. چمن لیین ایچینده هرگون الینده گونده لیگ اولان بیر نفر اوتوروردو، اونونلا اوتوروب دورانلار دئییردیلرکی؛ «او، دلی دیر». آنجاق اونون گؤزل گئییمی، ساققاللی-بیغلی بَنیزی، قورخونج هئیکلی و بیر ده گونده لیک آلیب اوخوماسی، اونون حاققیندا دئییلن بوتون سؤزلری اینانماسینا گتیریب چیخاریردی. دوغرودور دفعه لرله اونون دلی-سوولوغونو گؤرموشدوم آنجاق باشقا یاندان ایسه، گونده لیک اوخویوب اولایلاردان دانیشماسی آدامی تعجبلندیریردی.

-بعلی، سوس!.. گلدیم.

بو سس منی آرخایا باخماغا مجبور ائتدی. آخی او، آوتوبوسون سسینی ائشیتمکله، چمن لیین اوستوندن قالخیب قیشقیراراق آوتوبوس دایاناجاغینا طرف گلیردی.

هامی آوتوبوسا مینمه یه تله سیردی. من سیرادا دوران آداملارین آخیمییلا آوتوبوسا میندیم. لاپ سونا قالانی من ایدیم. بونا گؤره سوروجونون کناریندا، آوتوبوسون اؤن سیراسیندا آیاق اوستو دوردوم. آوتوبوسون ایچه ریسینده سوروجونون آرخاسیندا اولان بیر دمیر بوروسو اوتورانلاری سوروجو ایله آییریردی.

-بعلی، سوس!.. گلدیم.-دئیه او دلی-سوو، آوتوبوسون سوروجوسونون یانینا چیخاراق بالاجا بیر چارپایی نین اوستونده اوتوردو.

هه..! نه جورسان شیرممد. کئیفین کؤکدی دئیه سن آ- دئیه سوروجو الینی اونون بؤیرونه ووراراق قیدیقلادی. بو آندا او، اوجا سسله و نهایت غضبله «بعلی، سوس!.. گلدیم.»- دئیه سوروجونون باشینا قیشقیردی. اونون قیشقیرماغینا هامی گولدو. آنجاق من آلنیمین قیریشلارینی بیر-بیرینه سیخاراق اونون سؤزونون آردینی گؤزله ییردیم. بیر نئچه ثانیه دن سونرا، اونون سؤزونون آردی اولماماسینی دویاندا، آلنیمین قیریشلاری آچیلاراق آوتوبوسداکی آداملارا قوشولوب من ده آلتدان-آلتدان گولومسه دیم. سن دئمه کی اونون بوتون عؤمور بویو اؤیرندییی ائله بو اوچ سؤز ایمیش.

دوغروسو سوروجو اونون بؤیرونه الینی ووراندا و اونون «سوس!.. گلدیم» سؤزونو ائشیدنده و اونلارین بیر-بیرییله ایلگیلی اولماماسینی دویاندا تعجبلندیم. سن دئمه کی او تکجه بو سؤزلری بیلیرمیش؛ و ان ماراقلیسی بودور کی بو سؤزلری نهایت گوج و غضب ایله دئییردی.

شیرممد بوتون «بازار-ولیعصر» آوتوبوسلاری نین سوروجوسو ایله تانیش ایدی. آخی سوروجولر اونو بو یوللارین اوزونلوغوندا آپاریب گتیریردیلر.

«تپلی باغ» دایاناجاغینا آز قالیردی. شیرممد یئنه ده اوجا سسله تکجه «بعلی» سؤزونو دئیه رک هامی نین دققتینی اؤزونه چکدی. ظنیمجه نئجه قیشقیردیغی نین گوجونه وارسایدی او هئچ زامان بو اوچ سؤزونو ده دیلینه گتیرمزدی.

اونون گور سسی آوتوبوسون ایچینده اولان آداملاری دیسکیندیردی. سوروجو ساعات وورماق اوچون یئره یئندی. بو آندا دایاناجاغین کناریندا بیر قارغی و قارغی نین اوجونا بیر قاتما ایله ساری آلما باغلامیش قیسا بوی و آریق بدن بیر دلی-سوو گؤروندو.

شیرممد اونو گؤرمکله یئنه ده همیشه کی سؤزونو قیشقیراراق سسلندی. او دا قارغیسینی الینده توتوب «ووو، ووو، دیدیت، دیدیت» دئیه رک ماشین سورن آداملار کیمی شیرممده طرف گلدی. شیرممد هله او یئتیشمه دن «بعلی، سوس!.. گلدیم.» سؤزونو تکرار ائتدی.

-دلی، دلینی تاپدی- دئیه آوتوبوسون ایچینده اولان بیر نفرین سسینی ائشیتدیم. بعضی لری، اونلارین بیر-بیریله علاقه سینی گؤره رک گولمه یه باشلادیلار. آنجاق بعضی لری ده «اونو ماشین نان سال یئره» دئیه رک آجیقلانیردیلار.

– «آخی گوناه شوفئرده دی، ائله بیل کی سووغاتدی. نه یه میندیریر مونو بیلمییم؟»- دئیه شیرممدین دلی-سوو دوستو آوتوبوسون کناریندا یولونو آلیب گئتدی.

سوروجو اسطولوندا اوتوراراق یولا دوشدو. ماشینین ایچینده کی او ایکی نفر هله ده بیر-بیریله دانیشماقدا ایدی. اونلار بیر-بیریله یاواش- یاواش دانیشیردیلار، حتتا سسلرینی یاخینلیغیندا اولان آداملار ائله من اؤزوم ده بئله ائشیده بیلمیردیم. گؤز آلتی شیرممدی ایزله ییردیم. او، هردن باشینی قالدیراراق او ایکی نفره هیرسلی-هیرسلی باخاراق سانکی همیشه کی سسی ایله قیشقیرماق ایسته ییردی. اونلار ایسه هله ده اؤز شیرین صحبت لرینه داوام ائدیردیلر. من داها ائشیدیردیم کی اونلار سؤزلرینی توپلومدا گئدن اولایلارلا باغلایاراق توپلومدا اولان بعضی چاتیشمازلیقلاری پیسله ییردیلر؛ و اؤزلری اوچون بیر بؤیوک دوشونجه صاحیبی اولموشدولار. شیرممد بئله ساندی کی اونلار هله ده اوندان دانیشیرلار. بو آندا او، اللرینی گونده لیین اوستوندن گؤتوروب یومروقلارینی توتاراق یئنه ده گور سسی ایله قیشقیردی: « بعلی، سوس!.. گلدیم.»

بو آندا اللرینی گونده لیین اوزریندن گؤتورمکله بالاجا و یئتیشمه میش ایکی بؤیوک نار یئره دوشدو. سونرا بیلدیم کی بو نارلاری همیشه گونده لیین آلتیندا ساخلاییرمیش.

شیرممد داها اؤزوندن چیخمیشدی. ایسته ییردی کی آرادا اولان دمیر میله لری گؤتوروب او ایکی نفری وورسون. ائله هیرسلنمیشدی کی هئچ بیر کیمسه اونو ساخلایا بیلمیردی. سوروجونون باشینا قیشقیردی. سانکی سوروجو اونون داورانیشینا تانیش اولان کیمی بو دفعه او دا قورخاراق آوتوبوسو یولون کناریندا ساخلایاراق یالوارماغا باشلادی.

آنجاق بو ایشلردن کئچمیشدی. او، ایکی نفرین اوستونه دارتینیردی. ایکی نفر ایسه، گاه سوروجونون، گاهدان دا شیرممدین باشینا قیشقیریردی. ایندی شیرممده گولن بوتون آداملار آرتیق اوندان هویوخلانماغا باشلامیشدیلار. بونلار اونو بو دورومدا گؤرن کیمی ایکی نفری ساکیتلشدیرمه یه چالیشیردیلار. ایش اورا یئتیشدی کی اونو ساکیتلشدیرمک اوچون ایکی نفرین بیرینی، آوتوبوسدان دوشمه سینه راضی ائتدیلر. آوتوبوسون قاپیسیندان دوشن زامان شیرممد –هله اونون ال-قولونو توتماقلارینا باخمایاراق- اونون اوستونه جوماراق باشینا بیر یومروق دا ووردو. هله ایسته ییردی اونون آرخاسینجا گئتسین، آنجاق سوروجو قاپی نین دویمه سینی ووراراق باغلادی. سوروجو و ماشیندا اولان آداملار شیرممدی ساکیتلشدیرمه یه چالیشیردیلار. نهایت بیر تَهر ساکیت اولدو.

آخیر کی اؤز مقصدیمیزه یئتیشدیک. هامی دوشدو. او ایکی نفرین بیریسی، مئیداندا اولان پولیس ماشینینا طرف گئدیردی. شیرممد ایسه ماشیندان دوشمه میشدی. او سوروجو ایله  دانیشماغا مشغول ایدی کی بیر پولیس گلیب هم شیرممدی و هم ده سوروجونو پولیس اداره سینه آپارماسینی ایسته دی. شیرممد ایسه، پولیسی گؤرمکله یئنه ده گور سسی ایله:

-«بعلی، سوس!.. گلدیم».