بوگون چهارشنبه 1 اردیبهشت 1400 ساعات 14:42
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

samad
آذربایجان ناغیل‌لاریندان (حلالزادا قردش ايله حرامزادا قردش)
صمد بهرنگی

بير گون وار ايدی٬ بير گون يوخ ايدی. بير دانا حلالزاده قردش وار ايدی٬ بير دانا حرامزادا٬ شهرده داها ايش يوخ ايدى. بونلار دئیرلر: نه ائله‌یک٬ نه ائله‌مه‌یک؟ دئیرلر: دوراق گئدك بير آيرى شهرده ايش تاپاق.

بونلار دستماللارينا چؤرك باغلارلار٬ دوشرلر يولا. ناهار چاغی يئتيشرلر بير سويون باشينا. حرامزادا قردش دئیر: چؤره گينی آچ یئیک. آخشام دا منيمکين یئیه‌ریک.

 حلالزاده قردش بير سؤز دئمز. دستمالين آچار باشلارلار یئمه‌گه. سونرا گينه دوشرلر يولا. آخشام چاغی يورغون-آرغين يئتيشرلر بير يئره. حلالزاده قردش دئیر: قردش٬ ايندی ده من آجام. گتير چؤرەگيندن یئیک. دئیر: اوغلان٬ گئت ايشينين داليجا! چؤره ک آنجاق منی گؤره‌ر.

بو٬ نه قدر ايللاه ائلر٬ اولماز. آخيردا بونلار ساواشارلار. حلالزادە قردش بير طرفه گئدر٬ حرامزادا قردش بير طرفه.

حلالزاده آج٬ سوسوز گلر يئتيشر بير مغاره يه٬ دئیر گئجه نی بورادا دالدالانيم سحر دوشوم یولا. گيرەر مغاره يه گؤرەر هئچ کيم  يوخدو. بيردن-بيره گؤرەر آياق سسى گلير٬ تئز قاچار گيرەر بير دالدا يئره گیزله‌نر.

گونبولدويا-گونبولدويا بير دانا آيی گلر بير آز سونرا تاپييلديا-تاپبيلديا بير قورد٬ سونرا بير تولکو. بونلار گلرلر اوتورارلار مغاره نين ايچينده.

قورد دئیر: آيی قرده‌ش٬ کئفين برک کؤک دی٬ نه وار؟ دئیر: نه اولاجاق٬ بير دانا خرابه تاپميشام آلتی بوتون خزانه‌دی. گونده گئديرم اورا بير-ايکی تپيک وورورام گونبولدور. سونرا قولاغيمی داييرام قولاق آسيرام.

قورد دئیر: بس٬ مندن خبرين يوخدو. پادشاهين قيزی نوخوشدو. هر نمنه حکيم گتيريبلر اولماييب. داواسين من بيليرم. بير دانا سورو وار٬ ايچينده بير قره قويون٬ او قويونون بئينين قورودسان٬ قيزين بورنونا پوفله سن٬ قيز توخدار. من گونده گؤز ائله‌ييرم اونو قاچيردام. آمما حيف کی٬ چوبان گؤز وئرير٬ ايشق وئرمير. منيم ده شوق-ذوقوم اونادی.

تولکو دئیر: ائله ده قولاق آسين منه٬ بير دانا تپه وار٬ اونون یانيندا بير آقچا سيچان يوواسی وار. بو آقچا سيچان گونده قيزيللاری يوواسيندان چيخاردار سرەر گون قاباغينا اوستونده مللاق سالار. منده اوتورارام تپه‌نین باشيندا اونا تاماشا ائله‌رم.

بونلار بير قدرده دانيشاندان سونرا باشلارين قويارلار ياتارلار.

اوغلان اؤز-اؤزنه دئیر: آی آلاه٬ نئجه اولایدی من سحر چاغی ساغ-سالامت بورادان چيخيب گئدەيديم!

سحرچاغی آيی گونبوويا-گونبولدويا گئدر٬ قورد تاپبيلدايا-تاپبيلدايا. تولکوده گئدر. اوغلان چيخار ائشيگه٬ گئدر تپه‌نين یانينا. گؤرەر بلی٬ تولکو قردش اوتوروب تاماشا ائله‌يير سيچانا. بير داش آتار تولکونون قابيرقاسينا. تولکو دابانا قووت قويار قاچار. سيچان قيزيللاری گون قاباغينا سريب اوستونده مللاق ساليردی. اوغلانين سسين ائشيتجک قاچار گيرەر یوواسينا. اوغلان گلر قيزيللاری گؤتورەر دولدورار جيبينه گئدر سورونون يانينا. بير قدر پول وئرەر قره قويونو آلار. باشين کسر. لشين وئره‌ر چوبانا. گتيرەر بئينين قورودار تؤکر بير شوشه‌يه. گلر شاهين عمارتينين قاباغيندا باشلار: حکيمم٬ طبيبم!

شاهين آداملاری چيخار دئیر: اوغلان اينديه‌جه نمنه حکيم گليب بو قيزی توخدادا بيلمه ييبلر٬ شاه وئريب باشلارين کسيبلر. گل قوی چيخ گئت!

اوغلان دئیر: اولسون٬ من ده باجارا بيلمه‌سم٬ منی ده اؤلدورتسون.

اوغلانى گتيرەرلر ايچريه. دئیر: هامی اوتاقدان چيخسين. هامی چيخار. قيزيلان اوغلان تک قالارلار. اوغلان شوشه‌نی چيخاردار٬ بير آز پوفلر قيزين بورنونا٬ قيز آسقيرار دورار آياغا.

شاه گؤرەر قيزى توخدادی٬ سئوينديگيندن بيلمز نه ائله سين. دئیر: منى ایسته‌ین بونا انعام٠

هر طرفدن اوغلانين باشينا قيزيل ياغديرارلار.

شاه دئیر مندن بيرزاد ايسته!

اوغلان دئیر من هئچ زاد ايسته‌ميرم٬  دئديگين کيمي قيزينی وئر منه بير ده شهرين ائشيگينده کي خرابه‌نی.

شاه دئیر: اولسون٬ قيزيمی وئرديم سنه. خرابه ده سنين.

اوغلان گلر خرابه‌نی سؤکدورەر. خزانه‌نی چيخاردار. سونرا بير دانا گؤزل-گؤيچک عمارت دوزلتديره‌ر٬ شاهينکيندان دا آرتيق٬ قيزی دا آلار.

بير گون کوله فرنگی ده اوتورموشدو گؤرەر حرامزادا قردش جيريم-جيندا ايچينده ال-آياق نه شيخدا اورادان کئچير. اونو يانينا چاغريتديرار.

دئیر: اوغلان منی تانيرسان؟

دئیر: قوربانين اولوم٬ یوخ!

دئیر: من هامان آدامام کی٬ بير تيکه چؤره‌کدن اؤترو مندن آيريلدين.

بو اوغلان بير باشين قاوزار دوروست باخار گؤرەر اؤزودو.

دئیر: سن نه ائله‌دين بئله دؤولتلی اولدون؟

اوغلان باشينا گلن حال-قضيه‌نی بونا دئیر.

دئیر: من ده گئتسم اولار؟

دئیر: بيلميرم.

حرامزادا قردش دورار گئدر مغاره‌ده گیزله‌نر. بير آز سونرا گونبولدويا- گونبولدويا بير آيی گلر. سونرا تاپبيلدايا-تاپبيلدايا بير قورد. سونرا تولکو. بونلار بئکئف-بئداماق اوتورارلار يئره. بيردن تولکو دئیر: قردشلر٬ بيز اوندا کی بورادا دانيشيرديق حتما بير نفر بنی آدام قولاق آسيرميش. دورون بورانی بير آختاراق.

دورارلار آياغا. مغاره نی آختارارلار. اوغلانی تاپارلار٬ بودارلار.

یک پاسخ

  1. گؤزلریمنن آخدی گئتدی
    سون باخیشین باخدی گئتدی
    قالدیم یانیق کؤنول ایندی
    کؤزکؤنلومه تاخدی گئتدی

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *