بیرگون شهریمیزین خیاوانلارینین بیریندن کئچنده گؤزوم بیر سلمانی دوکانینا ساتاشدی. ائله بیردن بیره ال آتدیم باشیما، توکلریمی سیغاللادیم، ائله دوشوندوم کی باشیمین توکلرینی آزالتسام یاخجی اولار.
گیردیم دوکانا اوتوردوم صندلده. سانادیم و دؤردونجو آدام اولدوغومو بیلدیم. بیر نفرین ایشی قورتاردی. پاراسینی وئرنده گؤردوم کی ماغازا صاحیبی یعنی باش ووران آغا اینسانلاری چوخ اوتاندیران ادبلی دانیشیقلا نئچ قات آرتیق پارا آلیر.
صحنه:
مشتری: آغا ساغ اولاسیز، اللریز آغریماسین، من نئچه وئرمه‌لی اولدوم؟
سلمانی: بویورون، قابیلی یوخدو، اؤز دوکانیزدی و …
مشتری: تشککور ائدیرم، نئچه اولار بویورون تقدیم ائدیم؟
سلمانی: بابا سیز الله قویون قالسین، اصلا قابیلی یوخدو، ائله بیر پول دئییل کی، بورا ائله سیزیندی…
مشتری: پارالارینی جیبیندن چیخاریب توتور اونون قاباغینا کی بویورون نئچه‌دیر گؤتورون.
سلمانی: خواش ائلیرم ایندی کی قبول ائله‌میرسیز سگگیز تومن لطف ائله‌سز گؤرر، گینه‌ده قابیلی یوخدو…
آنجاق گؤردوم کی اینسانلاری اوتاندیراراق آرتیق پارا آلماسینا شرایط یارادیر. اؤزوده عادی وضعیتده ایشینین پاراسی اوچ مین اولار، یادا داش چارتلاسا دؤرد مین.
من بیر آز اوتوردوم و بیر نئچه دقیقه‌دن سونرا قالخدیم، آمما سؤز منی سانجیلاتمیشدی. ائله‌سینه چیخیب گلمک اولمازدی، گرک بیر سؤز دئیئیدیم. آیاغا قالخمیشدیم، دئدیم: منه ایجازه وئرسز من گئتمه‌لییم.
او مشترینی الدن وئرمک ایسته‌میردی و تئز، دئدی: الان نسکافه‌میز حاضیر اولار قوربان، کافی‌میکس، هانکیسین مئیل ائدیرسیز اونو گتیریم؟
دئدیم: یوخ معده ناراحتلیغیم وار، ایچه بیلمرم ساغ اولون.
فرصت وئرمه‌دن، دئدی: ایندی کی چوخ تلسیرسیز، من آغالاردان ایجازه آلیم سیزی قاباغا سالاق.
دئدیم: یوخ عزیزیم من ایستیرم نئچه آلاجاغینیزی بیلیم؟ گؤروم اوتورمالییام یا یوخ!
دئدی: او نه سؤزدی قوربان،هئچ سیزین شخصیتیزه یاراشمیر ناقابیل سؤزلرین اوستون آچاسیز! بورا سیزین اؤز دوکانیزدی قوربان، سیزدن پول ایسته‌ین کیمدی!!!… بیز سیزین خدمتکاریزیق…
سؤزو آلمیشدی و منه ماجال وئرمیردی کی بیرجه کلمه داها دانیشام. آنجاق آرادا بیر بالاجا فورصت تاپیب، دئدیم: منیم یانیمدا پولوم آزدی اونا گؤره.
گؤردوکی پولون آزلیق دانیشیغی اولدو، منی ردّ ائتمک اوچون دیلینین اوجوندا،دئدی: سگگیز تومن دی، هر زامان تشریف بویورساز خدمتیزده واریق(معناسی بئله اولدوکی تئز چیخ گئت). دانیشیق ایچینده ال آتمیشدیم جیبیمه پوللاری چیخاردیردیم. بیردن گؤزو ساتاشدی پوللارا تعجبلندی… او کی پوللاری گؤرموشدو… دئدی: بس هارا؟ سیز الله بویورون اوتورون(یعنی پولون کی وار دا هارا گئدیسن(
دئدیم: گؤردویونوز کیمی پارا وار، آمما سؤز بوردادیرکی منیم باشیم سگگیز تومنه دَیمز، منیم باشیم اوجوز باشدی…
سلمانی قارداش اوزدن گئتمک و منی الدن وئرمک ایسته‌میردی و یئنه ده مهارتله باشلادی: خئییر قوربان، سیز الله خواش ائلیرم، ظاهیریزدن بللی دی کی یوخاری شخصیتلی‌سیز،سیز چوخ محترم اینسان سیز، تَرپه‌نیشیغیزدان معلومدوکی شهریمیزین مقاماتیننان سیز،من سیزی چوخ یئرده مجلیس لرین یوخاری باشیندا گؤرموشم،شخصیت لی آغاسیز، قابیل بیر آدام سیز، چوخ قابیل‌سیز…
قاپینی آچا-آچا دئدیم: قارداش اؤزوم اؤزومو یاخشی تانیییرام، منیم باشیم او قیمته ده‌یسئیدی اگر، ایندییه جان قویمازدیلار منده قالسین؛ چوخدان آلمیشدیلار. خودافیز قارداش. یازیقلار اولسون میللته، بیله بیله کی سن آرتیق پارا آلیرسان اوتانجلاریندان آغیز آچمیرلار و هئچده سَسلری چیخمیر. یاخچی یولونو تاپمیسان واللاه، سنین بو باجاریقیوادا عشق اولسون.آمما حاق آشیغی بؤیوک عاشیق علعسگرین بیر باشماقچی ایله دانیشیغینی اؤرنک اولاراق سنه دئییرم یادیندا ساخلا:
سیزینکی گَلَر گئده‌ر اینه بیزینن
بیزیمکیده گَلَر گئدر سؤزونن
هاممییا دوز باخ او ایکی گؤزونن
حالال مالیوا حارام قاتما حاییفسان.
18/۱/۹۳