طوطو قوشو/ آفاق مسعود
قولاغيني سحردن بري سويوق ديوارا ياپيشديريب گؤزله‌ييردي. قونشولارين رنگ به رنگ سسلري‌نين ايچينده آرا- سيرا ديوارلارين ايچي ايله قاچيب داشلاري خيرچيلدادان کرتنکله‌لرين ده سسيني ائشيديردي. هردن کرتنکله‌لر آز قاليردي قولاغينا دولوشالار. ائله بيل کرتنکله‌لر داشلاري ديديب توکدوکجه، ديوالار ياواش- ياواش يئييليب نازيليردي. ديوارلار نازيلديکجه قونشولارين دانيشيقلاري لاپ آيدين ائشيديليردي.
ائوي بو ياخينلاردا سؤکه‌جک‌ديرلر. ايندي‌دن ائله اؤز – اؤزونه سؤکولوردو. تاختالاري ساللانيردي قاپي- پنجره‌لري لاخلاييردي. دؤشه‌مه‌سي جيريلداييردي. ««اينجي‌قاري»»نين اؤزو ده ائله ايدي. گئت- گئده اللري، آياق‌لاري توتموردو. ديشلري چورويوب تؤکولوردو، جييه‌‌‌رلري خيش- خيش خيشلداييردي ديوارلارين ايچيني ده کرتنکله‌لر يئييب بوشالتماق‌دا ايديلر. ديوارين سويوغو قولاغينا دولموشدو. قولاغي اوشويوردو، گيزيلده‌ييردي. آغريييردي، آمما ديواردان آيريلميردي.
قوجا ايدي… اونسؤز دا جاني هميشه بومبوز اولوردو. آلتدان- اوستدن گئيينيب قيفيللانيب، قاپي- باجاني باغلاييب گاه پيلته‌سيني يانديريردي. دال با دال ديلي، دوداغي يانا- يانا اوست – اوستدن چاي ايچيردي. يئنه بالاجا، رنگ‌سيز بدني، قورو ال – آياغي ايسينميردي. ائله بيل ايچينه سامان دولدورموشدولار. ««اينجي‌قاري»» قولاق‌لاريني اونا گؤره ديوارلارا سورتموردو کي بو ايشدن حظّ آليردي ياخود قونشولاريندان زهله‌سي گئديردي. نه ائده‌يدي؟ نه قده‌ر اؤز- اؤزويله نرد اويناييردي، اؤز اؤزونو اودوب، اؤز- اؤزونو اودوزوردو. نه قده‌ر گؤزگويه باخيب چوروين ديشلريني گؤريدي؟…
ياخينداکي کيتابخانادا اوخوماديغي اثر قالماميشدي. آخير واختلار کيتابلارين اوز صحيفه‌سينه، قييمتينه، بوراخيلما تاريخينه، تيراژينا باخيردي. اؤز- اؤزونه مولليفين نه قده‌ر آلديغيني حسابلاييردي. صحيفه‌لري، جيلدلري يوخلايير بير- بيري ايله توتوشدوروب مقاييسه ائديردي.
ائوينده هر شئي حدديندن آرتيق تميز ايدي. سليقه‌لي، يئرلي- يئرينده ايدي. صانديقلاري، سييريتمه‌لري، ايشکافلاري توکوب ايچينده‌کيني آزي اللي دفه دييش- دويوش ائله‌ييب تزه‌دن ييغميشدي. قاب- قاشيغي او قده‌ر يويوب- سورتموشدو کي، تاوالار، قازانلار گؤزگو کيمي پاريلداييردي. دؤشه‌مه‌سي‌ني او قده‌ر يويوب قورولاميشدي کي، رنگي گئتميشدي، تاختالاري سودان شيشيب آچيلميشدي. ديبچک‌ده‌کي گوللر سولانماقدان يئتيشيب سارالميشدي. يئکه‌ليب يونسؤز گونه دوشموشدولر. بيچاقلار ايتيلتمک‌دن نازيليب اييلميشدي. شوشه‌لري ائله تميز ايدي کي، کوچه‌دن کئچن‌لر ائله بيليرديلر ««اينجي قاري»»نين پنجره‌لري شوشه‌سيزدي. پالتارلاري يويوب چنگه‌لمکدن، سيخيليب بورلماقدان، قايناماقدان سؤزولوب جيريليردي. يورغان- دؤشه‌يينه کيمي آچيب يونونو ديدميشدي، داراميشدي. داها نه ائده‌يدي؟….
بوتون بونلاردان سونرا «اينجي‌قاري» اؤزو ايله مشغول اولوردو. ديرناقلاريني توتور، دابانلاري‌نين قابيغيني سويوردو. آرتيق- اورتوغونو کسيردي. سون واختلار ياناقلاريندا بيتمه‌يه باشلاميش توکلري بير- بير گؤزلري ياشارا- ياشارا قوپاريردي.
ساعات‌لارلا نبضيني آختاريردي، تاپميردي. عصبي- عصبي بيلک‌لريني، سينه‌سيني يوخلاييردي.
آخير- آخير دا لاپ خووفلو اولموشدو. ساچلاري تؤکولدوکجه جانينا قورخو اوشوتمه دوشوردو. آز قاليردي اوره‌يي گئتسين. ساچلاري تؤکولدوکجه باشي دا گؤزونه بالاجا گورونوردو.
ساعات‌لارلا گؤزگونون قاباغيندا اوتوروب يئرده قالان ساچلاريني، اوّل ساغلام، سونرا چوروموش ديشلريني ساييردي. هر دفه ده گاه ديش‌نين بيريني آرتيق، گاه دا اسکيک حسابلاييردي. اؤز- اؤزونه گؤتور- قوي ائله‌ييردي؛ چورويوب تؤکولن ديشلريني بير- بير يادينا ساليردي. بونلار دا قورتاراندان سونرا «اينجي قاري» قولاق‌لاريني ديوارلارا سؤيکه‌ييردي. ائله بيل ديوالارين هره‌سي بير آدامين بدني ايدي. «اينجي قاري» بير- بير اونلارا قولاق آسيب ايچينده‌کي درد- آزاردان خبر توتوردو. ديوارلاري پوسماقدان ائله بيل قولاقلاري بؤيوموشدو. ايندي يئکه قولاقلاري ديوارين او طرفينده دانيشانلارين نفس‌لريني ده ائشيديردي.
کيشي آرواديني سؤيوردو:
– بوش بوغاز!! مين دفه دئميشم ائشيتديييني، اونون – بونون اووجونا قويما. آي سنين…
سونرا سس کسيلدي. کيشي توپوروب قاپيني چيرپدي.
«اينجي قاري» دا هيجانلاندي. نفسي تنگي‌دي. تؤوشويه- تؤوشويه ديواردان آرالاندي. کيشي‌نين اليندن دئيينه- دئيينه اؤزونه چاي تؤکدو. سونرا گئديب سويوقدان گؤيريب – اييلميش قولاغيني او بيري ديوارا ديره‌دي. اوردان سس گلميردي. پئشمان- پئشمان قاييديب چارپاياسينا اوزاندي. «اينجي قاري» قونشولارينا ائله بلد ايدي کي، آياق‌لاري‌نين سسيندن ايستولون، چارپايي‌نين جيريلتي‌سيندان ايستيکان- نلبکي‌نين جينگيلتي‌سيندن ده هر شئيي باشا دوشوردو. ائله بيل «اينجي قاري» قولاقلاري ايله گؤروردو.
ديوارلارا باخدي. اوچ ديوارين هر بيري بير قونشونون ديواري ايدي. «اينجي قاري» هر اوچ قونشونون جيکيني- بؤکونو بوتون عاييله عضولري‌نين ترجومه-ي‌‌حاليني، بير- بيرينه اولان مناسيبتي، هر گون کيمين هارا گئتديييني، هاردان گلديييني، اونلارين اؤزلريندن ده ياخشي بيليردي. آيلارلا قونشولاري‌نين اوزلريني گؤرمه‌سه ده اونلارلا بيرگه آغلاييردي، هيرسله‌نيردي گولوردو.
ديوارين بيرينه «اينجي قاري» آنجاق گئجه‌لر قولاق آسيردي. ائله سؤزلر ائشيديردي کي، قارينين اولان – قالان ساچلاري بيز- بيز دوروردو…
جور به جور کيشي سسي گليردي. نازيک، قالين، خيريلتي‌لي؛ قادي‌نين سسي ايسه ائله همين سس ايدي. عيني جور دانيشيردي، عینی جور گولوردو، قاققيلداييرديلار. قاري قيپ – قيرميزي قيزاريردي. گؤزگويه باخيب آچيق – آيدين گؤروردو کي، گؤزل‌لشيب، ياناقلاري چئهراييلاشيب.
ايسته‌ييردي قولاق آسماسين آمما باجارميردي. قولاق آسديقجا سويوقدان گؤيرميش قولاقلاري ايسينميردي. قيزاريردي. قانا دولوب لوککولدييردي. بيليردي کي، بوگون- صاباح دوشوب اؤله‌جک و بير ده آنادان اولماياجاق. بوتون بونلاري بيله- بيله «اينجي قاري» اونو دا بيليردي کي، هله عؤمورونده بئله- بئله شئي‌لر ائله‌مه‌ييب.
اونا گؤره ايندي ديوارين او طرفينده‌کي، آرواد قريبه- قريبه سؤزلر دئيه‌ن‌ده، گولنده، قاري آنلاييردي کي، داها ماراقلي شئي‌لر وارميش. او شئي‌لري «اينجي قاري» بو قده‌ر ياشاميشدي، هئچ بيري‌نين دادينا باخماميشدي. ايندي بونلارا او، کناردان باخا بيلردي، قولاق آسا بيلردي. بو بيري ديوارين او اوزونده قيرخ- اللي ياشلاريندا «ميلا» آديندا کومبول بير قادين ياشاييردي. «اينجي قاري» اونو قصدن «ميلا» چاغيريردي. دئييردي کي، «مئلا» دئيه بيلمير، ديلينه ياتمير.
ميلانين دورد قيزي وار ايدي. قيزلاردان باشقا ايکي ايت، پيشيک و بير طوطو قوشو ساخلاييردي.
بو ديوارا «اينجي قاري» هردن بير قولاق آسيردي. ايتين، پيشي‌يين سسي ائشيديليردي. بير ده طوطو قوشو سحر- آخشام چيغيرا- چيغيرا عینی سؤزو دئييردي: «صاباحين خئير! صاباحين خئير».
ميلا گيل‌ده مهربانچيليق ايدي. ايت- پيشيک‌له، پيشيک قيزلارلا، قيزلار بيري- بيري ايله اويون اويناييرديلار.
«اينجي قاري» ميلادان اييره‌نيردي. چونکي ميلا گؤزونون قاباغيندا ايت‌لري چيميزديريردي. پيشي‌يي اوپوردو، طوطو قوشونون بيت‌لريني تميزله‌ييردي. ساغ طرف‌ده‌کي ديوارا ايسه، او ديوارا کي، باياق اونون او اوزونده هيرسلي کيشي آرواديني سؤيوردو، «اينجي قاري» ساعات‌لارلا قولاق آسيردي.
اورادا شهرين ان آغير عاييله‌لريندن بيري ياشاييردي. بو عاييله او قده‌ر آغير ايدي کي، «اينجي قاري»گيلين دهليزلري ده بو آغيرليقدان اييلمکده ايدي. بو ديوارين او تاييندان «اينجي قاري» سايسيز- حسابسيز سؤيوش، غیبت – قارغيش ائشيديردي. گون اورتالار، کيشي ائوده اولماياندا قيزلار بير- بيري ايله سؤزله‌شيب ووروشوردولار آغلاييب اوشاقلاري دويوردولر. يا دا آنا- بالا اوتوروب هر گون آرتـيب اوست- اوسته گلن پول‌لاري ساييرديلار. «اينجي قاري»دان دا دانيشيرديلار. قيزلاردان هانسي‌سا دئييردي کي، «او دا آدام‌دي؟ بيت کيمي ياشايير…» آناسي دا دئييردي کي، «عيبي يوخ، گون گلر او دا اؤلر اوتاق‌لارين آلاريق».
«اينجي قاري» آز قاليردي هوشونو ايتيرسين. نه ائده‌يدي؟ نئجه گئديب دئيه‌يدي فيلان – بئشمکان… آچيب بير کلمه ده دئيه بيلميردي. اونا گؤره بو ديوارا قورخا- – قورخا قولاق آسيردي. اؤلومو گليب دوروردو گؤزونون قاباغيندا. قارانليقدا ديوار قارالا- قارالا قارينين اوستونه يئريييردي. دونن يئنه بو ديواردان ائشيتدي کي، يازدا، ايللاه دا يازين اينديکي آيلاريندا، اؤلوم چوخ اولور. چوخ قوجالار بو فصيلدن ساغ چيخمير. بو سؤزو ائشيدنده اؤزونه يئر تاپميردي.
گئجه‌نين ياريسي يوخودان آييلدي. ها چاليشدي يوخولاسين بير شئي چيخمادي. قولاقلاري سسه دوشوب اوغولدادي. بير خئيلي فيكيرلشدي. آخيردا آغلينا گلدي کي، چارپاييسيني پنجره‌يه ياخين چکسين. دوروب هيققانا- هيققانا چارپاييسيني پنجره‌نين قاباغينا سورودو. دؤشه‌مه‌دن آنقيرتييا اوخشار قريبه سسلر چيخدي. قونشولار يوخودان آييليب. بير- بيرينه دئدي‌لر. ميلانين قيزلاري باليش تولازلاماسينا چيخديلار. ايت‌لر هوروشوب پيشي‌يين قويروغونو ديش‌له‌دي. پيشيک جين سسي چيخاريب پرده‌يه ديرماشدي. طوطو قوشو ککيليني قابارديب بئش- آلتي دفه چيغيردي.
– صاباحين خئيير! صاباحين خئيير؟…
او بيري قونشولار دا اويانيب اورا- بورا قاچديلار. کونج‌ده- بوجاقدا دلمه- دئشيک‌لرده نه‌لري وارديرسا يوخلاييب دريندن نفس آلديلار. «اينجي قاري»نين ديوارينا باخيب سؤيوب- توپوروب يئرلرينه گيرديلر. او بيري قونشودا ايسه اوّلکي کيمي ساکيت‌ليک ايدي. ائله ساکيت‌ليک ايدي کي، قولاق باتيردي.
قونشولارين هاي- کويونو «اينجي قاري» دا ائشيتدي و فيکيرلشدي كي، اوتوز ايلدن چوخدور بير بينادا ياشاييرلار، هله بير قونشوسو اونون ديوارلاري‌نين رنگيني بيلمير. اؤزو ده بير قونشوسونون قاپيسيني آچماييب. جاوانليقدا دا هميشه فيکيرلشيردي کي، آداملارا قايناييب- قاريشماق آسان ايش دئييل. بيليردي کي، بونون اوچون آدامين گرک چوخ شئيي اولا… مثلن بيرينجي نووبه‌ده ائله سير- صيفتي. يادينا گلير، عؤمور بويو بورنونو گيزلتمه‌يه چاليشيب. بورنوندان دا، قولاق‌لاريندان دا خجالت چکيب، اوتانيب. «اينجي قاري» هميشه ايشيني ائله قوروردو کي، هئچ کيمدن سؤز گوتورمه‌سين، هئچ کيمين يانيندا باشي آشاغي اولماسين. بس يئنه بو ات پارچالارينا گؤره خجالت چکمه‌لي ايدي.
يادينا گلير هميشه آداملارين بورونلارينا قولاقلارينا فيکير وئريردي. اوره‌يي آغرييا- آغرييا اؤزونونکويله توتوشدوروردو. بونا گؤره آيلارلا قاش‌قاباغي آچيلميردي. ائله بيل ايچينده ده بورنو بويدا بورنو، قولاقلاري کيمي قولاقلاري بيتيب ساللانميشدي.
چيرکين اولدوغونا گؤره آناسي اونو اوشاقليقدان هارا گلدي گؤندرميشدي. دوز آلماغا، کيرايه پولو وئرمه‌يه، تويوق ساتماغا. ساچلاري هميشه اوغلان ساچي کيمي قيرخيلي اولوردو.
بير دفه يادينا گلير آناسي اونو قاتيق چالماق اوچون مايا آلماغا گؤندرميشدي. بير كيشي قاتيق وئريب عوضينده اوزونو ايکي دفه چيمديکلميشدي. ايندي او احوالاتي يئنه خاطيرلادي. او، کيشي‌نين اوزونو بوي- بوخونونو يادينا سالدي. سونرا يادينا سالماغا چاليشدي کي، اوزونون ها طرفي‌ني چيمديکلميشدي. اليني اوزونه سورتدو. ايچيندن ائله بيل توستو گليب کئچدي. باشي هرلندي.
فيکيرلشدي و گؤردو کي او کيشي‌دن سونرا اونا هئچ کيمين الي ديمه‌ييب. گؤزونون قاباغينا چوخ شئي‌لر گتيردي. سونرا ائله بيل او کيشي‌نين الي بوينوندا- بوغازيندا گزدي.
اوره‌يي دؤيونه- دؤيونه قالخيب اوز به اوزده‌کي ديوارين يانينا گلدي. او اوزده‌کي قادينـين سسيني، نفسيني، قهقه‌سيني ائشيتمک ايسته‌ييردي. قولاغيني حسرت‌له اورا ديره‌دي. ساکيت‌ليک ايدي…
پئشمان- پئشمان گليب چارپايي‌سينا اوزاندي. جاوانليغيني خاطيرلادي. آيلارلا آلا قارانليقدان ييغيب دونيانين او باشينداکي ايشينه گئتمه‌يه بير ده آخشام طرفي يورغون – آرغين قاييديب اوتاغينا گلمه‌يه قولونو گؤزونون اوسته قويوب، يوخولايانا کيمي فيکيرلشمه‌يي يادينا دوشدو. فيکيرلشدي کي، بوتون عؤمورونو، عؤمورونون ان ياخشي گونلريني، يول گئديب- باکي‌‌دان قوبايا، قوبادان باکي‌‌يا، اولان – قالان گونو- گوذراني، هوسي، جاني بو يول‌لاردا يئييليب قورتاريب.
هئچ کس‌له کلمه کسيب دانيشمازدي. آخشام‌لار ائوه گليب چاتانداسا هاميني چئينه‌ييب ديدمه‌يه حاضير ايدي. داياناجاقلاردا او اوتوبوس‌دان بو تراموايا بو تراموايدان او بيرينه مينه- مينه داياناجاقلاردا بئزه‌نه‌جن دوناناجان گؤزله‌يه- گؤزله‌يه، قارانليق کوچه‌لرده قورخا- قورخا کئچه- کئچه، او نووبه‌ده بو نووبه‌ده الينده‌کي يوکلرين يئکه‌ليييندن، آغيرليغيندان يئره گيره- گيره اوتانا- اوتانا گليب ائوه چاتيردي. گليب گؤردو کي، ائوين ايچي ايستي ايشيق‌لي‌دير. باجي‌سي بيرچك‌لريني بورور. آناسي کيچيک باجي‌سيني گؤزل دوغموشدو. اونا گؤره باجي‌سيني ائودن چوله بوراخميرديلار. آخشاما کيمي گؤزگونون قاباغيندا اوتورور، ماهني اوخويوردو. بوتون عؤمور بويو دا باجي‌سي بئله‌جه زوم- زومه ائده – ائده بيرچک‌لريني بوروردو. اونا گؤره ده «اينجي»نين، باجي‌سيندان زهله‌سي گئديردي. باجي‌سي هم گؤزل ايدي، هم ده نازلي ايدي. دانيشاندا ياغ کيمي اريييردي، گؤزل گؤزلريني ائله سؤزورو کي، جان چکيردي. «اينجي» ايسه بئله شئي‌لري باجارميردي .
بلكه «اينجي» ده گؤزلريني باجي‌سي كيمي سؤزدوره بيلسه‌يدي اونا دا باخان اولاردي، آمما اونا باخان يوخ ايدي. باخاندا دا تعجّوب‌له قولاقلارينا باخيرديلار.
«اينجي قاري» يئرينده عصبي – عصبي قورجالانيب فيکيرلشدي کي، ائله اونون دا سير- صيفتي او جور اولسايدي، اونو دا او قده‌ر تعريف‌له‌ييب تومارلاسايديلار اوندان دا گؤزل اولاردي.
او گون‌لر ها چاليشيردي گولوم‌سه‌سين دوداغي قاچميردي. او احوال- روحييّه ايله کيم قاينايـيب- قاريشايدي؟… کيم‌له داشيب گوله‌يدي؟… نئجه گوله‌يدي؟… «اينجي قاري» بيليردي کي، آدام‌لارلا قايناييب- قاريشماق اوچون سير- صيفتدن سونرا لازيم اولان ان واجيب شئي‌لردن بيري ده احوال – روحييّه‌دير. ياخشي احوال – روحييّه‌ده اولماق اؤزو ده آسان دئييلدي. اونون اوچون ده بؤيوکلو- كيچک‌لي چوخ شئي‌لر لازيم ايدي کي، بونلارين هئچ بيري ده «اينجي قاري»يا قيسمت اولماميشدي.
بو شئي‌لردن بيري ده او ايدي کي، «اينجي قاري» تک ايدي. باجي‌سي دا بو ياخينلاردا او دونيايا کؤچموشدو.
هر يئرده- بولواردا، بازاردا حامام‌دا آروادلار ارلريندن اوشاقلاريندان، خالا قيزلاريندان بي‌بي اوغلانلاريندان نوه‌لريندن دانيشيردي. «اينجي قاري» کيمدن دانيشايدي.؟…
«اينجي قاري» اؤزو کيمي تنها قاري‌لارلا دا اوتوروب- دورا بيلردي. آنجاق اونلار دا بولوارا –باغا تک گلميرديلر. ايت‌لري ايله، پيشيک‌لري ايله گليردي‌لر. تک گلن‌لر ده ائوده‌کي ايت- پيشيک‌لريندن دانيشيرديلار. مسئله ايت پيشيک‌ده ده دئييلدي؛ مسئله اوندا ايدي کي، «اينجي‌قاري» چوخدان آداما يوووشماز اولموشدو. اينسانلارلا رفتاريني، اوتوروشونو- دوروشونو ايتيرميشدي. ايندي بير آدام‌دان سؤز سوروشوب جاواب وئرمک «اينجي قاري» اوچون عمللي- باشلي چتين بير مسئله ايدي.
چؤرک، سود آلماغا گئدنده نووبه‌سي چاتانا کيمي الينده‌کي زنبيله يئر تاپميردي. ساتيجي‌دان چوره‌يين تزه‌لي‌ييني سوروشماق اوچون اوره‌يينده اللي دفه مشق ائديردي. «بو گونکو چورک تزه‌دير»؟ «بيلميرسينيز چورک بو گونونکودور؟»، «… يوخ بودا اولماز». «زحمت اولماسا دئيين چوره‌يي نه واخت آلميسينيز!»
… يئنه ديوارلارا باخدي. ديوارلار دؤوره ووروب چييين- چييينه ايليشديلر. گولدورمک عصب‌لشديرمک. يويوروب الدن سالماق اوچون اونون قولاغيني گؤزله‌ييرديلر.
فيکيرلشدي کي، گؤره‌سن اونون دا ديوارلارينا قولاق آسان وار؟ توتاق کي، قولاق آسديلار. نه ائشيده‌جک‌لر؟ ائوينده اوندان باشقا کيم وار کي، اونونلا دانيشيب غیبت قيرسين، دانيشيب- گولسون؟ بير ده اونونلا کيم ماراقلانير کي، دوروب ديوالارينا دا قولاق آسسين؟ سونرا فيکيرلشدي کي، کيم ده قولاق آسماسا آنامبالالار قولاق آسارلار کي، اونون اؤلوسونو هامي‌دان تئز يئسين‌لر.
فيکيرلشدي کي، توتاق، او قيزين دئدييي اولدو. بو گئجه کئچيندي سحر نئجه اولاق؟… قونشولار بيله‌جک‌لر، هاي- کوي قالديراجاق‌لار…
سونرا فيکيرلشدي کي، هاردان بيله‌جک قونشولار؟ سحرلر سود آلماغا گئدنده قونشولار يوخودا اولورلار. ائوه گلنده ده هئچ کسين اوزونه باخماسين، هئچ کس‌له گؤروشمه‌سين دئيه تئز- تله‌سيک دهليزدن کئچيب اؤزونو ائوه سالاردي.
ياخشي، بير گون بيلمهيهجکلر، ايکي گون بيلمهيهجکلر، او بيري گون تا او بيري گون کي، بيله‌جک‌لر؟…
سونرا يئنه فيکيرلشدي کي، آخي نئجه بيله- بيله‌رلر؟ آللاها شوکور آيلارلا هئچ کسين قاپيسيني دؤيمور، اونون دا قاپيسيني دؤين يوخدور. اونون قاپيسي چوخدان يييه‌سيز، آدام‌سيز کؤهنه آنبارين سؤکولموش قاپيسي کيمي بير قاپي ايدي. اونا ائله گلدي کي، ساکيت، قارانليق اوتاغي بويويوب. گاه ائله گلدي کي، هاوا سويويوب. سونرا يورغان- دؤشه‌ييني يوخلادي. ائله بيل يورغاني نم ايدي. سونرا يئنه اوزانيب فيکيرلشدي. يادينا يئنه او ديواردان ائشيتدييي سؤزلر دوشدو.
فيکيرلشدي کي، توتاق کي، نئچه گوندن سونرا، نئچه آيدان سونرا اونون مئييتيني تاپديلار. کيم باسديراجاق اونو. کيم قبير قازاجاق؟ کيم آغلاياجاق؟…
«اينجي قاري»نين گؤزلري دولدو. آناسي يادينا دوشدو. فيکيرلشدي کي، کاش اونو هئچ تاپماسين‌لار. بيلمه‌سين‌لر نه اولدو، هارا گئتدي…
«اينجي قاري» يئتميشدن چوخ عؤمور ياشاميشدي. بئله فيکيرلشدييي اولماميشدي. فيکيرلشدي کي، بو نه گوندو دوشوب؟… قارانليق کيم‌سه‌سيز اوتاق‌دا نم يورغان- دوشه‌يين ايچينده اوزانيب آغلاييب. بو نه ياشاماق ايدي ياشاييردي؟ گئجه گوندوز قولاغيني ديوارلارا سورته- سورته ديشلريني ساچلاريني سايا – سايا…
بوتون عؤمور بويو چکدييي اذيت‌لره دؤزه – دؤزه نه‌يي‌سه گؤزله‌يه‌ر‌ک صبر ائله‌يه- ائله‌يه گئجه‌لري بير تهر کئچيريب، سحرلري آچا- آچا گوندوزلري بير تهر باشا ووروب گئجه‌لري گؤزله‌يه- گؤزله‌يه تقاعده چيخميشدي.
ايندي تام راحات ايدي. بو گون‌لر اوزاقدان اونا نه‌يين‌سه باشلانغيجي کيمي گليردي. ايندي ايسه اونا ائله گليردي کي، همين بو باشلانغيجي گؤزله‌يه- گؤزله‌يه بير- بير گونلريني آيلاريني اؤتوره- اؤتوره دئيه‌سن گليب قورتاراجاغا چيخيب. بوتون اذيت‌لر، چتين‌ليک‌لر قورتاراندان سونرا ائله بيل داها هئچ نه قالماميشدي. ايندي «اينجي قاري» ها فيکيرلشيردي باشا دوشه بيلميردي کي، بوتون عؤمور بويو نه‌يي گؤزله‌ميشدي. باشا دوشه‌بيلميردي كي، نييه او بوتون، آدام‌لار کيمي ياشايا بيلمير؟ بيلمير نئجه ياشاسين، نه ايله ياشاسين، نه اوچون ياشاسين؟! نييه تقاعده چيخاندان سونرا باشيني سوخماغا يئر تاپمير؟ مگر او گئجه- گوندوز ايشله‌مک اوچون يول گئديب پول قازانماق اوچون يارانيب!؟ فيکيرلشدي کي، بوتون عؤمورونو دئمک اولار کي، اينديکي کيمي تنها ياشاييب. اوّل‌لر هئچ اولماسا ايشده بير آداملا کلمه کسيردي، سؤز سوروشوب جاواب وئريردي. ايندي هئچ بو دا يوخ ايدي. ايندي هفته‌لرله آغزيني آچيب بير کلمه دانيشميردي. آيلارلا بير آدام اونا مراجعت ائتميردي. سؤز سوروشموردو. اوزون ايل‌لر ايدي اؤز آديني ائشيتميردي. «اينجي قاري» فيکيرلشدي کي، بئله گئتسه آدي دا ياديندان چيخاجاق. بو واخت ميلانين طوطو قوشوسو يئنه چيغيريب اوچ- دورد دفه دئدي «صاباحين خئير! صاباحين خئير…»
«اينجي قاري» فيکيرلشدي اونون دا بئله بير طوطوسو اولسايدي ياخشي اولاردي. قونشولارين ديوارلارينا قولاق آسماقدان گئجه – گوندوز ناحاقدان عصبي‌لشيب هيرسلن‌مکدنسه، ساچلاريني ساييب حساب-کيتاب ائله‌مکدنسه طوطو قوشو ايله ياشاماق ياخشي اولار.
سحري‌سي «اينجي قاري» ميلادان طوطو قوشو ساخلايان کيشي‌نين عنواني‌ني آلدي. آياقلاريني سوروتله‌يه- سوروتله‌يه اورا يول‌لاندي. يولدا، يئنه آغلينا اللي جور فيکير گلدي… گاه فيکيرلشدي کي، بيردن طوطو قوشونون بيتي اولار ائوينه بيت دوشر. بئله فيکيرلشدي ايسته‌دي قاييتسين. سونرا فيکيرلشدي کي، بيردن طوطو قوشو گئجه‌لر ياتمادي. قويمادي… يئنه ايسته‌دي قاييدا. سونرا نه فيکيرلشديسه قاييتمادي.
عینی ايله ميلانين طوطو قوشونا اوخشار بير طوطو قوشو آليب ائوه قاييتدي. ايچري گيرن کيمي تنگ‌نفس قفسي ايستولون اوستونه قويدو. اللري اسه- اسه قفسين اورا بوراسيني تاققيلداتماغا باشلادي. طوطو قوشو اللريني جيزدي. طوطو قوشو ديللنمدي. قاري‌يا ايري- ايري باخدي گؤزلريني دويدو «اينجي قاري» طوطو قوشونا يالوارماغا باشلادي:
– قوربانين اؤلوم دئنن «صاباحين خئير، صاباحين خئير! صاباحين خئير» طوطو قوشو اوزونو او بيري طرفه چئويردي.
«اينجي قاري» فيکيرلشدي کي، يقين قوش آجدير. بير آز يئمک وئره‌ر اؤزونه گلر. آپاريب قفسي ائيواندان آسدي. بير آز چؤرک اوودو، قوشون قاباغينا سپدي. اؤزونه چاي تؤکه- تؤکه فيکيرلشدي کي، هه داها جاني ديوارلارا قولاق آسماقدان قورتاردي. ايندي قونشولاري ها دانيشسين‌لار، ها غیبت قيريب اونون دا دالينجا دئيين‌سين‌لر، اؤزلريني اؤلدورسونلر. ايندي اونون طوطو قوشوسو وار. بوندان سونرا او طوطو قوشوسو ايله دانيشاجاق. اونا تزه سؤزلر اؤيرده‌جک. ائله بونلاري فيکيرلشدي کي، ائيواندان قوشونون سسي گلدي طوطو قوشو چيغيريب دئييردي: «صاباحين خئير! صاباحين خئير….»
«اينجي قاري»نين نه‌يه گؤره‌سه توکلري بيز- بيز دوردو. فيکيرلشدي کي، يقين ميلانين طوطو قوشودور. قاچيب ياواش- ياواش ياخينلاشدي. طوطو قوشوسو اؤزونه هم صحبت تاپميشدي. ميلانين طوطوسو ايله دانيشيردي. بو دئييردي «صاباحين خئير» او بيري‌سي ده اونا جاواب وئريردي. «صاباحين خئير! صاباحين خئير». طوطو قوشلارين سسي عالمي باشينا گؤتورموشدو…