غصه/ آنتووان چئخوف- چئویرن: ش. آغایف
چئویرن: ایشیق
ترجمه: ایشیق
ایشیق
00:00
00:00

ch
غصه
آنتووان چئخوف- چئویرن: ش. آغایف

     «دردیمی کیمه دئییم؟»                                     

                            زبور

   آخشام توران قوووشموشدو. ایری سولو قار پارچالاری یئنی یانمیش فنرلر، اطرافیندا تنبل- تنبل فیرلاناراق نازیک و یوموشاق لایلارلا داملارین اوستونه، آتلارین بئلینه، آداملارین چییینلرینه و پاپاقلارینا تؤکولور. فایتونچو «ایونا پوتاپوف» باشدان آیاغا خیال کیمی آغ- آپباغ‌دیر. او جانلی آدامین اییله بیله‎جه‎یینه قده‌ر بئلینی دیره‌ک قوزالادا اوتورموش و ترپنمیر. بؤیوک بیر قار قالاغی بئله اونون اوستونه دوشسه ده یقین کی، یئنه قاری اؤز اوزه‌ریندن سیلکه‌لمه‌یی لازیم بیلمز. اونون آت‌جیغازی دا آغ و حرکت‌سیزدیر. اؤز حرکت‌سیزلییینه و دوم- دوز آیاقلاری ایله بو آت‌جیغازلارا اوخشاییر. احتیمال کی، آت دوشونجه‌یه دالمیشدیر. کوتان‌دا عادت ائتمیش اولدوغو بوز منظره‌لردن آیریلیب، بورایا عجاییب اودلارلا، آراسی کسیلمه‌ین گورولتو و قاچیشان آداملارلا دولو گیردابا دوشن‌لر دوشونمه‌یه بیلمز… «ایونا» و اونون آت‌جیغازی خئیلی واخت‌دیر کی، یئرلریندن ترپنمه‌ییبلر.

   اونلار ناهاردان چوخ قاباق حیطدن چیخمیشلار، لاکین سیفته وئر‌ن یوخدور کی، یوخدور. بودور شه‌هرین اوزه‌رینه آخشام تورانی چؤکور. فنر ایشیقلاری‌نین سولغون رنگی دییشیب، جانلانیر. کوچه‌ده حرکت، سس- کوی چوخالیر. ایونانین قولاغینا سس گلدی:

_ فایتونچو، ووبوروق کوچه‌سینه!… فایتونچو!

 ایونا دیکسینیر و قاردان بیر- بیرینه یاپیشمیش کیرپیک‌لری آراسیندان باشلیقلی شینئل گئیمیش بیر حربی خیدمت‌چی گؤرور.

_ «ووبوروق» کوچه‌سینه دئیه، حربی خیدمت‌چی تیکرار ائدیر- سن یاتمیسان نه‌دیر؟ «ووبوروق» کوچه‌سینه!

   راضی‌لیق علامتی اولاراق ایونا جیلوولاری چکیر. آتـین بئلیندن و اونون اؤز چییین‌لریندن لوپا- لوپا قار تؤکولور. حربی خیدمت‌چی خیزه‌یه ایله‌شیر. فایتونچی دوداقلارینی مارچیلداداراق بوینونو اؤردک کیمی اوزادیر. یئرینده دیکه‌لیر و احتییاج‌دان داها چوخ، آت‌جیغازدا بوینونو اوزادیر. اوزون آغاجا بنز‌ر آیاقلارینی اییر و ایستر- ایسته‌مز یئریندن ترپه‌نیر…

ایلک آددیم‌لاردان «ایونا» قارانلیق و ایره‌لی- گئری حرکت ائد‌ن ازدحام ایچه‌ریسیندن سس‌لر ائشیدیر:

_ هارا سورورسن قولئیبانی؟ شئیطان سنی هارا چکیر؟ ساغدان گئت!

_ سن سورمک باجارمیرسان؟ ساغا سور!- دئیه حربی خیدمت‌چی حیرص‌لنیر. هر طرفی اؤرتولو بیر فایتونون سوروجوسو دئیینیر. یولو کئچرکن چییینینی آتـین باشینا توخونان بیر باشقاسی قوللاریندان قاری سیلکه‎له‎ییر و حیرصلی- حیرصلی باخیر. ایونا اوستونده اوتورموش کیمی قوزالاردا قوردالانیر. دیرسک‎لری ایله اطرافینی دومسوک‎له‎ییر. بوخار وورموش آدام کیمی گؤزلرینی قیییر، سانکی هارادا اولدوغونو و نه اوچون بورایا دوشدویونو آنلایا بیلمیر.

– نه اجلاف‎دیر- دئیه حربی خیدمت‎چی اونا سوز آتـیر. ائله بیل کی، قصد‎ن سنینله توققوشماغا و یا آتـین آلتـینا دوشمه‎یه چالیشیر. یقین دیل بیر اولوبلار. ایونا دونوب سرنیشینه باخیر و دوداقلارینی ترپه‎دیر. بیر شئی دئمک ایسته‎دییی گؤرونور آنجاق بوغازیندان خیریلتی‎دان باشقا هئچ نه چیخمیر. نه وار؟ دئیه حربی خیدمت‎چی سوروشور.

ایونا گولومسه‎یه‎رک آغزینی اییر، بوغازینا گوج وئره‎رک خیریلداییر.

_ آغا، منیم بو هفته… اوغلوم اولدو.

_ هم… ندن اولدو؟

ایونا بوتون گؤوده‎سی ایله سرنیشینه چئوریله‎رک دئییر:

_ کیم بیلیر، یقین کی، قیزدیرمادان، اوچ گون خسته‎خانادا یاتدی، سونرا…سونرا اولدو…

ـ آللاهین امری‎دیر.

_ دونده‎ر ایبلیس- دئیه قارانلیقدا سس‎لر ائشیدیلدی- یولوندان چیخمیسان، نه‎دیر؟ قوجا کؤپک- گؤزلرینی آچ!

_ سور- سور- دئیه سرنیشین دیلله‎نیر- بئله یئریش‎له بیز صاباحا کیمی چاتا بیلمه‎ریک. قوو آتی!

   فایتونچو یئنه بوینونو اوزادیر. بیر قده‎ر یئریندن قالخیر. آغیر بیر اینجه‎لیکله قامچیسینی یئل‎له‎ییر. سونرا بیر نئچه دفه دونوب، سرنیشینه باخیر، لاکین او گؤزلرینی یومموشدور. یقین کی، دینله‎مک هوسینده دئییلدی. ووبوروق کوچه‎سینده سرنیشینی دوشوروب آش‎خانا قاباغیندا فایتونو ساخلاییر. قوزالادا اییلیر و یئنه ده ترپنمز اولور… سولو قار یئنه ده اونو و آت‎جیغازی آغارتماقدا داوام ائدیر. بئله‎جه بیر-ایکی… ساآت کئچیر. اوچ نفر جاوان اوغلان قالوشلارینی برک‎دن شاپپیلداداراق سویوشه- سویوشه سکی ایله کئچیر. اونلارین ایکیسی اوجا بوی و نازیک، اوچونجوسو ایسه بالاجا و قوزبئل‎دیر.

_ فایتونچو، پولیس کورپوسونون یانینا!- دئیه. قوزبئل جینگیلتی‎لی سسله چیغیریر:

_ اوچوموزو بیر عابباسیئیا!

   ایونا جیلوولاری چکیر و آغزینی مارچیلدادیر. بیر عابباسی او قده‎ر ده موناسیب بیر قییمت دئییلدیر. آنجاق ایندی او قییمته باخماییر… اونون اوچون ایندی بیر ماناتلا بیر شاهی‎نین فرقی یوخدور، تکی سرنیشین اولسون… جاوان اوغلانلار بیر- بیرینی ایته‎لیه- ایته‎لیه و نالاییق سوزلر دئیه- دئیه یاخینلاشیر و اوچو ده بیردن خیزه‎یه سوخولور. اوچوندن هانسی بیریسی آیاق اوسته دورماسی و هانسی ایکیسینین ایله‎شمه‎سی مسله‎سی موذاکیره اولماغا باشلاییرلار. اوزون صوحبت‎دن، شیلتاق و مذمتدن سونرا بئله قرارا گلدیلر کی، قوزبئل هامیدان بالاجا اولدوغو اوچون آیاق اوسته دورسون.

_ قوو گوره‎ک.! دئیه، آیاق اوسته دوروب نفسینی ایونانین دوز پئیسرینه پوسکورن قوزبئل جینگیلده‎ییر. – قامچیلا … آمما پاپاغین لاپ قییمت‎لی‎دیر ها.

_ قارداش بوتون پئترزبورگ دا بوندان پیسینی تاپانمازسان.

_ ها.. ها..- دئیه ایونا قاققیلداییر- اولانیم بودور.

_ من ده، ائی، اولانیم بودور. – آتی قوو. بوتون یولو بئله‎می سوره‎جکسن.، هه؟ یوخسا پئیسرین یوموروق ایسته‎ییر؟…

اوزون بوی‎لاردان بیری:

_ باشیم چاتلاییر،- دئییر، دونن دوکماسو گیلده واسکا ایله ایکیمیز دورد شوشه کونیاک ایچدیک.

_ باشا دوشمورم کی، یالان دانیشماغین نه معناسی وارمیش!- دئیه- او بیری اوزون بویلو حیرصله‎نیر.- حئیوان کیمی یالان دئییر.

_ آللاهین غضبینه گلیم کی، دوزدور…

_ بلی… بیتین اوسکورمه‎سی کیمی بیر حقیقتدیر.

_ هئی- هئی- ایونا هیریلداییر- کئفجیل اوغلاندیر.

_ توف سنی لعنته گله‎سن- دئیه- قوزبئل اوزوندن چیخیر:

_ ائی کافتار آزار توتموش. بیر دیء گوروم سوره‎جکسن یا یوخ؟ بئله آت سوره‎رلرمی؟ قامچیلاسانا آتی هئی ایبلیس. بیرده… یاخشی- یاخشی وور.

 ایونا قوزبئلین بده‎نینین ییرغالانماسی‎نی و اونون تیتره‎ک سسینی اوز آرخاسیندا حیس ائدیر. او اوستونه یاغدیریلان سویوشلری ائشیدیر. اینسانلاری گؤرور و یالقیزلیق حیسّی یاواش- یاواش قلبیندن چکیلمه‎یه باشلاییر. قوزبئل او قده‎ر سؤیور کی، آخیردا آلتی مرتبه‎لی دولاشیق بیر سؤیوش‎دن بوغازی توتولور. آز قالیر کی، اؤسکورک‎دن بوغولسون. اوزون بویلولار نادیژدا پتروونا آدلی کیمینسه باره‎سینده دانیشماغا باشلاییرلار. ایونا دؤنوب اونلارا باخیر- بیرآز ساکیت اولمالارینی گؤزله‎یندن سونرا دونوب بیرده باخیر.:

_ منیم ده بو هفته بیر اوغلوم اولدو- دئیه.، دونقولداییر.

_ هامی‎میز اؤله‎جه‎ییک- دئیه، قوزبئل اؤسکورک‎دن سونرا دوداغینی سیلیب، آه چکیر- دی سور، سور گؤره‎ک! آغالار من داها بئله دؤزه بیلمه‎رم.

_ او بیزی نه واخت آپاریب چاتدیراجاقدیر؟

_ یونگولجه بیر پئیسرینه ایلیشدیریب اونو بیر حرکته گتیرسنه!

_ کافتار آزار توتموش، ائشیدیرسنمی؟ قیرارام بوینون ها… سیز ائله مخلوق‎سونوز کی، نازینیزی چکمک‎دنسه بیر یوللوق پییادا گئتمک یاخشی‎دیر.

_ ائشیدیرسنمی؟ ایلان وورموش یوخسا بیزیم سوزوموز وئجینه دئییل؟

ایونا پئیسرینه وورولان سیلله‎نین ضربه‎سینی حیسّ ائتمک‎دن آرتـیـق اونون سسینی ائشیدیر.

_ هئی- هئی …. کئفجیل آغالار… آللاه سیزی سالامات ائله‎سین.

_ فایتونچو، سن ائولی‎سنمی؟- دئیه اوزونلاردان بیری سوروشور:

_ منیم آروادیم ایندی قارا تورپاقدادیر. هئی- هئی… یعنی قبیرده‎دیر- اوغلو دا تزه اولدو. من ایسه ساغام… قریبه ایشدیر:

_ اؤلوم قاپینی دییشیک سالمیشدیر: منیم یانیما گلمک عوضینه اوغلومون اوستونه گئدیر…

   ایونا اوغلونون نئجه اؤلدویونو ناغیل ائتمک اوچون چئوریلیر، لاکین او سؤزه باشلامامیش، قوزبئل یونگولجه آه چکیر. آللاها شوکور، چاتدیقلارینی بیلدیلر. ایونا عابباسینی آلیب اوزون موددت تا اونلار قارانلیق دروازادا گؤزدن ایته‎نه قده‎ر اونلارین دالینجا باخیر. او یئنه ده یالقیزدیر. اونون اوچون یئنی‎دن سوکوت باشلاییر. آز موددت اوچون ساکیت اولموش غصه یئنی‎دن باش قالدیریر و اونون اوره‎یینی داها آرتـیق گمیرمه‎یه باشلاییر. ایونانین تلاش و اضطیرابلا دولو گؤزلری کوچه‎نین هر ایکی طرفیندن حرکت ائدن ایزدیحاما تیکیلیر. گؤره‎سن بو مینلرجه آدامین ایچه‎ریسینده اونون دردینی دینله‎یه بیله‎جک هئچ اولماسا بیر نفر تاپیلارمی؟ لاکین نه او، نه ده اونون غصه‎سی بو قاچیشان آداملارین وئجینه دئییل، اونون غصه‎سی بؤیوک و سونسوزدور. اگر ایونانین سینه‎سی یاریلیب، غصه‎سی چؤله تؤکولسه، یقین کی، دونیانی دولدورار. آنجاق بونونلا بئله او گؤرونمور، او ائله بیر همییت‎سیز قابیغا بورونه‎ بیلمیشدیر کی، گوندوز چیراقلاردا اونو گؤرمک اولماز…

   ایونا الینده باغلاما اولان دالانداری گؤرور و اونونلا دانیشماغی قرارا آلیر.

_ عزیزیم ایندی ساعآت نئچه اولار؟- دئیه سوروشور.

_ اونا ایشله‎ییر، بورادا نییه دایانمیسان؟ سور گئت.

   ایونا بیر نئچه آددیم ایره‎لییه سوردو. بئلینی اییر و یئنی‎دن غصه‎یه دالیر. اینسانلارا بیر آغیر حیسّ ائد‎ن بیر آدام کیمی بئلینی دوزلدیر. باشینی سیلکه‎له‎ییر و جیلوولاری چکیر…حالی چوخ خارابدیر. او داها تاب گتیره بیلمه‎ییر. حیه‎طه دوغرو- دوشونور- حیه‎طه.

   آت‎جیغازدا ائله بیل اونون فیکرینی دویموشدور. یورغا قاچماغا باشلاییر. ساعآت یاریم کئچندن سونرا ایونا آرتـیق سوبانین یانیندا ایلشمیشدیر. سوبانین اوستونده دؤشه‎مه سکامییالارین اوستونده جاماعات خورولداییر. هاوا چوخ کثیف‎ و بورکودور. ایونا یاتانلارا باخیر، باشینی قاشیییر و ائله- بئله تئز قاییتماسینا تأسّوف ائدیر.

_ یولاف پولو دا چیخارا بیلمه‎دیم.- فیکیرلشیر- ائله- بلا بوراسیندادیر. البتّه آدام اؤز ایشینی بیلنده، اؤزو ده, آتی دا توخ اولاندا همیشه راحات اولور…

کونج‎لرین بیریندن گنج بیر آرپاچی قالخیر. یوخولو- یوخولو هیققیلدایاراق سو وئدره‎سینه دوغرو یونه‎لیر.

_ سو ایچمک‎می ایسته‎ییرسن؟- دئیه ایونا سوروشور.

_ معلوم ایشدیر کی[ایسته‎ییرم].

_ هـ … نوش اولسون… آنجاق قارداش، منیم اوغلوم اؤلوبدور… ائشیدیب‎سن‎می؟ بو هفته خسته‎خانادا… اوزون احوال‎دیر. ایونا باخیر و سؤزلری‎نین نه جور تأثیر باغیشلادیغینی گؤرمک ایسته‎ییر. لاکین هئچ بیر شئی سئزمیر. گنج یورغانی باشینا چکه‎رک یوخویا گئتمیشدیر. قوجا آه چکیر و قاشینیر. گنج سو ایچمک ایسته‎دییی کیمی او دا دانیشماق ایسته‎ییر. اوغلونون اؤلوموندن  بیر هفته کئچیر. لاکین او هله هئچ کسه دویونجا دانیشمامیشدیر. او آغیللی- باشلی، یئرلی- یئرینده دانیشمالیدیر. اوغلونون نه‎جور خسته‎لندییی، نئجه عذاب چکدییینی، جان‎وئرمزدن قاباق نه‎لر سؤیله‎دییینی و نئجه اؤلدویونو ناغیل ائتمک لازیم‎دیر. قیزی آنیسییا کندده قالمیشدیر… اونون دا حاققیندا دانیشمالی‎دیر. اونون ایندی او قده‎ر دانیشیلاسی سؤزو واردیر کی!… اونا قولاق آسان آه چکمه‎لی، اونا آجیمالی و اونا دوعا اوخومالی‎دیر… آروادلارلا دانیشماق داها یاخشی‎دیر. اونلار آخماق اولسالار دا، ایکی‎جه کلمه سؤز دئیه‎ن کیمی هؤنکورمه‎یه باشلاییرلار.

 _ گئدیب آتا باخماق لازیم‎دیر. سونرادا یاتماق اولار… یوخو قاچماییر کی،… ایونا گئیینیب تؤوله‎یه آتـی‎نین یانینا گئدیر. او یولاف حاققیندا، اوت حاقیندا، هاوا حاققیندا فیکیرلشیر. او تک اولاندا اوغلو حاققیندا دوشونه بیلمیر. همیشه اونون باره‎سینده باشقاسی ایله دانیشا بیلر.

   آنجاق اؤزلویونده اونون باره‎سینده فیکیرلشمک، اونون شکیلینی اوز خاطیره‎سینده جانلاندیرماق قورخونج و دؤزولمز بیر دردیر.

 _ گؤوشه‎ییرسن؟- دئیه، ایونا آتی‎نین پاریلدایان گؤزلرینی گؤرن کیمی سوروشور، گؤوشه، گؤوشه…. ایندیکی یولاف پولو قازانا بیلمه‎دیک، اوت یئیه‎ریک…بلی… من قوجالمیشام. داها سوره بیلمیرم… اوغلومون سورمک واختی ایدی، منیم یوخ… اوندان اصیل فایتونچو چیخاردی… تکی یاشایایدی…

   ایونا بیر قده‎ر سوسور. سونرا یئنه داوام ائدیر:

 _ بلی منیم عزیزیم، مایدان آت… کوزما اییونیچ داها یوخدور… عؤمورونو بیزه تاپشیردی… ناحاق یئره اؤلدو گئتدی… ایندی فرض ائده‎ک کی، سنین بیر دایچان وار و سن اونون دوغما آناسی‎سان. دئیه‎ک کی، بیردن او اؤلدو گئتدی و عؤمورونو سنه باغیشلادی… آخی یازیق‎دیر. دئییل‎می؟

آت‎جیغاز قولاغینی شکله‎ییب، گؤوشه‎ییر و نفسی ایله صاحیبی‎نین الین ایسیندیریردی. ایونا اؤزونو اونودور و هر شئیی اونا ناغیل ائدیر.

ایضاح:

  • آنتون پاولوویچ چِخوف (به روسی: Анто́н Па́влович Че́хов)‏ ‏ (۲۹ ژانویه ۱۸۶۰ – ۱۵ ژوئیه ۱۹۰۴) داستان‌نویس و نمایش‌نامه‌نویس برجستهٔ روس است.هر چند چخوف زندگی کوتاهی داشت و همین زندگی کوتاه همراه با بیماری بود اما بیش از ۷۰۰ اثر ادبی آفرید. او را مهم‌ترین داستان کوتاه‌نویس برمی‌شمارند و در زمینهٔ نمایش‌نامه‌نویسی نیز آثار برجسته‌ای از خود به جا گذاشته‌است و وی را پس از شکسپیر بزرگترین نمایش نامه نویس میدانند. چخوف در چهل و چهار سالگی بر اثر ابتلا به بیماری سل درگذشت.(وک
  • بو حکایه‌نی “ش.آغایف” آذربایجان دیلینه چئویریب و بازیچی “نریمان ناظیم”‌ابسه اونو عرب الیفباسینا کؤچوروبدور.
اشتراک گذاری در print
چاپ
اوخوماق زامانی: 6 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

غصه/ آنتووان چئخوف- چئویرن: ش. آغایف

ایشیق
www.ishiq.net

آذربایجان ادبیات و اینجه‌صنعت سایتی