اوخوماق زامانی: 4 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.


گول دسته
سی
گنجعلی صباحی

۱۳۲۶-نجی ایلین باهاری‎ ایدی. داریخما منه ال وئردیییندن قصبه‎نین اطرافینا گزمه‎یه چیخمیشدیم. قات- قات اوجالان سیار داغلارین قوینوندا یئرلشن «مظفّر قالاسی»نین طبیعت گؤزل‎لییی اینسانین روحونو اوخشاییردی. داغلارین اته‎ییندن شاریلتی ایله آخیب، اینسان عؤمرو کیمی گئدن چایلارین همهمه‎سی، هر طرفده قایناییب قالخان دورو بولاقلارین زمزمه‎سی، حزین- حزین اسن یئلدن، رقصه گلن یارپاقلارین پیچیلتی‎سی، آزاد قوشلارین بوداقدان- بوداغا سیچرایاراق، سئوینجله دولو، شیرین نغمه‎لری، منی اوز غم- خیال دونیامدان آییرمیش، گول چیچکلرین عطری توتغون شراب تک منی مست ائتمیشدی. هر طرفه اوز دؤندرسن، طبیعت اؤز گوزل‎لییی ایله اینسانین اوزونه گولوردو.

گزه- گزه گلیب ایلدیریم بولاغی‎نین  باشینا یئتیشدیم. یورولموشدوم، ال- اوزومو یودوم. بولاغین کناریندا اوتوروب، یئرین سینه‎سیندن گؤز یاشی کیمی قایناییب قالخان دورو سویا تاماشا ائتمه‎یه باشلادیم. ندنسه، یئنی‎دن غم لشکری منه هجوم ائتدی. اوره‎ییم دولغون بولوت کیمی توتولدو. اوز ائل- اوبام، وطنیم یادیما دوشدو. ایندی اورادا طبیعت اؤز دونونو دییشیب، دوزلر، یاماجلار آل یاشیلا بورونوب، هر گولون اوزه‎رینده بیر بولبول جهجه وورور. چؤللرده قویون سورولری، قوزولار مله‎شیر. چوبانین چالدیغی یانغیلی توتک سسی داغ- دره‎لره یاییلیر. باهار، هر یئره باهاردیر. آنجاق منیم وورغون کؤنلوم وطنیمین یازینی آرزولاییر. آخی، من اونون قوینوندا بویویوب، بویا چاتمیشام. تورپاغی‎نین هر آددیمیندا سئوگی، سئوینج، کدرلرله دولو خاطیره‎لریم واردیر. هر شئی دن اوستون سئوگیلیم ده اورادادیر. او، گؤزو یولدا منی گؤزله‎ییر. آیریلیق دردینی کیم بیلمیر؟…

اوره‎ییم توفانا توتولموش دنیز کیمی تلاطومه گلمیشدی. داها طبیعت گؤزل‎لیکلرینی گؤرموردوم. روحوم قوشو وطن دیاریندا پروازا گلمیشدی. اونون خیالی گؤزومون اؤنونده جانلانیردی. او دا منیم کیمی پریشان، سولغون، توتغون، دولغون گؤرونور. او دا هیجران اودونا یانیردی. آمان آللاه!… نه قده‌ر دؤزولمزدیر!…

ایکی الیم ایله باشیمی توتدوم. سانکی بونونلا بئینیمده عمله گلمیش فیرتینانی ساکیت ائتمک ایسته‎ییردیم. سون گؤروشوموزدن آلتی آی کئچردی. آیریلیق دقیقه‎لرینده اوز وئرن هیجان، گؤز یاشلاری، اومیدسیز باخیشلار بیر- بیر گؤزومون اؤنونده جانلاندی، بوتون وارلیغیمی سارسیلتدی.

بویله بحرانلی بیر حالدا ایکن، محبّتله دولو اینجه بیر سس:

– آغا، سالام!… دئیه منیم دادیما چاتدی. قورخونج یوخونون وحشتیندن اویانان آدام کیمی اؤزومه گلدیم، قارشیمدا اون- اون ایکی یاشلاریندا، قیوریم ساچلی، آیاق یالین بیر قیزی‎ گؤردوم. او ‎الینده بیر دسته گول قاباغیمدا دایانمیشدی. قارا- ایری گؤزلرینده مهر- محبّتله دولو وحشی بیر باخیش وار ایدی.

– من بو گولو‎ سنه درمیشم- دئیه گول دسته‎سینی منه اوزاتدی. من شاشقین بیر حالدا گولو آلدیم. او، سئوینه‎رک گوللرله بزه‎نمیش اوتلاری یاراراق دلی جئیران سیچراییش‎لاریلا اوزاقلاشدی. من اونو تانیدیم. الیمده‎کی گول دسته‎سینه تاماشا ائتمه‎یه باشلادیم. نرگیز، بنؤوشه و سایره… رنگ‎به‎رنگ گوللرین آراسیندا یئرلشدیریلمیش ایکی دنه لالا گولو بو دسته‎نین گوزل‎لییینی تامام‎لامیشدی. بو گول دسته‎سی معصوم بیر قلبده چیچک‎له‎نن پاک بیر عشقین ترنّومو قده‌ر دانلیغین ایفاده‎سی ایدی.

گول دسته‎سینه تاماشا ائتدیکجه، اونون آل، ساری، قیرمیزی، بنؤوشه چیچکلری‎نین یارپاقلاری خاطیره دفتریمین ورقلرینه چئوریلدی.

٭٭٭

بو گونکو کیمی یادیمدادیر، قیش ایدی. قار، عظمتله اوجالان داغلاری توتسادا هله الشتر دوزلرینه آغ اؤرپه‎یینی سره بیلمه‎میشدی. بهمن آیی‎نین اوچو ایدی. آخشام طرفی بیردن آغ- قالین بولوتلار رقصه گله‎رک گؤی اوزونو توتدو. سویوق- سازاق، قارشی‎سینا گله‎نی قامچی‎لاییب قوووردو. هاوا قارالدیقجا سویوق داها دا اوزونو گوستریر، قار- بوراندان خبر وئریردی. بیز ده دؤرد نفر یولداش، قالانمیش دووار بوخاری‎سی‎نین دؤوره‎سینه یـیغیلمیشدیق. بیزیم اختیاریمیزا وئریلمیش بو اوتاق هر شئی‎دن آرتیق کیچیک بیر کندلی تؤوله‎سینه اوخشاییردی. دووارلاری توستودن قارالمیش ایدی. قاپیسی قیریق، پنجره‎سی ده یوخ ایدی. چالا- چوخور دؤشه‎مه‎سینده یورد سالمیش بیره‎لر جوولاندا ایدی.

اینسانین اوزو برک اولار. اگر آز دا اولسا، اومید نورو قلبینه ایشیق سالمیش اولسا، هر چتین‎لییه دؤزه‎ر. بیز ایکی آیدان بری بو اوتاقدا گونلری بیربه‎بیر یولا سالیردیق. هامی‎میز بیر دردلی ایدیک. بوخاری‎نین توستوسو ایچری‎نی دولدورموشدو. آجیشان، یاشارمیش گؤزلریمیزی هردن سیله‎رک، نوروز کیشی‎نین صحبتینه قولاق آسیردیق. او، هامی‎میزدان یاشلی، دونیا گؤرموش، اؤلکه‎لر گزمیش، روزگارین ایستی- سویوغونو دادمیش، شیرین صحبتلی بیر آدام ایدی. اوجا بویلو، ائنلی کورکلی، ساچ- ساققالی آغارمیش بو آدامین، اوزو، آلین قیریشیقلاری سؤیله‎دییی داستانلاری کیمی حئکایه‎لر ترنّوم ائدیردی. او، بو گون بیزه اوز ائل‎اوغلوسو ستّارخانین داستانینی سؤیله‎ییردی.

او، صحبتینی قوتاریرکن اوجاقداکی اودونلار یانیب، قوتارمیشدی. قیرمیزی کؤزلرین اوزونو کول قاتلاری اؤرتموشدو. ائشییین سویوغو قاپی‎نین چاتلاریندان اوزونو ایچری ووراراق، اوتاغین هاواسینی سویوتماقدا ایدی. یاتاق یئرلریمیزی دوزلتدیک. آفتافا گؤتوروب گئری قاییدانلار، بوزوشموش بیر حالدا: – قار یاغیر، بوراندیر! – دئیه، اؤزلرینی ایچری سالیردیلار. هر کس یورغانینی باشینا چکیب اوز نفسیله یئرینی قیزدیرماغا چالیشیردی. بو دا اینسانین عؤمروندن بیر گون ایدی، کئچدی.

سحر ایشیغی قاپی‎نین چاتلاریندان کئچه‎رک، داخمانین قارانلیغینی بوغموشدو. یئریمدن قالخیب پالتارلاریمی گئیدیم. چای قویماق اوچون سو یوخ ایدی، دولچانی گؤتوروب ائشییه چیخدیم. هر یئری قار اؤرتموشدو. آخشام گون اوزونو توتموش بوز بولوتلاردان خبر یوخودو. گونشین زرّین ساچاقلاری قارلی داغلارین زیروه‎سینه یاییلاراق اونلاری تئآتر صحنه‎سینده اوزونه پروژئکتور سالینمیش گؤزل بیر هنرمند اوزو کیمی جیلوه‎لنیردی. آسمان صاف، هاوا تمیز، اورک آچان ایدی. آیاز و شاختادان کوچه‎لرین کناریله اوزانان آرخ سولاری‎نین اوزو قایماق باغلامیشدی. حزین- حزین اسن شیمال یئلی ائو بوخاری‎لریندن قالخان توستونو جنوبا دوغرو هایلاییردی. من قصبه‎نین شرق طرفیندن آخیب کئچن «ایلدیریم بولاغی» سویوندان گتیرمه‎لی‎ ایدیم. بوداقلاری قار ایله اورتولموش آغاجلارین آراسیندان کئچه‎رک، بولاق سویونا یاخین‎لاشدیقدا، سویون کناریندا باشی آچیق، قیوریم ساچلی، آیاق یالین، سویوقدان آل دوداقلاری گؤیرمیش، کیچیک بیر لور قیزی گؤردوم. او، آیاقلاری‎نین بیرینی گؤتوروب او بیرینی قویور، گؤز یاشلاری بوزارمیش یاناقلارینی ایسلاتمیشدی. قاباغیندا سو ایله دولو بیر قازان وار ایدی. بو منظره منه «ویکتور هوگو»نون «قوزیتا»سینی خاطیرلاتدی. او، رومانتیک بیر داستان اولسا دا، بو گؤزومون اؤنونده جانلی بیر واقعیت ایدی. تئز قیزا یاخین‎لاشدیم.

– نه اوچون آغلاییرسان، قوزوم؟- دئیه سوآل وئردیکده، زاواللی قیزجیغاز، تیتره‎ین کیچیک، توپول اللریله گؤز یاشلارینی سیله‎رک:

– قازانی باشیما قالدیرا بیلمیرم- دئدی.

– گوجون چاتدیغی قده‌ر دولدورسانا!… او، بوغونوق ایشقیرتی‎لارلا:

– آز دولدورسام خانیمین آجیغی توتار- دئدی.

– آتا- آنان یوخدورمو؟

– اونلار کنده‎دیر.

– سن کیمین یانیندا اولورسان؟

– آغانین.

– آغان کیمدیر؟

– ارباب‎دیر، علی‎خان‎دیر- دئیه جاواب وئردییی زامان داها برک تیتره‎مه‎یه باشلادی. اونون حالی منی شاشیرتمیشدی. تئز قازانی قالدیریب باشینا قویدوم.

زاواللی قیزجیغاز قیچلاری دولاشا- دولاشا بیر- ایکی آددیم ایره‎لی‎له‎دی. سویوق اونو حالدان سالمیشدی. قازانین آلتیندا مووازینه‎تینی ایتیردی. اونون حرکتلرینی گؤزدن قویماییردیم. تئز قازانی باشیندان قاپدیم. او، دیزی اوسته یئره گلمیشدی، تئز قالخدی. وجودونو مبهم بیر قورخو بوروموشدو. سحر- سحر قاباغیما چیخمیش بو اقبال‎سیز پری‎یه اورکدن آجیدیم.

– آدین نه‎دیر؟

– مهری.

– آغلاما قوزوم!- دئدیم، من سنه کؤمک ائده‎رم. اوز دولچامی اورادا قویوب اونون قازانینی گؤتوردوم. او، کیچیک آددیملارلا، دالیمجا قاچیردی. علی‎خانین قاپی‎سینا یاخین‎لاشدیقدا او، هیجانلا:

– داها اؤزومه وئر! یوخسا خانیم منی اؤلدورر!- دئدی.

قازانی آستاجا باشینا قویوب، قاپی‎دان ایچری کئچمه‎یینه کؤمک ائتدیم. منیم نیگران‎لیغیم یئرسیز ایدی. او، اؤز قووّه‎سینی توپلایا بیلمیشدی. ایچری کئچدیکده آغیر یوکون آلتیندا زحمتله بوینونو هرله‎ییب منه باخدی. بو باخیشدا دونیالار وار ایدی. قاپی اؤرتولدو. من اؤز دولچامین دالینجا یولا دوشدوم. اونون یالین آیاقلاری‎نین قار اوزه‎رینده بوراخدیغی ایز منه جیغیر ایدی. «خانیمین آجیغی توتار» سؤزلری قایالی اوچوروملاردان قاییدان عکس-ی صدا کیمی بئینیمده سسله‎نیردی. یول اوزونو اؤز- اؤزومه دئیینیردیم: «مگر خانیمین اؤز اوشاغی یوخدور؟ آنا دئییلمی؟ او، اوز اوشاغینا دا بو ظولمو روا گؤررمی؟ بس آنا قلبی، اینسانلیق؟!…»

بعضن اینسان جوشغون بیر هیجانا قاپیلیرکن اؤزونو اونودور. فئودال قایغی‎سیزلاریندان اولان بو کیچیک خاطیره‎ده منی اوتوردوغوم بو چشمه باشیندان اوزاقلاشدیرمیشدی.

الیمده اولان گول دسته‎سینی درین- درین اییله‎دیم. عطری بیر آن دا اولسا، کدرلریمی داغیتدی، روحومو اوخشادی.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *