گئتدیم
محمدحسین طهماسب پور (میرزه شهرک)
سوروشما گل نییه دوستوم
تهراندان اینجیدیم گئتدیم!
جانا گلدیم شیرین جاندان
جاناندان اینجیدیم گئتدیم!
بوندان آرتیق دؤزنمه‌دیم،
دریا‌سیندا اوز‌نمه‌دیم،
اینجی‌لرین دوز‌نمه‌دیم،
عمّاندان اینجیدیم گئتدیم!
بولود اولوب باخان اولدوم،
دَریلمه‌دیم واغان اولدوم،
تاپدالانمیش موغان اولدوم،
جئیراندان اینجیدیم گئتدیم!
یاد ائیله دیم شهریاردان،
قوی بلله نسین یاخشی یامان،
دئدیم دییشیلسین مکان،
مکاندان ایجیدیم گئتدیم!
حاققا قارشی دورانمادیم،
مانع لری وورانمادیم،
خانیلان باشارانمادیم،
سولطاندان اینجیدیم گئتدیم.
الکلنمیش اَلک‌ایدیم،
چرخی دؤنموش فلک‌ایدیم،
فیریشته‌ایدیم، ملک‌ایدیم،
شئیطاندان اینجیدیم گئتدیم!
نئیله‌میشدیم روز‌گارا،
آتدی دیاردان دیارا ،
یارام اوستَن ووردو یارا،
درماندان اینجیدیم گئتدیم!
یاندیم ائله یانمایانا ،
دوز چؤره‌یی آنمایانا،
قوربان اولدوم قانمایانا،
قاناندان اینجیدیم گئتدیم!
قولوما دیره‌ک تاپانمادیم،
چیرپینان اوره‌ک تاپانمادیم،
او جور کی گره‌ک تاپانمادیم،
دؤوراندان اینجیدیم گئتدیم!
رقیبیمی دوست تانیدیم،
پوزولمامیش بوستانیدیم،
یازیلمامیش دستانیدیم،
عنواندن اینجیدیم گئتدیم!
گؤز یاشیم کیمسه سیلمه‌دی،
نامردلر دئییر بیلمه‌دی
کؤنلومه قوناق گلمه‌دی،
مهماندان اینجیدیم گئتدیم!
یاشاییشیم آغیر اولدو،
گاهدان چیغیر باغیر اولدو،
دئمیر قیزیم صاغیر اولدو،
اوغلاندان اینجیدیم گئتدیم!
آیریلیب بوداغیم قالدی،
انجمنیم، باغیم قالدی،
داشیم دوشدو، داغیم قالدی،
آراندان اینجیدیم گئتدیم!
بو گئن دونیا رقیبین کی،
مقام سوودا رقیبین کی،
گمی، دریا رقیبین کی،
طوفاندان اینجیدیم گئتدیم!
میزده، تختده سنین اولسون،
آینا باختدا سنین اولسون،
پایتاخدا سنین اولسون،
من سندن اینجیدیم گئتدیم!
اوزاق یئره گئتمه میشم،
عشقیمی ترک ائتمه میشم،
چَنده گؤزدن ایتمه میشم،
دوماندان اینجیدیم گئتدیم!
دوتدوم آنامین سوراغین،
باجی، قارداش چای – بولاغین،
تبریز آچمیشدی قوجاغین،
هیجرادان اینجیدیم گئتدیم!
یک پاسخ
سوزلرون بالدان شیریندی ساغول محمودی