اوخوماق زامانی: 3 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

qudrat sahlan

سحر تئزدن جماعت قالاقاپیسینا تؤکولموش، شهردن ابوطالیبی آپارماغا گلن مامورلاری گؤزله‌ییردی. اورادان گئچن چایین اوتای-بوتایینداکی مخلوغون چوخو، اوجادان ابوطالیبی یامانلاییب اونون کؤچورولمه‌سینی حاقلی بیلیردی. آزیدا جینقیرینی چیخاردانماییب، اوره‌گینده ابوطالیبی قیناسادا، اونون یازیق آداملارین الیندن توتماسینیدا آنیردی و بئله‌جه کندین بوتون یامان ایشلرینی ابوطالیبین اوستونه آتماغی حاقسیز سانیردی. هر حالدا، چوخلاری ابوطالیبله گنج اوغلونو پیس آدام بیلیب بو باره ده یازیلان پیتیگی بارماقلامیشدیلار. هله، یاخین کندلردنده پیتیگه بارماق باسمیشدیلار. دئمه‌لی، بلگه‌لره دایاناراق ابوطالیبین عاییله‌سینین کؤچورولمه‌سی آیدینجاسینا دوغرو قرار گؤرسنیردی.
اؤتن آیلاردا ایش گلیب او یئره چاتمیشدی، گوجلو ابوطالیب زمیلرینده ایشله‌ینده، ایکی نفر یاخین آداملاریندان، قمه‌دن-کرکی‌دن گؤتوره‌رک دؤوره‌سینه دولاناراق اوندان مواظیب اولوردولار. ائله‌جه، ابوطالیبین طایفاسی اونو بوشلاماییب آرخاسیندا دوروردو. ابوطالیبده طایفاسینا گوونرک، هده-قورخولاری سایمیردی. سونوجدا، ابوطالیبله اوغلونا خاطیر کندده ایکی تیره‌لیک یارانمیش، بیرطرفده یالنیز ابوطالیبین طایفاسی و قارشی طرفده کندین باشقا طایفالاری بیرلشمیشدیلر. بئله‌جه، او گون تک قالان طایفا قورخوسوندان سسینی چیخاردانمیردی. دئمک ابوطالیب گئتمه‌لی ایدی.
هاندان هانا، اوچ نفر آتا مینمیش توفنگلی مامور، بیر گوروهبانلا ایکی سرباز، گلدیلر. اونلار کند ایچینده آتلارینی چایین ساغ الیندن سوروب، قالا قاپیسینا یئتیشنده اوراداکی کؤرپودن چایین سول الینه گئچدیلر. گئدیب قالاقاپیسیندان گؤرسنن ابوطالیب‌گیلین حیطلرینه گیردیلر. بیر موددت سونرا، ابوطالیبله عاییله‌سینی دؤوره‌له‌یرک ائویندن ائشیگه چیخارتدیلار.
او زاماندا، کندده ائوده قالان قالمامیش، هامی قالاقاپیسیندایدی. بو باساباسدا، بیردن بیره، چایدا پالتار یویان بیر دول قادین، ابوطالیبین اوغلونو گؤستره رک گوروهبانی خیطاب ائدیب اوتانمادان دئدی: “جناب سروان، بو کؤپک اوغلو بیر دفعه ده منه دولاشیبدی!!” سربازلار دونوخوب قالارکن، گوروهبان اودغونوب جوابیندا دئدی: “ائله ذاتلارا بیز یئتشمه ریک، محکمه یئتیشر!” هامی هویوخ قالیب ابوطالیبله عاییله عوضوولری باشلارینی آشاغی تیکدیکده، ابوطالیبین اوغلو غورورلا باشینی قالدیریب، بیر آز قادینا، بیرآزدا جماعته باخدی. اوسته لییب اوز توتوب گوروهبانا دئدی: “جناب سروان، او آروادا بیر دفعه یوخ، اوچ دفعه دولاشمیشام!! اولوکی یادیندان چیخیب!!” اویان-بویاندان ابوطالیبین اؤلوسونه-دیریسینه یامان-یوغوز یاغدیقدا، گرگینلیگی حیس ائدن گوروهبانین رنگی قاچدی. سانکی ساندی بیرآزدا دایانسالار، ابوطالیبگیلی اللریندن آلیب اؤلدوررلر. اونا گؤره توفنگینی گؤستره رک جماعته قیشقیردی: “یاخین گلمه یین! … اوزاقلاشین!” آردینجا سربازلارینی هارایلادی: “تئز اولون سورون گئده ک! دایانمایین!” سوندا چایین سول الیندن یولا دوشوب ابوطالیبگیلی یوردلاریندان اوزاقلاشدیردیلار.
بلکه ده ابوطالیب گیل، هله یاری یولا یئتیشمه میشدیلر کی، بیر سیرا کیشی، ابوطالیبین حیطینه ساری یوللاندیلار. گئدیب دیواریندان آشیب تاختا قاپیسینی آچیب ابوطالیبین ائوینه تپیلدیلر. اونلارین آردینجا چوخلو آدام حیطه دولوشدولار. دئیه سن، هر نمنه ابوطالیبین ائوینده اولسایدی، آپاریلمیشدی. تکجه، پیه سینده قارا اؤکوزو قالیردی. اونودا، ائله بیل، ائله او گون عم اوغلانلاریندان بیری، ریضا اوغلو قاسیم، گلیب آپاراجاق ایمیش. آنجاق دونن گئجه قاسیم یارالانیب گله بیلمه میشدی. دئییردیلر، دونن دوکانلارین بیرینده، ایکی نفر قاسیمی قارشلاییب دئمیشدیلر: “طایفازین چوخوندان پول ییغمیشیق! سنده پول وئر بیزه، وئرک مامورلارا صاباح عم اوغلوو ابوطالیبی کنددن آپارسینلار!؟” جوابلاریندا، قورخماز قاسیم اونلارین ده ده ننه لرینی قاریشدیرمیشدی! بئله لیکله یاخالاشمیشدیلار. او حینده، بیر باشقاسی دالیدان بالتانی قاسیمین باشینا اندریب ساغ قولاغینی باشیندان آییرمیشدی. او اوچ نفر قاسیمی قانینا بولاشدیریب قاچیب گئتمیشدیلر. … آنجاق دونن قاسیمی ایشدن سالانلار، بوگون ابوطالیبین ائوینه گیرنلر آراسیندا گؤرسنیردیلر!
ابوطالیبین حیطینه گلن جماعتین بعضیسی تئزراق قاییتماق ایسته‌ییردی. آمما بعضیسی ائوی بوجاقلاریناجان آختاریردی. گورونوردوکی، بونلارین آراشدیرمالاری نتیجه‌سیز قالیردی! هله بعضیلری دام-دیوارلارا دیرماشیردی. اونلارین بایراقلاری یوخ ایدی، یوخسا ابوطالیبین دامینا سانجاردیلار! بالا-بالا گلنلر حیطی بوشالدیب قاییدیردی.
او دورومدا، بیر نفر پیه ده اؤکوزو گؤستررک یانینداکی یولداشینا دئدی: “وآلله بونو کسمه‌سک منیم اوره‌گیم سویوماز! عمه‌م آغلایا-آغلایا دئیردی، داعوادا او طالیب‌گیلین بابالاری منیم بابامی اؤلدورموشدولر!!” آردینجا جماعته قیشقیردی:”اولان، هارا گئدیرسیز بس؟! گلین بو اؤکوزو چیخارداق کسک!!” بیر باشقاسی یاخینلاشیب اونون فیکیرینی بینیب اؤکوزون بئلینی تومارلاییب دئدی: “سن اؤلمه، اتی بیر کندی گؤرر! آرتیقدا قالار! چاتی گتیرین!” بئله لیکله یییه‌سیز اؤکوزون دؤوره‌سینی آدام آلدی.
اونلار، یاردیملاشاراق، اؤکوزون بوینونا چاتی باغلادیلار. بندینی کسدیلر. حئیوانین صاحابینی یامانلایا-یامانلایا، اونو پیه‌دن حیطه و حیطدن کوچه‌یه چیخاتدیلار. سوره‌رک قالا قاپیسنا گتیردیلر و چایین قیراغینا یئتیردیلر. اورادا چاتینی اؤکوزون قاباق قیچلارینا دولاییب ترپنمه‌سینه ماجال وئرمه‌ییب دیلسیز-آغیزسیز حئیوانی بؤیرو اوسته ییخدیلار. پیچاغی بوغازینا قویوب قیبله‌یه ساری کسدیلر. داغیلیب گئتمیش جماعتین چوخو، بیر-بیرینه “قاییدین ابوطالیبین اؤکوزونو کسیرلر! ” دئیه دؤنموشدولر. دول آرواددا آیری پالتار گتیریب اوولکی یئرینده یویوردو.
یئر شوخوملایان اؤکوزو کسندن سونرا ، دریسینی سویدولار . اتینی شاققلاییب دوغرادیلار. قوربان پایی تکین اورادان گئچنه پای وئردیلر. بئله لیکله بو احساندا بیر کندی اورتاق ائتمگه چالیشدیلار! ابوطالیببین الیندن آجیقلی کیشیلر، اؤکوزه ایشاره ائدرک، اؤیونرک گلن-گئدنه دئییردیلر: “گئت کؤپک اوغلو، آدامین باشینا بو اویونلاری گتیررلر!!” کیشیلرین بو سؤیلمینی، اوراداکی اوشاقلاردا بؤیوکلنرک یانسیلاییردیلار.
یاز گونونده، فیض‌اله‌نین اوغلو ایسکندر بو اولایلاری یاخیندان ایزله‌میشدی. آخشام چاتسادا، هله گنج ایسکندرین ائولرینه قاییتماغی گلمیردی. او چاغدا، اؤکوزو کسنلرین بیری، حئیوانین بیر پایجا قالان جیگرینی ایکی اللی گؤتوروب، اونا یاخینلاشیب دئدی: “ایسکندر، گالا بو جیگلریده آپار وئر فیض‌اله عمی‌یه! سنین‌ده ده اوو چوخ یاخچی آدامدی!” و بئله لیکله ایسکندر جیگر الینده ائولرینه دؤنمه‌لی اولدو. یئتیشیب‌ دده‌سینه گؤندریلن پایی تقدیم ائله‌مک ایسته‌دی. آنجاق فیض‌اله الینی قایتاریب آجیقلا اوغلونا دئدی: “اولان، آپار جیگری آت چایا! ییخیلان آغاجا بالتا ووران چوخ اولار!!” ایسکندر دینمز-سؤیلمز دؤنوب چایا طرف گئتدیکده، کندده آلله آدامی تانینان فیض اله آرتیردی: “اوغول، من بیلمیرم ابوطالیبله اوغلو نامیس اوغروسو اولدولار یا اولمادیلار! آنجاق ابوطالیبین اؤکوزونو کسنلر مال اوغروسودولار! اونلارا قوشولما اوغلوم!”

اشتراک گذاری در print
چاپ

2 پاسخ

  1. ساغول قدرت منیم اتا بابامن حکایتنی دوز یازبسان تشکر اولسون سن ابوطابینده ظلم ایلنر گون گورمسن انشالاه کریم زارع ابوطالب نوه سی

  2. سلام

    گؤرکملی ایشیق سایتینین عزیز چالیشانلاری

    منیم یازیمی یایدیغیز اوچون، سیزدن بول-بول تشککور ائدیرم. سیزه اوغورلار آرزولاییرام. مین یاشایین

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *