هدف
ائلیار پولاد

دونن گئجه‌دن یاغان قار هر یئری آغارتمیشدی. مدرسه‌نین حیطی طلبه‌لرین آیاق ایزلریله بزنمیشدی. های-کوی سالان گنج یئنی یئتمه‌لر زنگین سسی ایله سینیفلره دوغرو هجوم آپاردیلار. اونونجی سینیفین طلبه‌لری حیطده قالمالی اولدولار. اونلارین ایدمان ساعاتی ایدی. حیطده اولوب و ایدمان اویرتمنینی گؤزله‌مه‌لی ایدیلر.
***
ائلدار معلم مدرسهنین ایدمان اویرتمنیدیر. پئشه‌سینی جانلا- باشلا سئون بیر معلم، طلبه‌لرین قاییغیسینی چکن بیر انسان. هر زامان یئنی بیر فیکیر و ایدئایلا طلبه‌لری مشغول ائدیب و ایدمان ساعاتلاری بدن تربیه‌سیندن علاوه طلبه‌لرینین روح و دوشونجه انکشافینادا زمین یاراداری. اونلارلا یاخین مناسبتده اولوب، دوستلوق ائدردی. بیر سؤزله اونلارین معنوی آتاسی ایدی. بوش واختلارینی مدرسه محیطینده اولاردی. سوبای اولدوغو اوچون چوخ واختینی مدرسه‌ده کئچیرردی. اوزاق کندلردن گلن کاسیب طلبه‌لردن ایکی- اوچونو حمایه‌سینه گؤتوروب اونلارین عالی تحصیل آلمالارینی و اونوئرستده اوخومالارینی تامین ائدردی.
هئچ کیمه بللی دئییلدی کی نییه ائولیلیک حیاتی قورماییب و عؤمرونون بو واختینا قدر سوبای قالیب؟ معلم یولداشلاری ائولیلیک حیاتیندان صحبت آچاندا دئیردی: “منیم نه‌ییمه لازیم. ائله من بو اوشاقلاری بویودوب، باشا چاتدیرسام، بسیمدیر”. بئله‌لیکله دوغروداندا اونون حمایه‌سیله اوخویوب حکیم، مهندس، معلم و دولت آدامی اولان نئچه طلبه‌سی واردی کی، اوغول کیمی اونو سئویردیلر. یای تعطیلاتی زامانی هامیدان چوخ اونون قوناغی گلردی. ائله واخت اولاردی کی ائوینده یئر اولمادیغیندان مدرسه‌نین حیطینده بویوک اردو آلاچیغینی برپا ائدیب، اورادا گئجه‌لردیلر. کند اهلی ده بونلارا قوشولوب بایرام کیمی گئجه‌نی- سحر ائدردیلر.
دونن مدرسه تعطیل اولان زامان قار یاغماغا باشلادی. هاوا آیازیمیشدی. دئمه‌لی بو قار شدتلی یاغیب هر طرفی بورویوب، طلبه‌لرین ایدمان ساعاتینی هدر ائده‌جکدی. بیردن- بیره آغلینا بیر فیکیر گلدی. آنبارا کئچیب اردو آلاچیغی‌نین دیرکلریندن دؤرد- بئشینی گؤتورب، سالونا چیخاندا رستم دایینی گؤردو. رستم دایی مدرسه‌نین قوروقچوسو ایدی. اونو چاغیریب یانینا اونا کمک ائتمه‌سینی خاهیش ائتدی. دیرکلری اونا وئریب یئنیدن آنبارا قاییتدی. بو دؤنه الینده بیردنه کلافلانمیش ایپ و دؤرد دنه بالاجا دیرک واردی.
اونلار فوتبال میدانچاسینا گلدیلر. بالاجا دیرگین بیرینی یئره سانجیب، ایپین اوجونو رستم دایی ساخلاییب او اوزون بیر فاصله آرالانیب دارتلی ایپله فاصله‌نی تعیین ائدیب ایکینجی بالا دیرگی یئره سانجدی. تکرار اوچونجو و دؤردونجو بالاجا دیرکلری ده اون متر آرالی او ایکی بالاجا دیرکلرله یاناشی سانجدیلار. بویوک دیرکلریده یاخین فاصله‌لرله ائله سانجدیلارکی هر ایکی بالاجا دیرکلری آییردی. یانی ایکی بالاجا دیرک ساغدا و او بیریسی ایکی بالاجا دیرک بویوک دیرکلرین سولوندا قالدی. رستم داییدان منتدارلیق ائدیب ساغوللاشدیلار.
***
ایدمانلاری اولان طلبه‌لر حیطده دولاشیردیلار. کیمی کیمیسینی قار توپویلا ووروردو. کیمیسی آیاغینین ایزینی قارین اوستونده سیر ائدیردی. بیریسی ده قار اوستونده نقش سالیردی. زنگین وورلماسیندان ایکیجه دقیقه کئچمه‌میش ائلدار معلم الینده دؤرد دنه کمر ایدمان حلقه‌سی و بیر ده بوکولموش برزنت سالوندان حیطه چیخدی. هامینی توپلاییب، دئدی: “دوستلار، بوگون هر طرف قار اولماسینا باخمایاراق، سیزی بیر ماراقلی یاریش گؤزله‌ییر. ایکی دسته‌یه بولونون. هر دسته بیر نفر نماینده سئچسین. یاریشین قایداسینی میدانچادا ایضاح ائده‌جم. آرخامجا” …
معلم و طلبه‌لر گلیب میدانچایا چاتدیلار. معلم الینده‌کی حلقه‌لرین بیرینی بالاجا دیرکین محیطینده قارین اوستونه ائله قویدوکی بالاجا دیرک، حلقه‌نین مرکزینده یئرلشدی. فاصله آلاراق کناردان گئدیب او بیری اوچ حلقه‌لریده عئینی حالدا بالاجا دیرکلرده یئرلشدیردی. برزئنت پارچانی ایکی طلبه‌نین کمگی‌ایله بویوک دیرکلردن آسدی. بئله‌لیکله بالاجا دیرکلر آیریلدیلار.
معلم یاریشین قایداسینی آچیقلادی: “دوستلار، ایکی دسته‌نین نماینده‌لری بیری ساغ و او بیریسی سول بالاجا دیرکدن باشلاییب اوزبه اوزونده‌کی اولان بالاجا دیرگه گئتمه‌لیدیر. ایکی دیرکلرین فاصله‌سی برابردیر. قایتماق و دؤنوب دالی باخماق اولماز. ایکی دیرگین آراسیندا سیزین ایزینیز قالیر و هر کیم او ایکی دیرگین فاصیله‌سینی دوز و تئز گئدرسه او دسته غالیبدی. ایندی بئش دقیقه فرصتینیز وار. مصلحتله‌شین.
مصلحتله‌شمه زامانی قورتاردی. ساغ دسته‌نین نماینده‌سی اورخان و سول دسته‌نین نماینده‌سی اوختای ایره‌لی گلیب معلمین یانیندا دوردولار. معلم اونلاری بالاجا دیرگین یانیندا دورمالارینی ایسته‌ییب، دئدی: “حلقه‌نین ایچینده ائله دورمالیسینیز کی، بالاجا دیرک آیاقلارینیزین آراسیندا اولمالی، و من فیت چالان کیمی عادی یئریشله اوزبه‌اوزده اولان حلقه‌نین ایچینده‌کی بالاجا دیرگه طرف آددیملامالیسینیز. هرکیم او فاصیله‌نی دوز و تئز گئدرسه غالیبدیر”….
اورخان و اوختای یئرلرینی توتدولار. فیت چالیندی. اوشاقلارین آلقیش صدالاری آلتیندا یاریش باشلاندی. معلیم ساعاتین کورنومتری ایله واختی اولچوردو. اوختای اوچ ثانیه تئز چاتدی و اوندان علاوه فاصله‌نیده دوز قطع ائتمیشدی. اورخان اوچ ثانیه گئجیکمه‌سینه باخمایاراق فاصله‌نیده دوز گئده بیلمه‌میشدی. اورتادا ایری- اویری آیاق ایزلری قویموشدو. بئله‌لیکله سول دسته یاریشی قازاندیلار.
معلم اورخانی ایره‌لی چاغیریب سوروشدو: “دوستلارا ایضاح ائله گؤرک نه باش وئردی.” اورخان دئدی: “من حرکته باشلارکن آیاغیمین آلتینا باخیب چالیشیردیم کی فاصله‌نی دوز قطع ائدیم. تاسف کی آلینمادی”. سونرا اوختایی چاغیریب و اوندان ایسته‌دی کی ایضاح ائتسین. اوختای دئدی: ” من اصلا آیاغیمین آلتینا باخمیردیم. دوردوغوم یئردن حرکته باشلایاندا یالنیز و یالنیز اوزبه‌اوزده‌کی بالاجا دیرگه باخاراق حرکت ائتدیم. و آلیندی”.
معلم اونلارین ایکیسیله ده ال وئریب و اوزونو طلبه‌لره توتوب سؤزه باشلادی: “اوشاقلار بو گونکو یاریش بیزه بیر حقیقتی آچیقلادی. اودا بودور کی هر بیر انسان بیر هدف توتمالی و او هدفه دوغرو حرکت ائتمه‌لیدیر. اگر بیز بو یولدا فیکریمیزی خیردالیقلارا یاییندیریب و گونده‌لیک چتینلیکلرله مشغول اولساق، دئمه‌لی هدفیمیزدن ده یایینمالی اولاجاییق. و اولابیلسین لازیم اولان زاماندا هدفمیزه چاتمایاق. بوتون گؤردوکلریمز ایشلرده یاخشی نتیجه وئرمه‌سین. یوخ اگر بیز حرکت ائتدییمز زامان هر بیر گؤردویوموز ایش زامانی هدفی اونوتماییب و هدفه دوغرو حرکت ائتسک، زحمتمیز هدر گئتمه‌ییب و بیزی هدفیمیزه چاتدیراجاق…..” ۲۶/۴/۹۶