بوگون دیکدابان خانیم سحرین آلاتورانیندا، جین وورموشلار کیمی یاتدیغی یئردن دیک آتیلیب دیکدابانینی یاغلاییب چکدی آیاغینا. اوجا سسله اؤزو اؤزونه: “بوتون قاپی- قونشوموز، ساغیمیز- سولوموز بایرام توزونو تؤکدو چیخدی یانا” دئدی ” هله بیزیم توزوموز تورپاغیمیز اوستوموزده باشیمیزدا قالیب کی قالیب. آی جانیم بو جان کی مندن چیخمالیدی، قوی ائله بوگون جانیمی آلیم دیشیمه، قاتلاشیم ایشیمی گؤروم داینا” و ال ائلهدی تور سوپورگهسینه. اونو دا دئییم ها، دیکدابان خانیم دابانینین دیکلییینی بو تور سوپورگهسینین اوزونلوغونا قاتاندا ائو بوجاغینین قوروم قاراسی ندی، لاپ گؤی اﯙزونون قارا بولودلارینی دا سیلیب سوپوره بیلر آجیغی توتسا.
هه… دیکدابان سوپورگهنی گؤتوروب تاواندا تور- توز باسمیش بوجاغا توشلاییب هؤرومجهیین توخودوغو شئیطان تورولارینی بولدیزئر کیمی یئرلی دیبلی سؤکمهیه باشلاماق ایستهدیکده گؤردو خئیر، دوردوغو یئردن ایینه اوجویجا دَبرمهیه قادیر دهیی. ها گوجندی، ها وورنوخدو، ترپشنمهدی. ائلهبیل قول قانادیندان داش قیفیللار آسلانمیشدی. بیرداها گوجندی، بیرداها دارتیندی، گؤردو نه الی اؤزونوندو، نه آیاغی. دیکدابانی خوف گؤتوردو. باغیرماق ایستهدی، گؤردو دیلی آغزیندا دولانمیر. بوغازینا قورقوشوم اریتمیشدیلر ائلهبیل. دای بونو یئیه بیلمزدی دیکدابان. آخی او، سایری واختلاردا دا، حتا اؤز- اؤزونه دانیشاندا دا اوجا- اوجا دانیشاردی. یاستیدابان اَری نئچه یول اونو تپرله میشدیکی: ” ائله آروادین انگی ایشلیر هاااا… آت باشوندان آرواد بو اؤز- اؤزووه دانیشماغیوی، جاماعاتی اؤزووه گولدورمه! ”
_” آی کیشی کیمه نه وار “دیکدابان دئمیشدی” فیکیرلریم باشیما اوجا سسنن گلیر. کئفیم بئله چکیر، بوی ی ی … اؤز ائویمده ده قویمییاجاقسان؟ کئفیم چکیر ائی ی ی بئله نه دئییرسن؟”
_”آلله آمان آرواد الیندن…” یاستیدابان دئمیشدی ” قازان قابلاماینان دانیشیر، سوی نان چؤرهینن دانیشیر، سوپورگه ینن دانیشیر، قلم کاغیذنان دانیشیر، ایشه قالمیشیق هاااا…”
بوتون تفاهملی اَر آروادلار کیمی دیکدابانلا یاستیدابانین دا بئله- بئله کئف گئتدیلری چوخ اولاردی. بیزیم نه ایشیمیزه؟
هه… دیکدابان قالمیشدی دارتینا دارتینا. جانییلا اللشیردی. قورو دیرک کیمی یئره سانجیلمیشدی ائلهبیل. بوغازی تیخانمیشدی. دیکدابان، دیکباش، دیکباخیش اولاسان، آما نه باغیرماغا نه ده ترپشمهیه گوجون اولمایا؟ گؤرونموش بیر شئی دئییلدی دیکدابان خانیمین تاریخینده بو. ایندی ده بایرام توزو تؤکه- تؤکه لاپ بئله اورهک ائویندن اؤزو- اؤزونه دانیشیب دئیینمهیی توتموشدو، اودا کی بئله اولموشدو.
زور بالله، بیر تهر باشینی اَییب اوست باشینا باخدی. نه گؤرسئیدی یاخشییدی؟ شیریم- شیریم هؤرومجک تورو ایدی کی اوست باشیندان آسلانمیشدی. هؤرومجکلر، تور آتانلار، شئیطان تورولار قوشون- قوشون بوتون بور بوجاقلاریندا پؤهره لنیردی. ال قاتدی باغیرا کی: ” بوی باشی داشلی جانیم، بو نه اویوندو منیم باشیما گلدی، هاچاندان بئله اولموشام خبریم اولماییب” گؤردو خئیر، جانی چیخیر سسی چیخمیر. گون اورتا اولموشدو، بیرده گؤردو اَری قولتوغو دولوسو تره – تورهیله گیردی ائوه: “جانیم دیکدابان” دئدی ” بویون ایشین- گوجون چوخدور، پیشمیشیمیزین یانیب کوله دؤنمهسی باشی اوستوندهدی، اونا گؤره چیققان آش گؤیو آلدیم کی، بیرآز دووغا پیشیرهسن. نه یانماسی وار، نه ده قازان دیبی سورتمهسی. سن ده راحات بیز ده راحات” دئییب و قولتوغونداکی گؤیو میطباغا قویوب، هاوایا چیتمک آتا-آتا دیکدابانا ساری دؤندو. بو حئینده دیکدابان ائله دریندن ایچینی چکیب اودغوندو کی، نفسی دوز دابانینا دَییب دوداغینا قاییتدی. هاندان هانا اؤزونه گلدی. دیلی بیردن آچیلدی:
“ددهمین خئیری اولسون!”، دئدی، ” کیشی نین اوغلو!، منیم باش قاشیماغا ماجالیم وار هئش ائوین ییخیلماسین؟… هله بیر دَریز آش تَرهسی ده ووروب قولتوغووا نیققانا نیققانا گتیریبسن… به گؤرمورسن نه کؤکده‌یم؟”
یاستیدابان قاغا دیکدابان خانیمی او کؤکده گؤردوکده دیلی دولاشیب اؤزونو ایتیردی:” بئله قادالارین گلسین قویون- قوزولاریمیزا دیکدابان!” دئدی ” سنه نه گلدی گؤزومون ایشیغی؟ سن دوشمانا دیدیلن دئییلدین آخی.”
دیکدابان تؤشکویه تؤشکویه شئیطان تورولارینی اوست باشیندان دیدیشدیره دیدیشدیره چیخدیکی:
” خبرین یوخدی خبردن کیشی. آلله منی سنه تزه دن وئردی… دئمه ائودن قاباق اؤزومو قوروم باسیبمیش. سحردن اَللشیرم آنجاق اؤز قورومومو آزجانا تؤکه بیلمیشم. هله سن یاخجی گونومو گؤرورسن. بوتون بور- بوجاغیم شئیطان تورو ایدی اِ شئیطان تورو…” و بیردن بیره گؤزلرینی بَرهلدیب یاستیدابانا ساری یویوردو:
“بوی، کیشی سن مندن ده پیس گونده سن کی! بو هؤرومجکلرین آلتیندا نئجه نفس آلابیلیرسن؟” سونرا تور سوپورگهسینی آلیب دوشدو یاستیدابانین جانینا : ” سن اؤزونسن یاستیدابان؟ دیللن گؤروم. باشیما خئیر، کیشی نین هئش تانینمالیسی قالماییب. بوی ی ی… بیزه بو داش هاردان دهیدی بیلمهدیک. بو نه اویون، بو نه پستاه دی بیزیم باشیمیزا گلدی. کیم بیزیم تیفاغیمیزا سوخولدو. کیم بیزیم جیلدیمیزه گیردی. کیم بیزه اویون اوینادی. کیم بیزیم اوجاغیمیزی سؤندوردو. کیم بیزیم آشیمیزا سو جالادی. کیم بیزی بادادی. کیم بیزه جله قوردو. کیم بیزی اویناتدی. بیزی کیم یازدی، کیم پوزدو. یوخولاریمیزی کیم یوزدو… کیم بیزی… کیم … کیم بیزه… کیم …