کیمدیر گوناهکار …؟
رقیه کبیری
ائشیدنده اوره‌ییم سیخیلدی. هر بیریسی آ فرهادین بیر شیرین-ی اولماسایدی دا، آنجاق اورک یاغی‌ایلا، بیلک گوجویله قازانمیش اؤز پاراسی‌یلا ۲۰ ایل عرضینده بو قده‌ر کیتابی «خانه‌ی کتاب» آدلی بیر مکاندا توپلامیشدی. ایندیسه قولاغیمیزین دیبینده، گؤزوموزون اؤنونده، گونون گون‌اورتا چاغیندا– داها کیتاب اوخویان، کیتاب امانت آپاران یوخدی،- دئیه، بو مکانین قاپیسی تاختالاندی. بیر مدت کئچندن سونرا حتّا آدی بئله اونودولاجاق. زامانین آخیمی بیزلرده ائله تاثیر بوراخاجاق کی، دئیه‌سن او قده‌ر رمان، شعر، فلسفه، تاریخ و… کیتابلارینی آ فرهاددان امانت آلیب، اوخویانلار بیزلر دئییلمیش.
ائشیتدی‌ییمده دئدیم «گئدیم احتیاجیم اولان کیتابلارین بیر نئچه‌سینی ده من گتیریب کیتاب رفلریمه دوزوم». آ فرهاد همیشه کی کیمی گولش قاباق ایدی. نم ندن اوره‌ییم ایستیردی بو گون اونو قاراقاباق، اوزونتولو گؤروم. سؤزون آچیغی لاپ بئله اوره‌ییم ایستیردی آ فرهاد کیتابلارین یاسینی توتوب، اییرمی ایل سوره‌سینده توپلادیغی معنوی ثروتینی، اؤکوتمه ایله آغلایا- آغلایا پای- بؤلوش ائله‌سین. آمما آ فرهاد تاسف‌لرینی، اوزونتولرینی گولوشلری‌نین آرخاسیندا گیزلتمیشدی. هر یولدان یئتیشن بیر- ایکی کیتابی رفلردن سئچیب، اؤزونه مال ائلیردی. منیم ده اوره‌ییم سیخیلماغا باخمایاراق، آیری‌لارینا تای، مئیوه‌نی تای باشیندان سئچن کیمی، کیتاب رفلرینده، ایسته‌دیکلریمی آییریب، بیر- ایکی قوجاق ییغدیم…
منه ائله گلیر کی، کیتابین لاپ بئله اویغون یئری، کیتاب رفلری، کیتاب سئونلرین قوجاقلاری، کیتاب اوخویانلارین اللری‌نین آیناسی‌دیر. آمما دئیه‌سن بیزیم اؤلکه‌ده کیتابلارین خاصیتی دئییشیلیب. رفلری بزه‌ییر. قوجاقلار، آلدیغیمیز کیتابلارا فخر ساتیر. اللرین آیناسی دا، دوشونجه‌لریمیز کیمی پاسلانیب.
چئوره‌میزده‌کی اولایلارا گؤره هر ایشدن اوّل گؤزوموز دوغو – باتی‌دا، یا – نه بیلیم – آوروپا اتحادیه‌سینده قالیر. اؤتری اولاراق قارین دولو دانیشیریق. سونرا فیشفیشا کیمی یئریمیزدن قالخیب، یوموروقلاریمیزی گؤیه قالدیریب، سسیمیزی قالخیزیریق. ائله باغیریریق کی، بیر- بیریمیزین سسینی ائشیتمیریک، نه دئدیمیزی بئله دویموروق؛ و کیتابلار گؤزوموزون اؤنونده جان وئریر. یاشادیغیمیز تورپاغین کولتورو عاغلیمیزدان سیلینن کیمی کیتابلار دا حیاتیمیزدان سیلینیر. دئییرم بس بو بئش- اون تومن دَیَرسیز ریال- تومن-یمیزی کیتابا خرجله‌سک، بو سایسیز- حئسابسیز «بزه‌ک» لوازیمی ساتان، آددیم باشی قورولموش «پوشاک»چیلاری‌نین توکان- بازاری باغلانار. اون کیتابین پولونو چین‌دن، تورکیه‌دن وارد اولموش بیر سویا بند اولان دونا خرجلمه‌سک، عملیمیز آشماز. اوندا هاوادا قالمیش اقتصادیمیز گؤیدن یئره دَیَر. ال ائوینده اولانی قوربان پایی وئرمه‌لی‌ییک. کیتابدان، کولتوردن داها یاخین، داها ال ائوینده اولان نه اولا بیلر؟!
کتابلاریمیزین اوتاندیریجی تیراژینا گولوروک. هله بوندان کئچک کی، قلم حؤرمتی اسکی بیر ناغیلا دؤنوب. آدی بئله بیزی داریخدیریر. سانال دویناسیندان ایذن‌لی، ایذن‌سیز قیدالانان سایسیز- حئسابسیز روزنامه‌لر، درگی‌لر و… بوتقالارین اؤنونده، گونش آلتدا ساپ- ساری سارالیر. آغریمامیش باشیم دسمالا داریخمیر. هله دیلیمی قارنیما قویوب، دوستاقلاردا جاوانلیقلارینی هزینه ائله‌ین ژورنالیست‌لردن بیر سؤز دئمیرم. هردن الی بوش، وئیلان- سرگردان قالمیش ژورنالیست‌لره، کیتابلار کیمی اوره‌ییم یانیر.
آ فرهاد بو گونلر، کیتاب اوخویان یوخدی، هئچ کیم گلیب کیتاب امانت آپارمیر،- دئیه، ۲۰ ایل سوره‌سینده توپلادیغی کیتابلارینی بیر ایکی گونون عرضینده پای بؤلوش ائله‌دی. کیتابلاری قوجاغیما ییغا- ییغا اؤز اؤزومه دوشونوردوم: «دئمک بیز بونجا ایل گلدی‌ییمیزده، من بیله‌سی ۲۰ ایل آرخا دا قالمیشیق» حقیقت‌ده نئچه ایل آرخادا قالدیغیمیزی بلکه سیز بیلیرسیز!
۱۳۹۳/۲/۳۱
ایضاح:
20 ایل‌دن سونرا آ فرهادین‌دا(فرهاد ورقائیان) کیتاب ماغازاسی‌نین(خانه کتاب) قاپیسی باغلاندی….
2 پاسخ
درود برجناب آقای فرهاد ورقاییان
انشالله که هرجا هستند سلامت باشند
بنده یکی از شاگردان ایشان در سال‌های ۱۳۵۵و۱۳۵۶ در مدرسه راهنمایی تحصیلی فرهنگ شاگر ایشان بودم وخیلی…
با احترام خدادادی
دوغرودان دا کیتاب نه ییمزه گرک دی!!! چوخدان دی بو یئرلرده داها لاپ یاخشی دوستون ائعتباری یوخدو.