چئویرن: شهرام گلکار
ترجمه: شهرام گلکار
شهرام گلکار
00:00
00:00

دوغروسو سعید‌گیلین گلیشی بیزیم گئنیش، آغیر‌باش عایله‌میز اوچون ده بیر یئنی‌لیک اولدو. آیری-آیری ائولر اولساق‌ دا، چوخدان‌دیر باجی- قارداشلیقدا بئله باش- باشا اولمامیشدیق. بیزلرین تفرئحی بونلار دئییل‌می! بو گل- گئت، قوناقلیقلاری دا یاشاماساق، اینانین دیقلاییب، آرادان گئده‌ریک.
بعضی اولایلار اؤز-اؤزونه آلینان‌تک، بو ایکی یانلی قوناقلیق دا بیزی تام افاده ائده بیلمه‌دیییم بیر سئوینجه بوروموشدو. آنامین جوشقوسونون حدّی یوخ ایدی. آخی ائیواز دا گئدیشیندن خئیلک سونرا، باکی‌دان یئنی‌جه گلمیشدی. سینیرلار تزه‌جه آچیلمیشدی. چوخونلوقلا آل- وئرچیلر گلیب گئده بیلیردیلر.
بیز داها چوخ ائیوازا گؤره گئتمیشدیک اورا. سعیدله خانیمی رعنا بیزیم عایله‌یه، اؤزللیکله ده آنام‌ اوچون لاپ بالالاریندان دا عزیز ساییلیردی. رعنا ننه‌مین خالاسی اوغلو کامیل‌ین قیزی‌یدی، جبهه‌ده یولداشی آناسینی سؤیدویو یامانین قارشیلیغینی آلینجا، تَتییی چکیب، حاق‌سیز یئره بئناوانی وورموشدو. رعنانی بؤیوک آناسی بؤیوتموشدو.
قوهوموموز دا اولسا، اون ایلی اؤتموشدو رعنانی گؤرمه‌یه‌لی. دهلیزده هامی‌نین یانیندا بویویلا-بوخونویلا قارا چادرانین ایچینده، قارالارا بورونموش آغ- آپباق کرم‌سی نور شاخی‌ییردی بیله‌سن. داها ایی بیریسینی حاق ائدیر کیمی دوروردو بلکه، بیلمک اولمور! نه قدر اؤزونه گووه‌نن، دویغولارینا حاکیم، اؤتکم و ده ظریف گؤستریردی. گؤزلرینه صاحیب، باخیشلارینی جیلوولایان، اللرینه، حرکتلرینه مالیک کیمی گؤرونوردو. گؤزونه باخاندا، ایچی آنلاشیلمایان بیری‌سی؛ بیزه یوووشمازلیغی چوخ غریب ایدی. کیم دئیردی کی، اونون کیمی بیریسینی، ایندی ده چارداق‌دا قالان سعیده وئره‌رلر.
هر کسین باشی بیر طرفده صؤحبته قیزیشمیشدی کی، بیردن سعید برکدن دئدی:
– ائیواز قارداش آنلاشیلان آل- وئرچی‌سن، دئییل می؟
ائیواز سیخیلا- سیخیلا دئدی:
– ائله‌دی.
– نه آلیب، نه ساتدین؟ بلکه دئیه‌سن. بوردا دئییله‌نه گؤره خئیلک پول آپاریبمیش‌سان. قازانج گؤتوره بیلدین می؟
آنامین‌ دا، “اختیار”ین‌ دا اوره‌ییندن، ائله‌بیل های وئردی! ایندی سوروشا بیلمه‌ییب، دینله‌یه بیلمه اولاناغی یارانان، ایللرین اوتانجدان چکینیب آوارا بیلمه‌دیک‌لری ماراقلی یانیتی عایله‌نین اصیل پای و حاقّ صاحیبی اولان عوضولرینه مجبور وئره‌جک اوزه‌ره ایدی. ایکی‌سی ده قولاقلارینی شکله‌دی.
ائیواز بارداشینی تزه‌له‌ییب، ایکی الینی بیر- بیرینه سورته- سورته؛
– نه دئییم واللاه، فایداسیز الدو، دئدی.
سعید سؤزلو آدام کیمی یئکه قارنی ایله یئرینده قورجالانیب، گؤزونو آدامی اله سالیرمیش‌جاسینا تئز- تئز قیرپیردی. سؤزلری ده کانکا دریز دزگاهی تک تلم- اطرافی دوشونمه‌دن تله‌سیک دوغراییب آنیندا آتیردی چؤله. ایسته‌دی یئنه دانیشا، رعنا اونا اؤزل ایمالی مولاییم باخیشلا آنلاتدی کی، یئتر! یوخسا سعیدین سؤزلویونده سینیر دئیه بیر سؤزجوک یوخ کیمی گؤروکوردو.
بو کز ننه‌سی چیمخیردی:
– آی بالا چؤره‌یین یانیغین آدامین باشینا قاخیللار. او قدَر پول ایلن بورادا شهَرین بیر طرفینه یییه‌ دورماق اولاردی. یومورتلامادی یومورتلامادی، بس بونون فالاسینا نه گلدی!؟
ائیواز بو دفعه قیزارا- قیزارا دئدی:
– هامی‌سینی وئردیم دَری‌یه. دئمه دَری‌ده ده چؤرک یوخ ایمیش.
سعید بو کز بینه‌نی زارافاتا قویوب، دئدی: ‬
– اینینده‌کی گؤدکجه ده کئچه‌دن دئییل. آنلاشیلان آل- وئر ائتدییین دَری‌نین ده کاری یوخ ایمیش.
آنا‌م یئنه قاییدیب دئدی: واللاه اولاسی ایش دئییل! ایسته‌ییرسن حیط‌ده‌کی چاققال- چوققالی قوواسان، ائوین ایتی دابانینا یاپیشیب قویمور دَبه‌ره‌سن. او قدَر پول تکجه دری آل- وئری‌ ایله توکه‌نیب، بیته‌مز.
ائیواز ایسته‌ییردی یئنه باشدان-ائتدی نه‌سه دئیه؛ آناما یاپیشیقلی اوتورموش بؤیوک قارداشیم اختیار، سینیر چاشنیلی، یاری جیددی یاری شوخلوق بیردن الینی ایکی-اوچ کره قوجا آنا‌مین قاسیغینا چیرپیب دئدی:
– آرواد، نییه باشا دوشمورسن؛ بو دری‌یه وئریب باخ، بو دری‌یه.
سعید اوشاق‌تک برکدن قاققیلداییب دئدی:
– دئدیم آخی، قارداشیم مایانی باتیرماز!
اوردان- بوردان خیمیر- خیمیر اؤته‌رگی گولوش سسی، خفیف پیققیلتی دویولدو دا، بیتدی ده. آردی‌جان آجیناسی حوزونلو سوکوت ائوین بور- بوجاغین اووسونلادی.
آز سونرا قورونتی‌دان چیخمیش یئنه پیققیلتی سسی، هامی‌نین باخیشین سعیده ساری یؤنلتدی. دوزو ائیوازین نیققیلتی‌سی سعیدین آزغینلیغینی بیره‌- مین چوخالدیب تمیز دؤشونو آچمیشدی. ذاتن اورتام یئترینجه گریلمیشدی بوندان اؤته نه اولا بیلر کی دوشونوردو.
سعید دئدی:
– آنا، سن آللاه منی باغیشلا.
آنا اؤز دردینه دالیب، آنی اونوتقانلیغا بوراخیب آخیمدان اوزولوب دئدی:
– آللاه باغیشلاسین بالا.
سعید دئدی:
– هامینی‌ دا آلداتماق اولسا، سنی آلداتماق اولماز!
آنام قافاسی بیر گلیب بیر گئدن حالی ایله گویا اؤز قارنیندان چیخان بالالاری دئییل ده تکجه‌نه داها بو گون یولدان گلمیش قوناق بونو دوشونورموش کیمی ایچدن قایغیلی قایغیلی سوروشدو:
– گؤره‌سن نییه؟ –
سعید چؤل ادبیاتینا اویغون، اؤنونو آردینی دوشونمه‌دن دئدی:
– نه اؤپمه‌لی اوزون واردیر، نه‌ده کی سی…
اختیار سعیدین سؤزونو آغیزیندا پارا قویوب ایسته‌دی دورا …، هامی رعنانی گؤسته‌ریب، هیم ائله‌دی، دیشی بوغارسیغینی کسه کسه اوتوردو قالخدیغی یئرینه…

چاپ

دیدگاهتان را بنویسید

نشانی ایمیل شما منتشر نخواهد شد.

قوناقلیق

شهرام گلکار
www.ishiq.net

آذربایجان ادبیات و اینجه‌صنعت سایتی

قوناقلیق

شهرام گلکار
www.ishiq.net

آذربایجان ادبیات و اینجه‌صنعت سایتی

قوناقلیق

شهرام گلکار
www.ishiq.net

آذربایجان ادبیات و اینجه‌صنعت سایتی