اوخوماق زامانی: 4 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
بهرام صادقی
چئویرن: حمید بخشمند
ترجمه: حمید بخشمند
حمید بخشمند
00:00
00:00

بو یازی‌نین صوتی نسخه‌سی حاضرلانماییب. بو یازی‌نی اؤز سسینیزله اوخویوب بیزه گؤندره بیلرسینیز.

گؤزه گؤرونمه‌ین بیر شئی وار آل کیمی. من اونوگؤرمورم، آمما حس ائدیرم، دوشونورم اونو. منی ایته‌له‌ییر اویان – بویانا…
-آ…ها! بیر بالاجا باشی‌نیزی یوخاری قووزایین،گولون. گؤزلریز شکیل آپاراتینا باخسین. اوچه دَک ساییرام. ترپنمه‌یین کی شکیلی‌نیز خاراب اولار. حاضیر اولون! بیر… ایکی… اوچ.
*‌ × *
ایکی گئجه اوندان سونرا، شکیلخانانین پیلله‌کانیندان اوسته چیخیردی کی شکیلینی آلسین. شکیلچی وئره‌ن قبیضی اووجوندا سیخیردی. یادینا گلدی کی ایکی گئجه اوندان اوول شکیلچی سوروشموشدو:
– آدینیز؟
و او آدینی دئمیشدی.
– عادی اولسون: 4×6 ؟ پُستال کارتی نئجه؟
و او جاواب وئرمیشدی:
– بیر دَنه سی اؤرنَک اوچون.
– صاباح یوخ، بیریسی گئجه حاضیردی…ساعات سککیزده.
قاپینی آچمامیش ساعاتا باخدی. سککیزی کئچمیشدی. اؤز- اؤرونه پیچیلدادی:
– شبهه سیز کی ایندی حاضیردیر.
شکیلچی‌نین شاگیردی ماسانین آرخاسیندا اوتورموشدو. اونو گؤرجک آیاغینا دوردو. او ایسه سالامین جاوابینی وئرندن سونرا بیر اوستولون اوستونده ایلشدی. شاگیرد تانیماماقدان اوْنو سوزدو:
– دئیه سن اؤزو یوخدو؟
– نییه… نییه … بورادا‌ایدیلر.
– بو قَبیض…
قَبیضی جیبیندن چیخاریب، ماسانین اوستونه قوْیدو. شکیلچی شاگیرد اوْنو گؤتوروب اوْخویوب، سونرا باشینی احتراملا ترپتدی:
– بلی قوربان، ائله بو گئجه‌یه‌دیر… آمما گره‌ک دؤزه‌سینیز کی اؤزو گلسین.
ایسته ییردی دئسین: « ایش – گوج… » اوستولون اوستونده اوْتوردو. شاگیرد دوشونوردو کی اوْ ، ایش- گوجونو بوراخیب گلیب شکیلینی آلسین و ایندی کی شکیلچی یوْخدور، یقین کی آجیقلی‌دیر. آمما نه ائده بیلردی؟ فیکرینه گلدی کی بیر شئی‌له اؤزونو مشغول ائله سین. باشلادی بیر آلبوْمو واراقلاماغا…
اوْ سوْروشدو:
– گلمه‌یه‌جک؟
– نییه گلمه‌یه‌جک؟ ایندیجه…
و اوْ دیواردان آسیلمیش شکیل‌لره باخماقلا مشغول اوْلدو…
اوْن بئش دقیقه‌دَن سوْنرا شکیلچی گلدی. ائله یوْلدان یئتیشمه‌میش سؤز آچدی:
– خوْش گلیب‌سینیز قوربان.
و شاگیردینه دوْغرو:
– آغا چوْخدان تشریف گتیریبلر؟
وَ یئنه ده اوْنا:
– ایندیجه خیدمتی‌نیزه تقدیم ائده‌رم.
اوْ ایسه ، اوستولدان قالخیب ماسانین قارشی‌سینا گلدی. ایکی الینی ده ماسانین قیراغینا قوْیوب انتظار چکدی. شکیلچی ایش اوْتاغیندان شکیل‌لری گتیردی.
– قوْی گؤروم بودور؟ بعلی، اؤزودور.
اوْ الینی اوزالدیب شکیل‌لری آلدی. بیر آز باخاندان سوْنرا:
– بونلار دئییل .سهو ائدیرسینیز.
– نئجه؟ بویوردوز…
– سهو ائدیرسینیز. منیم بیغیم یوْخدور، بو شکیل‌لرین بیغی وار… اوْندان علاوه من باشیما پاپاخ قوْیمارام.
شکیلچی تئز شکیل‌لری آلیب اوولجه دیققتله اوْنلارا، سوْنرا اوْنون سیماسینا باخدی:
– غریبه دیر… آمما سیزه چوْخ اوْخشاییر.
– اوْخشاییر؟ واللاه نه عرض ائدیم… داها بوراسین دوشونه بیلمیرم.
شکیلچی بیر آز دورخوندی. شاگیردی بیر آز اؤنجه دیشاری چیخمیشدی (نه ایش گؤردویونو بیلمه‌دن چیخمیشدی دیشاری ). گئدیب ایش اوْتاغیندان بیر دسته باشقا شکیل گتیریب سَردی ماسانین اوستونه. اوْنلاری آرایا- آرایا دوداغی آلتدا پیچیلدادی:
– بونلار کی دئییل…
بیر قیزین شکیلی ایدی.
– بودا دئییل.
بیر قادینینکی ایدی.
– بودا یوْخ.
بیر اوشاغینکی ایدی.
– بو؟
بیر شکیله ، بیرده اوْنا باخدی:
– بو سیزه چوْخ اوْخشاییر. پاپاغی‌دا یوْخدور…آمما یئنه‌ده بیغی وار.
اوْ ایسه ، باشینی ایره‌لی آپاردی:
– گؤروم…پاپاغی یوْخدور…
سؤزونه دوام ائتدی:
– آخی « بو سیزه اوْخشاییر» نه سؤزدور؟ من هاردان بیلیم کی اؤزومونکو‌دور؟ من کی اؤز- اؤزومو گؤرمورم، یادیمدا دئییل کی نه ته‌هردیر. آخی ایشلری‌نیزین قایداسی ، نظمی یوْخدور کی شکیل لر اوْیان- بویان اوْلما سین؟
نومره وورمازسینیز؟
– نییه…نییه نومره ویراریق. ایشیمیزین قایداسی‌دا وار ، نظمی ده. آمما آمان ناشی آدامین الیندن. بو شاگیرد هامیسینی ویریب بیر- بیرینه. قاتیب- قاریشدیریب. میثال اوچون بورا بیر دیققت بویورون ، اوچ دسته شکیل وار کی هامیسی‌نین اوستونده سیزین قبیضی‌نیزین نومره سی وار… عؤمروموزون سوْن چاغلاریندا اؤزوموزه ایش آچیب شاگیرد توتدوق! ائله بیل داغ دالیندان گلیب… هئچ بیر شئی باشا دوشمور…
– سؤزون آخیرین دئه گؤروم. من نئیلمه‌لی‌یم؟ هاچانادَک بورادا دوراجاغام، جناب شکیلچی باشی؟
شکیلچی ایسه یئنه ده شکیل‌لری آراماغا باشلادی.
– بودا دئییل.
بیر تاریخی بینانین شکیلی ایدی.
– آها… اؤزودور.
اوْ شکیلی قاپدی.
– نئجه کی اؤزودور؟ هئچ نه‌یی منلن اوْخومور. منیم ژاکئتیم هاردا بئلنچی‌ایدی؟
شکیلچی اوْتوردو. حؤوصله‌سیز جاواب وئردی:
– داها بیزه ربطی یوْخدور. بلکه ده ایسراغا گون پالتارینیز اوْ جورایدی، بو گون‌ ده‌ییشیب‌سی‌نیز؟
– هئچ بئله ایشین اصلی یوْخدور.
شکیلچی یئنه آیاغا قالخیب، چیینلرینی آتدی:
– داها بونلاردان ساوای باشقا شکیلیمیز یوْخدور. بونلاردان بیریسی دیر…
اوْ دیشلرینی بیر- بیرینه سیخیردی. بیر آز آرام اوْلاندان سوْنرا دئدی:
– بونلارین هئچ بیری منیم شکیلیم دئییل. آلتی دَنه4*6، بیر دَنه ده پستال کارتی، پولونودا آلیبسان، گره‌ک تحویل وئره سن…
شکیلچی اوچ دسته شکیل اوْنون قاباغینا قوْیدو.
– سیزین تحویلی‌نیزده، بَی! حیرصلنمک یئری یوْخدور. من کی باش قورتارا بیلمیرم. هر اوچوده سیزه اوْخشاییر، سیزین شکیلی نیزدیر. بیری بیغلی- پاپاغلی ، بیری بیغلی- پاپاغسیز ، بیریسی ده هم بیغسیز ، همی ده پاپاغسیز. هر هانسینی عشقی‌نیز چکیر گؤتورون…
– عشقیم؟ اوْلمایا عشقیله‌دیر؟ جناب شکیلچی باشی! یا سنین باشینا هاوا گلیب، یادا کی منی اله سالیبسان. جانیم، سن ایش آدامی دئییلسنمی؟ هئچ سنین موشترین اوْلماییبمی؟ یا ایسته‌میرسن ایشله ییب بیر تیکه چؤره‌ک قازاناسان؟ دونیانین هاراسیندا گؤرونوب کی بیر نَفر گئدیب شکیلینی آلاندا، اوچ دسته شکیل تؤکه‌لر قاباغینا، سوْنرادا اوْنو اله سالیب دئیه‌لر کی اوچو ده جنابی نیزین شکیلی دیر، هر هانسینی کؤنلون چکسه گؤتوره بیلرسن؟ ایسراغا گون مگر کوْرایدین؟ نه بیغیم وار‌ایدی، نه پاپاغیم، نه ده کی ژاکئتیم بئلنچی‌ایدی.
شکیلچی داها جانا دورموشدو. اللرینی بیر- بیرینه سورتوب سعی ائدیردی کی داشماسین. احترام وَ دؤزومله دئدی:
– بو سؤزلرین هامیسی دوز، هامیسی منطیقی، منیم ده قبولومدور. آنجاق منیم بو آخماق شاگیردیمین گوناهی دیرکی بونلاری قاتیب- قاریشدیریب، یوْخسا ائله اوولجه یوباتمامیش تقدیم ائدردیم، بیر بئله سؤز- صحبت ده گرکمزدی. آمما منیم اوچون تعججوبلو یئری بوراسی‌دیر کی نئجه اوْلا بیلر بو اوچ شکیل هامیسی سیزه اوْخشاسین. لاپ ائله بیلین کی دوز اؤزونوزسونوز. داها بیلمیرم سیزینکی‌دیر یا سیزه اوْخشایان بیر باشقا آدامینکی… بیلمیرم سیزین اصلی شکیلی‌نیز نئجه او‎لوب… آخی نئجه اوْلا بیلر… نئجه او‎ْلا بیلر کی سیز اؤز سیمانیزی تانییا بیلمه‌یه‌سینیز؟
– مگر سیز تانییا بیلیرسینیزکی من‌ده تانییا بیلم؟
– نییه تانییا بیلمیرم؟ سیز ایندیجه بیر شکیل گؤسترین منه، هر هانسی واختینکی اوْلورسا اوْلسون، تئز دئییم منیمکی دیر یا یوخ. تعجب ائدیرم…
– تعجب ائدیرسن؟ مگر گره‌کدیر دونیانین بوتون آداملاری اؤز شکیل‌لرینی سئچه بیلسین‌لر؟ باخما اؤزونه کی شکیلچی‌سن، ایشین بودور. هانسی توْیوق اؤز یومورتاسینی سئچه بیلر؟ گؤر نئجه جاماعاتی آلدادیرلار…اوچ- دؤرد گون اوْیناداندان سوْنرا، ایش – گوجدن قوْیاندان سوْنرا، اوْ واخت جاواب وئریرلر…
شکیلچی آز قالمیشدی آغلاسین. جیبیندن بیر گوزگو چیخاریب وئردی اوْنا:
– دای بو کی چتین ایش دئییل. باخ! گؤر شکیل‌لره اوْخشاییرسان یا یوخ؟
اوْ، گوزگونو آلیب باخدی. سوْنرا ائله گوزگو الینده اوْلارکن اوستوْلون اوستونده اوْتوردو. دوداغی آلتدا آجی- آجی پیچیلداییردی.
بیر آز کئچمیش، بیردن- بیره گوزگونو شکیلچی‌یه وئریب، باشینی اللرینه آلیب سیخدی.
شکیلچی یاواشجا سوْروشدو:
– گؤردون؟
اوْ ایسه دوروب، یئنه گئتدی ماسانین قاباغینا. بیرده شکیل‌لری گؤتوروب باخاندان سوْنرا وئردی شکیلچی یه.
شکیلچی دئدی:
– ایَه بیر آز بورادا اوْتورسان، شکیل‌لرین ییه‌لری هامیسی گلرلر. منجه پیس اوْلماز اؤز تای- توشلارینی تانیسانسا.
اوْ ، قاپی‌یا دوْغرو گئتدی:
– هامیسی فیریلداق دیر. بونلارین هئچ بیری منیم شکیلیم دئییل. بیلمک اوْلمور منیم اصل شکیلیم نئجه اوْلوب. اصلن اوْلا بیلر کی کؤکوندن منیم شکیلیمی گؤتورمه میسیز. کول باشینیزا بو شکیل گؤتورمه‌ییزله.
اوْ دیشاری چیخاندان سوْنرا شکیلچی‌ ده‌لی‌لر کیمی باشلادی اوْتاغی فیرلانماغا.
– آز قالیب ده‌لی اوْلام ایلاهی. نئجه اؤزونو تانیمادی؟ نئجه بو شکیل‌لر هامیسی اوْنا اوْخشاییردی؟ آز قالیب… آز قالیب اؤزومو پنجره‌دَن توللایام آشاغی.
شاگیردی ایچه‌ری گیردی:
– عمی شکیل‌لرینی آلدی؟ گؤردوم گئدیردی قارشیمیزداکی شکیل خانایا.

بهرام صادقی
اورهان کمال | ترجمه: 
اورهان کمال | چئویرن: 
حمید بخشمند
اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

حمید بخشمند

حمید بخشمند

باشقا اثرلری