اوخوماق زامانی: 9 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.



طوطو قوشو/ آفاق مسعود

 قولاغینی سحردن بری سویوق دیوارا یاپیشدیریب گؤزله‌ییردی. قونشولارین رنگ به رنگ سسلری‌نین ایچینده آرا- سیرا دیوارلارین ایچی ایله قاچیب داشلاری خیرچیلدادان کرتنکله‌لرین ده سسینی ائشیدیردی. هردن کرتنکله‌لر آز قالیردی قولاغینا دولوشالار. ائله بیل کرتنکله‌لر داشلاری دیدیب توکدوکجه، دیوالار یاواش- یاواش یئییلیب نازیلیردی. دیوارلار نازیلدیکجه قونشولارین دانیشیقلاری لاپ آیدین ائشیدیلیردی.

ائوی بو یاخینلاردا سؤکه‌جک‌دیرلر. ایندی‌دن ائله اؤز – اؤزونه سؤکولوردو. تاختالاری ساللانیردی قاپی‌- پنجره‌لری لاخلاییردی. دؤشه‌مه‌سی جیریلداییردی. ««اینجی‌قاری»»‌نین اؤزو ده ائله ایدی. گئت- گئده اللری، آیاق‌لاری توتموردو. دیشلری چورویوب تؤکولوردو، جییه‌‌‌رلری خیش- خیش خیشلداییردی دیوارلارین ایچینی‌ ده کرتنکله‌لر یئییب بوشالتماق‌دا ایدیلر. دیوارین سویوغو قولاغینا دولموشدو. قولاغی اوشویوردو، گیزیلده‌ییردی. آغریییردی، آمما دیواردان آیریلمیردی.

قوجا ایدی… اونسؤز دا جانی همیشه بومبوز اولوردو. آلتدان- اوستدن گئیینیب قیفیللانیب، قاپی- باجانی باغلاییب گاه پیلته‌سینی یاندیریردی. دال با دال دیلی، دوداغی یانا- یانا اوست – اوستدن چای ایچیردی. یئنه بالاجا، رنگ‌سیز بدنی، قورو ال – آیاغی ایسینمیردی. ائله بیل ایچینه سامان دولدورموشدولار. ««اینجی‌قاری»‌» قولاق‌لارینی اونا گؤره دیوارلارا سورتموردو کی بو ایشدن حظّ آلیردی یاخود قونشولاریندان زهله‌سی گئدیردی. نه ائده‌یدی؟ نه قده‌ر اؤز- اؤزویله نرد اویناییردی، اؤز اؤزونو اودوب، اؤز- اؤزونو اودوزوردو. نه قده‌ر گؤزگویه باخیب چوروین دیشلرینی گؤریدی؟…

یاخینداکی کیتابخانادا اوخومادیغی اثر قالمامیشدی. آخیر واختلار کیتابلارین اوز صحیفه‌سینه، قییمتینه، بوراخیلما تاریخینه، تیراژینا باخیردی. اؤز- اؤزونه موللیفین نه قده‌ر آلدیغینی حسابلاییردی. صحیفه‌لری، جیلدلری یوخلاییر بیر- بیری ایله توتوشدوروب مقاییسه ائدیردی.

ائوینده هر شئی حددیندن آرتیق تمیز ایدی. سلیقه‌لی، یئرلی- یئرینده ایدی. صاندیقلاری، سییریتمه‌لری، ایشکافلاری توکوب ایچینده‌کینی آزی اللی دفه دییش- دویوش ائله‌ییب تزه‌دن ییغمیشدی. قاب- قاشیغی او قده‌ر یویوب- سورتموشدو کی، تاوالار، قازانلار گؤزگو کیمی پاریلداییردی. دؤشه‌مه‌سی‌نی او قده‌ر یویوب قورولامیشدی کی، رنگی گئتمیشدی، تاختالاری سودان شیشیب آچیلمیشدی. دیبچک‌ده‌کی گوللر سولانماقدان یئتیشیب سارالمیشدی. یئکه‌لیب یونسؤز گونه دوشموشدولر. بیچاقلار ایتیلتمک‌دن نازیلیب اییلمیشدی. شوشه‌لری ائله تمیز ایدی کی، کوچه‌دن کئچن‌لر ائله بیلیردیلر ««اینجی قاری»»‌نین پنجره‌لری‌ شوشه‌سیزدی. پالتارلاری یویوب چنگه‌لمکدن، سیخیلیب بورلماقدان، قایناماقدان سؤزولوب جیریلیردی. یورغان- دؤشه‌یینه کیمی آچیب یونونو دیدمیشدی، دارامیشدی. داها نه ائده‌یدی؟….

بوتون بونلاردان سونرا «اینجی‌قاری» اؤزو ایله مشغول اولوردو. دیرناقلارینی توتور، دابانلاری‌نین قابیغینی سویوردو. آرتیق- اورتوغونو کسیردی. سون واخت‌لار یاناقلاریندا بیتمه‌یه باشلامیش توک‌لری بیر- بیر گؤزلری یاشارا- یاشارا قوپاریردی.

ساعات‌لارلا نبضینی ‌آختاریردی، تاپمیردی. عصبی- عصبی بیلک‌لرینی، سینه‌سینی یوخلاییردی.

آخیر- آخیر دا لاپ خووفلو اولموشدو. ساچلاری تؤکولدوکجه جانینا قورخو اوشوتمه دوشوردو. آز قالیردی اوره‌یی گئتسین. ساچلاری تؤکولدوکجه باشی‌‌ دا گؤزونه بالاجا گورونوردو.

ساعات‌لارلا گؤزگونون قاباغیندا اوتوروب یئرده قالان ساچلارینی، ‌اوّل ساغلام، سونرا چوروموش دیش‌لرینی ساییردی. هر دفه ده گاه دیش‌نین بیرینی آرتیق، گاه دا اسکیک حسابلاییردی. اؤز- اؤزونه گؤتور- قوی ائله‌ییردی؛ چورویوب تؤکولن دیش‌لرینی بیر- بیر یادینا سالیردی. بونلار دا قورتاراندان سونرا «اینجی قاری»‌ قولاق‌لارینی دیوارلارا سؤیکه‌ییردی. ائله بیل دیوالارین هره‌سی بیر آدامین بدنی ایدی. «اینجی قاری»‌ بیر- بیر اونلارا قولاق آسیب ایچینده‌کی درد- آزاردان خبر توتوردو. دیوارلاری پوسماقدان ائله بیل قو‌لاقلاری بؤیوموشدو. ایندی یئکه قولاق‌لاری دیوارین او ‌طرفینده دانیشانلارین نفس‌لرینی‌ ده ائشیدیردی.

کیشی آروادینی سؤیوردو:

– بوش بوغاز!! مین دفه دئمیشم ائشیتدییینی، اونون – بونون اووجونا قویما. آی سنین…

سونرا سس کسیلدی. کیشی توپوروب قاپینی چیرپدی.

«اینجی قاری» دا هیجانلاندی. نفسی تنگی‌دی. تؤوشویه- تؤوشویه دیواردان آرالاندی. کیشی‌نین الیندن دئیینه- دئیینه اؤزونه چای تؤکدو. سونرا گئدیب سویوقدان گؤیریب – اییلمیش قولاغینی او بیری دیوارا دیره‌دی. اوردان سس گلمیردی. پئشمان- پئشمان قاییدیب چارپایاسینا اوزاندی. «اینجی قاری» قونشولارینا ائله بلد ایدی کی، آیاق‌لاری‌نین سسیندن ایستولون، چارپایی‌نین جیریلتی‌سیندان ایستیکان- نلبکی‌نین جینگیلتی‌سیندن ده هر شئیی باشا دوشوردو. ائله بیل «اینجی قاری» قولاقلاری‌ ایله گؤروردو.

دیوارلارا باخدی. اوچ دیوارین هر بیری بیر قونشونون دیواری ایدی. «اینجی قاری»‌ هر اوچ قونشونون جیکینی- بؤکونو بوتون عاییله عضولری‌نین ترجومه-ی‌‌حالینی، بیر- بیرینه اولان مناسیبتی، هر گون کیمین هارا گئتدییینی، هاردان گلدییینی، ‌اونلارین اؤزلریندن ‌ده یاخشی بیلیردی. آیلارلا قونشولاری‌نین اوزلرینی گؤرمه‌سه ‌ده اونلارلا بیرگه آغلاییردی، هیرسله‌نیردی گولوردو.

دیوارین بیرینه «اینجی قاری» آنجاق گئجه‌لر قولاق آسیردی. ائله سؤزلر ائشیدیردی کی، قاری‌نین اولان – قالان ساچلاری بیز- بیز دوروردو…

جور به جور کیشی سسی گلیردی. نازیک، قالین، خیریلتی‌لی؛ قادی‌نین سسی ایسه ائله همین سس ایدی. عینی جور دانیشیردی، عینی جور گولوردو، قاققیلداییردیلار. قاری قیپ – قیرمیزی قیزاریردی. گؤزگویه باخیب آچیق – آیدین گؤروردو کی، گؤزل‌لشیب، یاناقلاری چئهراییلاشیب.

ایسته‌ییردی قولاق آسماسین آمما باجارمیردی. قولاق آسدیقجا سویوقدان گؤیرمیش قولاق‌لاری ایسینمیردی. قیزاریردی. قانا دولوب لوککولدییردی. بیلیردی کی، بوگون- صاباح دوشوب اؤله‌جک و بیر ده آنادان اولمایاجاق. بوتون بونلاری بیله- بیله «اینجی قاری»‌ اونو دا بیلیردی کی، هله عؤمورونده بئله- بئله شئی‌لر ائله‌مه‌ییب.

اونا گؤره ایندی دیوارین او طرفینده‌کی، آرواد قریبه- قریبه سؤزلر دئیه‌ن‌ده، گولنده، قاری‌ آنلاییردی کی، داها ماراقلی شئی‌لر وارمیش. او شئی‌لری «اینجی قاری» بو قده‌ر یاشامیشدی، هئچ بیری‌نین دادینا باخمامیشدی. ایندی بونلارا او، کناردان باخا بیلردی، قولاق آسا بیلردی. بو بیری دیوارین او اوزونده قیرخ- اللی یاشلاریندا «میلا» آدیندا کومبول بیر قادین یاشاییردی. «اینجی قاری» اونو قصدن «میلا» چاغیریردی. دئییردی کی، «مئلا» دئیه بیلمیر، دیلینه یاتمیر.

میلانین دورد قیزی وار ایدی. قیزلاردان باشقا ایکی ایت، پیشیک و بیر طوطو قوشو ساخلاییردی.

بو دیوارا «اینجی قاری» هردن بیر قولاق آسیردی. ایتین، پیشی‌یین سسی ائشیدیلیردی. بیر ده طوطو قوشو سحر- آخشام چیغیرا- چیغیرا عینی سؤزو دئییردی: «صاباحین خئیر! صاباحین خئیر».

میلا گیل‌ده مهربانچیلیق ایدی. ایت- پیشیک‌له، پیشیک قیزلارلا، قیزلار بیری- بیری ایله اویون اویناییردیلار.

«اینجی قاری» میلادان اییره‌نیردی. چونکی میلا گؤزونون قاباغیندا ایت‌لری چیمیزدیریردی. پیشی‌یی اوپوردو، طوطو قوشونون بیت‌لرینی تمیزله‌ییردی. ساغ طرف‌ده‌کی دیوارا ایسه، او دیوارا کی، بایاق اونون او اوزونده هیرسلی کیشی آروادینی سؤیوردو، «اینجی قاری» ساعات‌لارلا قولاق آسیردی.

اورادا شهرین ان آغیر عاییله‌لریندن بیری یاشاییردی. بو عاییله او قده‌ر آغیر ایدی کی، «اینجی قاری»‌گیلین دهلیزلری‌ ده بو آغیرلیقدان اییلمکده ایدی. بو دیوارین او تاییندان «اینجی قاری» سایسیز- حسابسیز سؤیوش، غیبت – قارغیش ائشیدیردی. گون اورتالار، کیشی‌ ائوده اولمایاندا قیزلار بیر- بیری ایله سؤزله‌شیب ووروشوردولار آغلاییب اوشاقلاری دویوردولر. یا دا آنا- بالا اوتوروب هر گون آرتـیب اوست- اوسته گلن پول‌لاری ساییردیلار. «اینجی قاری»‌دان‌ دا دانیشیردیلار. قیزلاردان هانسی‌سا دئییردی کی، «او دا آدام‌دی؟ بیت کیمی یاشاییر…» آناسی‌ دا دئییردی کی، «عیبی یوخ، گون گلر او دا اؤلر اوتاق‌لارین آلاریق».

«اینجی قاری» آز قالیردی هوشونو ایتیرسین. نه ائده‌یدی؟ نئجه گئدیب دئیه‌یدی فیلان – بئشمکان… آچیب بیر کلمه‌ ده دئیه‌ بیلمیردی. اونا گؤره بو دیوارا قورخا- – قورخا قولاق آسیردی. اؤلومو گلیب دوروردو گؤزونون قاباغیندا. قارانلیقدا دیوار قارالا- قارالا قاری‌‌نین اوستونه یئریییردی. دونن یئنه بو دیواردان ائشیتدی کی، یازدا، ایللاه دا یازین ایندیکی آیلاریندا، اؤلوم چوخ اولور. چوخ قوجالار بو فصیلدن ساغ چیخمیر. بو سؤزو ائشیدنده اؤزونه یئر تاپمیردی.

گئجه‌نین یاریسی یوخودان آییلدی. ها چالیشدی یوخولاسین بیر شئی چیخمادی. قولاق‌لاری سسه دوشوب اوغولدادی. بیر خئیلی فیکیرلشدی. آخیردا آغلینا گلدی کی، چارپایی‌سی‌نی پنجره‌یه یاخین چکسین. دوروب هیققانا- هیققانا چارپایی‌سینی پنجره‌نین قاباغینا سورودو. دؤشه‌مه‌دن آنقیرتییا اوخشار قریبه سسلر چیخدی. قونشولار یوخودان آییلیب. بیر- بیرینه دئدی‌لر. میلانین قیزلاری بالیش تولازلاماسینا چیخدیلار. ایت‌لر هوروشوب پیشی‌یین قویروغونو دیش‌له‌دی. پیشیک جین سسی چیخاریب پرده‌یه دیرماشدی. طوطو قوشو ککیلینی قاباردیب بئش- آلتی دفه چیغیردی.

– صاباحین خئییر! صاباحین خئییر؟…

او بیری قونشولار دا اویانیب اورا- بورا قاچدیلار. کونج‌ده- بوجاقدا دلمه- دئشیک‌لرده نه‌لری واردیرسا یوخلاییب دریندن نفس آلدیلار. «اینجی قاری»‌نین دیوارینا باخیب سؤیوب- توپوروب یئرلرینه گیردیلر. او بیری قونشودا ایسه اوّلکی کیمی ساکیت‌لیک ایدی. ائله ساکیت‌لیک ایدی کی، قولاق باتیردی.

قونشولارین های- کویونو «اینجی قاری» ‌دا ائشیتدی و فیکیرلشدی کی، اوتوز ایلدن چوخدور بیر بینادا یاشاییرلار، هله بیر قونشوسو اونون دیوارلاری‌نین رنگینی بیلمیر. اؤزو ده بیر قونشوسونون قاپی‌سینی آچماییب. جاوانلیقدا دا همیشه فیکیرلشیردی کی، آداملارا قایناییب- قاریشماق آسان ایش دئییل. بیلیردی کی، بونون اوچون آدامین گرک چوخ شئیی اولا… مثلن بیرینجی نووبه‌ده ائله سیر- صیفتی. یادینا گلیر، عؤمور بویو بورنونو گیزلتمه‌یه چالیشیب. بورنوندان دا، قولاق‌لاریندان دا خجالت چکیب، اوتانیب. «اینجی قاری» همیشه ایشینی ائله قوروردو کی، هئچ کیمدن سؤز گوتورمه‌سین، هئچ کیمین یانیندا باشی آشاغی اولماسین. بس یئنه بو ات پارچالارینا گؤره خجالت چکمه‌لی ایدی.

یادینا گلیر همیشه آداملارین بورونلارینا قولاقلارینا فیکیر وئریردی. اوره‌یی آغرییا- آغرییا اؤزونونکویله توتوشدوروردو. بونا گؤره آیلارلا قاش‌قاباغی آچیلمیردی. ائله بیل ایچینده ده بورنو بویدا بورنو، قولاق‌لاری کیمی قولاقلاری بیتیب ساللانمیشدی.

چیرکین اولدوغونا گؤره آناسی اونو اوشاقلیقدان هارا گلدی گؤندرمیشدی. دوز آلماغا، کیرایه پولو وئرمه‌یه، تویوق ساتماغا. ساچلاری همیشه اوغلان ساچی کیمی قیرخیلی اولوردو.

بیر دفه یادینا گلیر آناسی اونو قاتیق چالماق اوچون مایا آلماغا  گؤندرمیشدی. بیر کیشی قاتیق وئریب عوضینده اوزونو ایکی دفه چیمدیکلمیشدی. ایندی او احوالاتی یئنه خاطیرلادی. او، کیشی‌نین اوزونو بوی- بوخونونو یادینا سالدی. سونرا یادینا سالماغا چالیشدی کی، اوزونون ها طرفی‌نی چیمدیکلمیشدی. الینی اوزونه سورتدو. ایچیندن ائله بیل توستو گلیب کئچدی. باشی هرلندی.

فیکیرلشدی و گؤردو کی او کیشی‌دن سونرا اونا هئچ کیمین الی دیمه‌ییب. گؤزونون قاباغینا چوخ شئی‌لر گتیردی. سونرا ائله بیل او کیشی‌نین الی بوینوندا- بوغازیندا گزدی.

اوره‌یی دؤیونه- دؤیونه قالخیب اوز به اوزده‌کی دیوارین یانینا گلدی. او اوزده‌کی قادینـین سسینی، نفسینی، قهقه‌سینی ائشیتمک ایسته‌ییردی. قولاغینی حسرت‌له اورا دیره‌دی. ساکیت‌لیک ایدی…

پئشمان- پئشمان گلیب چارپایی‌سینا اوزاندی. جاوانلیغینی خاطیرلادی. آیلارلا آلا قارانلیقدان ییغیب دونیانین او باشینداکی ایشینه گئتمه‌یه بیر ده آخشام طرفی یورغون – آرغین قاییدیب اوتاغینا گلمه‌یه قولونو گؤزونون اوسته قویوب، یوخولایانا کیمی فیکیرلشمه‌یی یادینا دوشدو. فیکیرلشدی کی، بوتون عؤمورونو، عؤمورونون ان یاخشی گونلرینی، یول گئدیب- باکی‌‌دان قوبایا، قوبادان باکی‌‌یا، اولان – قالان گونو- گوذرانی، هوسی، جانی بو یول‌لاردا یئییلیب قورتاریب.

هئچ کس‌له کلمه‌ کسیب دانیشمازدی. آخشام‌لار ائوه گلیب چاتانداسا هامینی چئینه‌ییب دیدمه‌یه حاضیر ایدی. دایاناجاق‌لاردا او اوتوبوس‌دان بو تراموایا بو تراموایدان او بیرینه مینه- مینه دایاناجاقلاردا بئزه‌نه‌جن دوناناجان گؤزله‌یه- گؤزله‌یه، قارانلیق کوچه‌لرده قورخا- قورخا کئچه- کئچه، او نووبه‌ده بو نووبه‌ده الینده‌کی یوکلرین یئکه‌لیییندن، آغیرلیغیندان یئره گیره- گیره اوتانا- اوتانا گلیب ائوه چاتیردی. گلیب گؤردو کی، ائوین ایچی ایستی ایشیق‌لی‌دیر. باجی‌سی بیرچک‌لرینی بورور. آناسی کیچیک باجی‌سینی گؤز‌ل دوغموشدو. اونا گؤره باجی‌سینی ائودن چوله بوراخمیردیلار. آخشاما کیمی گؤزگونون قاباغیندا اوتورور، ماهنی اوخویوردو. بوتون عؤمور بویو دا باجی‌سی بئله‌جه زوم- زومه ائده – ائده بیرچک‌لرینی بوروردو. اونا گؤره ‌ده «اینجی»‌نین، باجی‌سیندان زهله‌سی گئدیردی. باجی‌سی هم گؤز‌ل ایدی، هم‌ ده نازلی ایدی. دانیشاندا یاغ کیمی اریییردی، گؤزل گؤزلرینی ائله سؤزورو کی، جان چکیردی. «اینجی» ایسه بئله شئی‌لری باجارمیردی .

بلکه «اینجی» ده گؤزلرینی باجی‌سی کیمی سؤزدوره بیلسه‌یدی اونا دا باخان اولاردی، آمما اونا باخان یوخ ایدی. باخاندا دا تعجّوب‌له قولاق‌لارینا باخیردیلار.

«اینجی قاری» یئرینده عصبی – عصبی قورجالانیب فیکیرلشدی کی، ائله اونون دا سیر- صیفتی او جور اولسایدی، اونو دا او قده‌ر تعریف‌له‌ییب تومارلاسایدیلار اوندان دا گؤز‌ل اولاردی.

او گون‌لر ها چالیشیردی گولوم‌سه‌سین دوداغی قاچمیردی. او احوال- روحییّه ایله کیم قاینایـیب- قاریشایدی؟… کیم‌له داشیب گوله‌یدی؟… نئجه گوله‌یدی؟… «اینجی قاری» بیلیردی کی، آدام‌لارلا قایناییب- قاریشماق اوچون سیر- صیفتدن سونرا لازیم اولان ان واجیب شئی‌لردن بیری ده احوال – روحییّه‌دیر. یاخشی احوال – روحییّه‌ده اولماق اؤزو ده آسان دئییلدی. اونون اوچون ده بؤیوکلو- کیچک‌لی چوخ شئی‌لر لازیم‌ ایدی کی، بونلارین هئچ بیری‌ ده «اینجی قاری»‌یا قیسمت اولمامیشدی.

بو شئی‌لردن بیری‌ ده او ایدی کی، «اینجی قاری»‌ تک ایدی. باجی‌سی دا بو یاخینلاردا او دونیایا کؤچموشدو.

هر یئرده- بولواردا، بازاردا حامام‌دا آروادلار ارلریندن اوشاقلاریندان، خالا قیزلاریندان بی‌بی اوغلانلاریندان نوه‌لریندن دانیشیردی. «اینجی قاری» کیمدن دانیشایدی.؟…

«اینجی قاری» اؤزو کیمی تنها قاری‌لارلا دا اوتوروب- دورا بیلردی. آنجاق اونلار دا بولوارا –باغا تک گلمیردیلر. ایت‌لری ایله، پیشیک‌لری ایله گلیردی‌لر. تک گلن‌لر ده ائوده‌کی ایت- پیشیک‌لریندن دانیشیردیلار. مسئله ایت پیشیک‌ده ده دئییلدی؛ مسئله اوندا ایدی کی، «اینجی‌قاری»‌ چوخدان آداما یوووشماز اولموشدو. اینسانلارلا رفتارینی، اوتوروشونو- دوروشونو ایتیرمیشدی. ایندی بیر آدام‌دان سؤز سوروشوب جاواب وئرمک «اینجی قاری» اوچون عمللی- باشلی چتین بیر مسئله ایدی.

چؤر‌ک، سود آلماغا گئدنده نووبه‌سی چاتانا کیمی الینده‌کی زنبیله یئر تاپمیردی. ساتیجی‌دان چوره‌یین تزه‌لی‌یینی سوروشماق اوچون اوره‌یینده اللی دفه مشق ائدیردی. «بو گونکو چورک تزه‌دیر»؟ «بیلمیرسینیز چور‌ک بو گونونکودور؟»، «… یوخ بودا اولماز». «زحمت اولماسا دئیین چوره‌یی نه واخت آلمیسینیز!»

… یئنه دیوارلارا باخدی. دیوارلار دؤوره ووروب چییین- چییینه ایلیشدیلر. گولدورمک عصب‌لشدیرمک. یویوروب الدن سالماق اوچون اونون قولاغینی گؤزله‌ییردیلر.

فیکیرلشدی کی، گؤره‌سن اونون ‌دا دیوارلارینا قولاق آسان وار؟ توتاق کی، قولاق آسدیلار. نه ائشیده‌جک‌لر؟ ائوینده اوندان باشقا کیم‌ وار کی، اونونلا دانیشیب غیبت قیرسین، دانیشیب- گولسون؟ بیر ده اونونلا کیم ماراقلانیر کی، دوروب دیوالارینا ‌دا قولاق آسسین؟ سونرا فیکیرلشدی کی، کیم‌ ده قولاق آسماسا آنامبالالار قولاق آسارلار کی، اونون اؤلوسونو هامی‌دان تئز یئسین‌لر.

فیکیرلشدی کی، توتاق، او قیزین دئدییی اولدو. بو گئجه کئچیندی سحر نئجه اولاق؟… قونشولار بیله‌جک‌لر، های- کوی قالدیراجاق‌لار…

سونرا فیکیرلشدی کی، هاردان بیله‌جک قونشولار؟ سحرلر سود آلماغا گئدنده قونشولار یوخودا اولورلار. ائوه گلنده ده هئچ کسین اوزونه باخماسین، هئچ کس‌له گؤروشمه‌سین دئیه تئز- تله‌سیک دهلیزدن کئچیب اؤزونو ائوه سالاردی.

یاخشی، بیر گون بیلمه‌‌یه‌جک‌لر، ایکی گون بیلمه‌یه‌جک‌لر، او بیری گون تا او بیری گون کی، بیله‌جک‌لر؟…

سونرا یئنه فیکیرلشدی کی، آخی نئجه بیله‌- بیله‌رلر؟ آللاها شوکور آیلارلا هئچ کسین قاپیسینی دؤیمور، اونون دا قاپیسینی دؤین یوخدور. اونون قاپیسی چوخدان یییه‌سیز، آدام‌سیز کؤهنه آنبارین سؤکولموش قاپی‌سی کیمی بیر قاپی ایدی. اونا ائله گلدی کی، ساکیت، قارانلیق اوتاغی بویویوب. گاه ائله گلدی کی، هاوا سویویوب. سونرا یورغان- دؤشه‌یینی یوخلادی. ائله بیل یورغانی نم ایدی. سونرا یئنه اوزانیب فیکیرلشدی. یادینا یئنه او دیواردان ائشیتدییی سؤزلر دوشدو.

فیکیرلشدی کی، توتاق کی، نئچه گوندن سونرا، نئچه آیدان سونرا اونون مئییتینی تاپدیلار. کیم باسدیراجاق اونو. کیم قبیر قازاجاق؟ کیم آغلایاجاق؟…

«اینجی قاری»‌نین گؤزلری دولدو. آناسی یادینا دوشدو. فیکیرلشدی کی، کاش اونو هئچ تاپماسین‌لار. بیلمه‌سین‌لر نه اولدو، هارا گئتدی…

«اینجی قاری» یئتمیشدن چوخ عؤمور یاشامیشدی. بئله فیکیرلشدییی اولمامیشدی. فیکیرلشدی کی، بو نه گوندو دوشوب؟… قارانلیق کیم‌سه‌سیز اوتاق‌دا نم یورغان- دوشه‌یین ایچینده اوزانیب آغلاییب. بو نه یاشاماق ایدی یاشاییردی؟ گئجه گوندوز قولاغینی دیوارلارا سورته- سورته دیش‌لری‌نی ساچ‌لارینی سایا – سایا…

بوتون عؤمور بویو چکدییی اذیت‌لره دؤزه – دؤزه نه‌یی‌سه گؤزله‌یه‌ر‌ک صبر ائله‌یه- ائله‌یه گئجه‌لری بیر تهر کئچیریب، سحرلری آچا- آچا گوندوزلری بیر تهر باشا ووروب گئجه‌لری گؤزله‌یه- گؤزله‌یه تقاعده چیخمیشدی.

ایندی تام راحات ایدی. بو گون‌لر اوزاقدان اونا نه‌یین‌سه باشلانغیجی کیمی گلیردی. ایندی ایسه اونا ائله گلیردی کی، همین بو باشلانغیجی گؤزله‌یه- گؤزله‌یه بیر- بیر گونلرینی آیلارینی اؤتوره- اؤتوره دئیه‌سن گلیب قورتاراجاغا چیخیب. بوتون اذیت‌لر، چتین‌لیک‌لر قورتاراندان سونرا ائله بیل داها هئچ نه قالمامیشدی. ایندی «اینجی قاری» ‌ها فیکیرلشیردی باشا دوشه بیلمیردی کی، بوتون عؤمور بویو نه‌یی گؤزله‌میشدی. باشا دوشه‌بیلمیردی کی، نییه او بوتون، آدام‌لار کیمی یاشایا بیلمیر؟ بیلمیر نئجه یاشاسین، نه ایله یاشاسین، نه اوچون یاشاسین؟! نییه تقاعده چیخاندان سونرا باشینی سوخماغا یئر تاپمیر؟ مگر او گئجه- گوندوز ایشله‌مک اوچون یول گئدیب پول قازانماق اوچون یارانیب!؟ فیکیرلشدی کی، بوتون عؤمورونو دئمک اولار کی، ایندیکی کیمی تنها یاشاییب. اوّل‌لر هئچ اولماسا ایشده بیر آداملا کلمه‌ کسیردی، سؤز سوروشوب جاواب وئریردی. ایندی هئچ بو دا یوخ ایدی. ایندی هفته‌لرله آغزینی آچیب بیر کلمه دانیشمیردی. آیلارلا بیر آدام اونا مراجعت ائتمیردی. سؤز سوروشموردو. اوزون ایل‌لر ایدی اؤز آدینی ائشیتمیردی. «اینجی قاری»‌ فیکیرلشدی کی، بئله گئتسه آدی دا یادیندان چیخاجاق. بو واخت میلانین طوطو قوشوسو یئنه چیغیریب اوچ- دورد دفه دئدی «صاباحین خئیر! صاباحین خئیر…»

«اینجی قاری» فیکیرلشدی اونون دا بئله بیر طوطوسو اولسایدی یاخشی اولاردی. قونشولارین دیوارلارینا قولاق آسماقدان گئجه – گوندوز ناحاقدان عصبی‌لشیب هیرسلن‌مکدنسه، ساچ‌لارینی ساییب حساب-کیتاب ائله‌مکدنسه طوطو قوشو ایله یاشاماق یاخشی اولار.

سحری‌سی «اینجی قاری» میلادان طوطو قوشو ساخلایان کیشی‌نین عنوانی‌نی آلدی. آیاقلارینی سوروتله‌یه- سوروتله‌یه اورا یول‌لاندی. یولدا، یئنه آغلینا اللی جور فیکیر گلدی… گاه فیکیرلشدی کی، بیردن طوطو قوشونون بیتی اولار ائوینه بیت دوشر. بئله فیکیرلشدی ایسته‌دی قاییتسین. سونرا فیکیرلشدی کی، بیردن طوطو قوشو گئجه‌لر یاتمادی. قویمادی… یئنه ایسته‌دی قاییدا. سونرا نه فیکیرلشدیسه قاییتمادی.

عینی ایله میلانین طوطو قوشونا اوخشار بیر طوطو قوشو آلیب ائوه قاییتدی. ایچری گیرن کیمی تنگ‌نفس قفسی ایستولون اوستونه قویدو. اللری اسه- اسه قفسین اورا بوراسینی تاققیلداتماغا باشلادی. طوطو قوشو اللرینی جیزدی. طوطو قوشو دیللنمدی. قاری‌یا ایری- ایری باخدی گؤزلرینی دویدو «اینجی قاری» طوطو قوشونا یالوارماغا باشلادی:

– قوربانین اؤلوم دئنن «صاباحین خئیر، صاباحین خئیر! صاباحین خئیر» طوطو قوشو اوزونو او بیری طرفه چئویردی.

«اینجی قاری» فیکیرلشدی کی، یقین قوش آجدیر. بیر آز یئمک وئره‌ر اؤزونه گلر. آپاریب قفسی ائیواندان آسدی. بیر آز چؤرک اوودو، قوشون قاباغینا سپدی. اؤزونه چای تؤکه- تؤکه فیکیرلشدی کی، هه داها جانی دیوارلارا قولاق آسماقدان قورتاردی. ایندی قونشولاری ها دانیشسین‌لار، ها غیبت قیریب اونون دا دالینجا دئیین‌سین‌لر، اؤزلرینی اؤلدورسونلر. ایندی اونون طوطو قوشوسو وار. بوندان سونرا او طوطو قوشوسو ایله دانیشاجاق. اونا تزه سؤزلر اؤیرده‌جک. ائله بونلاری فیکیرلشدی کی، ائیواندان قوشونون سسی گلدی طوطو قوشو چیغیریب دئییردی: «صاباحین خئیر! صاباحین خئیر….»

«اینجی قاری»‌نین نه‌یه گؤره‌سه توکلری بیز- بیز دوردو. فیکیرلشدی کی، یقین میلانین طوطو قوشودور. قاچیب یاواش- یاواش یاخینلاشدی. طوطو قوشوسو اؤزونه هم صحبت تاپمیشدی. میلانین طوطوسو ایله دانیشیردی. بو دئییردی «صاباحین خئیر» او بیری‌سی ‌ده اونا جاواب وئریردی. «صاباحین خئیر! صاباحین خئیر». طوطو قوشلارین سسی عالمی باشینا گؤتورموشدو…

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *