تومورجوقلانان بوداق
سولماز جمالی
۱
قاپی‌لار تای‌با‌تای آچیلدی. چوخ چکمه‌دی کؤلگه‌لر ایچری‌دن ائشییه دوغرو سپه‌لندی؛ ائشیکدن ده ایچه‌رییه دیرماشان قارالتی‌لار اولدو. اتوبوس دایاناجاغیندا قاپی آغزیندا ایچری‌یه دۆرتۆلن‌لرله اتوبوسدان ائنن‌لر آراسیندا بوغوشما قوپدو.
دایاناجاقدان بیرآز اوزاقدا گؤزله‌مکده اولانلار، قادین‌لارین ان گؤزه‌لینی توشلاییب آرخاسینجا گئتدی‌لر.
۲
یول بویو باشینی اتوبوسون شوشه‌سینه سؤیکه‌ییب دۆشۆنجه‌سی مین یئره هاچالانماقدان سا اینستانی آلت_اوست ائدیب سئودییی گؤنده‌ری‌لری بیه‌ندی. سونرا اؤزونو یئییب_تؤکه‌رک اونون صحیفه‌سینی ده خئیلک سۆزدو؛ نفسی تینجیخدی.
ویدئولاری ایزله‌یه-ایزله‌یه «باخیشینی ده‌ییشتیر … الله‌ین دیل‌سیز_آغیزسیز ماغمین بنده‌سی اولما …» سؤزو دیققتینی داغیتدی.
یئر داریسقال‌لیغیندان، آیاق اوسته بیر-بیرینه قیسیلیب دانیشیغا قیزیشان ایکی جاوانی آلتدان_آلتدان سۆزدو.
«قارداش ایستئییرسن بیر قیز، سن ایسته‌دییین سۆره ، ایت کیمی اطرافیندا دولانیب قویروغونو بوللایا؟»
جاوانین فاغیر_فاغیر باخیشلاری، کؤکسونون هیجانلا ائنیب_قالخماسی، اۆزۆنون قیزارتی‌سی دقتینی چکدی.
آغزینی آچیب «پول» دئمک ایسته‌دییینده یولداشی آمان وئرمه‌دی:
«پولون دا تاثیری چوخدو. اما اوننان قاباق سنین رفتارین مهم‌دی. بیر آی الیندن گلدیی قدر محبت ائلییه‌جکسن:« سندن ساری اؤلورم، سن‌سیز قالا بیلمیرم …» دئیه‌جکسن. بیر آی‌دان سونرا یاواش-یاواش زنگ‌لرین، پیام‌لارین آزالاجاق. یادوننان چیخارتما، خانیم‌لار چوخ دانیشمایان، مرموز کیشی‌لردن چوخ خوشلانارلار. سئویشدیکدن سونرا دا قاش-قاباغینی تؤکوب سیگار آلیشدیریب دینیب دانیشمایان کیشی‌‌یه قیرساققیز اولارلار …”
ایلک دوراجاقدا اتوبوسدان ائندیک‌لری اوچون قادین‌ین دا ماراغی یاریمچیق قالدی.
بؤیرونده اوتوران چارشاب‌لی قادین‌ین یئرینی گنج بیر قیز دولدوردو.
بیر داها اینستایا گیریب اونلاری ایزله‌دی. ویدئولارین بیرینده قوجاق-قوجاغا اوتوروب ماهنی‌لا برابر اؤزلرینی ییرغالاییردی‌لار. اوْ، همیشه‌کی دیم دیک اوتوروشو ایله بیر الینده ایچگی بیر الینده ایسه سیگارئت، خیمی_خیمی اورتادا اوینایان قیزلاری سۆزۆردۆ. رنگ به‌رنگ ایشیق‌لار سالونو ایشیقلاندیریردی.
قیز کامئرایا باخاراق اوغلانی چاغیریر: «علی؟»
علی چؤنوب اؤنجه قیزا سونرا کامئرایا باخیر.
علی‌نین الینی توتور: «الان میتونی؟»
«چی؟» علی سورونو آنلامیر.
«میتونی بازم؟» معنالی باخیشی‌لا سوروسونو تکرارلاییر.
«مگه میشه نتونم؟ تو هر وقت بخوای من میتونم» کامئرایا باخیب گؤز وورور.
سونرا قاققیلداییب گۆلۆرلر.
ویدئونو ایزله‌یرک باجیسی‌نین اۆزۆنون جیزگی‌لرینی بئینینه قورقوشوم ائدیردی. دیلینین آلتیندا:
«سنین ده اینانیلماز گؤزه‌للیین یارارلی اولمایاجاق؛ او قاپیدان ایت کیمی اولایا_اولایا آتیلدیغین گۆنه چوخ آز قالیر. قورخودان باغرین یاریلا-یاریلا، آغلایا-آغلایا او قاپیدان عؤمرونون سونونا قدر آتیلاجاقسان.» دئدی.
«علی؟ کی زیاده؟ »
اؤزلرینی خاطیرلاییر. استخرده خئیلک چیمندن سونرا بیر_بیرینه ساریلیب اوزانمیشدی‌لار. جانلی ویدئو باشلاداراق علی‌دن او سورونو سورموشدو.
علی ایسه جدی، مغرور گؤزلرینی کامئرایا زیلله‌ییب «جان دلم؟ دشمن» دئمیشدی.
او گۆنلر کئف‌لری آلا بولوددایدی.
او ائودن آتیلدیغی گۆندن بری کیشی‌لرین شریک‌لی مالینا، توتالقالارینا چئوریلمیشدی.
هاندان-هانا اؤزونه گلیب ایت زینگیلتیسینه بنزر سس‌له اوزون-اوزادی آغلامیشدی. نفسی کسیله-کسیله، ال-آیاغی کئیی‌یه-کئیی‌یه، بۆزۆشۆب بیر الجه اولموش اؤزونو توپلاییب اۆزه‌ری‌لرینه اوچان داخمایا گئری دؤنموشدو. اونون هر گۆن دؤنمک اولاسیلیغینی گؤزله‌یه-گؤزله‌یه گؤزلری تور باغلامیشدی …
بؤیرونده ایله‌شن قیز آغزینی قولاغینا دایاییب « تو هم دلت میخواد، آره؟» دئیه سوردو. اۆزۆنۆ چئویردی. گنج قیزین گؤزلری ویدئویا زیللنمیشدی: «متوجه نشدم دختر خانوم؟»
ساچلارینی الی‌له اویناداراق «من که دختر نیستم …» دئدی.
گؤرکمی‌له دانیشیغی نئجه ده بیر-بیرینه اویوشوردو. «چند سالته؟ » سوردو. «چهارده …» دئدی. بیر آنا آغاجین تومورجوقلانماغا باشلایان سوتول بوداغینا بنزه‌ییردی.
«چقدر درمیاری؟» قایغی‌سیز گؤزلرینه زیللندی.
«الان ی ماشین ۸۰۰میلیونی زیر پامه، ی ویلای جمع و جور هم …» گؤزلری سئوینجدن ایشیلداییردی.
«مگه چقدر مشتری داری؟» قاش‌‌لاری گؤیه دارتیلدی.
«من چون سنم کمه مشتریمم زیاده … تو تلگرام ی کانال توپ داریم؛ دوس داشتی مشخصات تورو هم …» اۆزونده‌کی وئجسیز گۆلۆش ییرغالانا-ییرغالانا دالغالانماقداایدی.
«پشیمون نیستی؟» سوردو.
«اصلا … با اینکه اولین بار مامانم منو فروخت اما الان خودم خیلی راضییم … از خوشگلیم استفاده کردم … تو هم میتونی …» گؤزلری‌نین درینلییینده‌کی پاریلتی گؤزلردن یایینمیردی.
۳
دایانیر. قارانلیق، هاوایا دئییل، اونون ایچینه چؤکموشدو. کدرلی گۆنلری‌نین اۆره‌ک دؤیونتولرینی ائشیدیردی؛ نفسینی دویوردو. یئنی خیالی‌نین بویوتلارینی دۆشۆنه‌رک بوتون یارالارینا سیغال چکیردی.
بایاقدان اونونلا یاناشی یئریین آداما گۆلۆمسه‌ییر: «قیمتم بالاست … »
یک پاسخ
دایاناجاق ایستگاهین قارشیلیقی دئییل. دوراق یا دوشرگه