اوستاد مجید امین مؤیدین جنازه‌سی تورپاغا تاپشیریلدی
اؤلکه‌میزین تانینمیش ترجمه‌چیسی، ایران یازیچیلار اوجاغی(کانون نویسندگان ایران) و صابر ادبی انجومنی‌نین دیرلی عضوو اوستاد مجید امین مؤیدین جنازه‌سی خرداد آیی‌نین یئددیسی چرشنبه گونو تهرانین بهشت زهرا مزارلیغی‌نین ۳۱۳ نومره‌لی بؤلومونده تورپاغا تاپشیریلدی. چوخ طنطنه‌لی کئچن بو مراسیمده اوستادین عائله عضولری، آذربایجان ادبی مدنی درنکلرینین و ائله‌جه‌ده کانون نویسندگان ایران عضولری و بیر سیرا اجتماعی و سیاسی موبارزه ساحه‌سینین فعال‌لاری اشتراک ائتمیشدیر. مراسیمین اجراسی اوستادین یاخین دوستلاریندان اولان و اونون خسته‌لیک گونلری درمان پروسسینه مسئولیتله نظارت ائده‌ن حسن ریاضی(ایلدیریم) جنابلارینین عهده‌سینده‌یدی. او ایلک اؤنجه اوستادین خسته‌لیگی و درمان پروسسی باره‌ده معلومات وئره‌رک، عائله عضولری و یاخینلارینین بو حقده تابلاشدیغی اذیت‌لره اشاره ائتدی، سونرا اوستادین اجتماعی شخصیتیندن و اؤلکه صنعتکارلارینین صنعت دوشونجه‌لرینین انکشافیندا قویدوغو دانیلماز تاثیریندن دانیشدی. آذربایجان ادبی مدنی درنکلرینین بو موناسیبتله یایدیغی آذربایجان تورکجه‌سینده بیان‌نامه‌نی شاعر ائلدار موغانلی اشتراکچیلارا چاتدیردی؛ سونرا صابر ادبی انجومنی‌نین اداره هیئتی عضوی شاعر محمدحسین شهرک شعرینی اوخودو و مراسیمین داوامیندا مظفر درفشی، هوشنگ ابتهاج و دکتر آریانپوردان‌دا شعرلر قرائت اولدو. مراسیمین سون سؤزو اوستادین بؤیوک اوغلو جناب خسرو امین مؤیده تاپشیریلدی. او اشتراکچیلاردان تشکر ائده‌رک، مراسیمین همن گونون آخشامی اوستادین اؤز ائوینده داوام تاپماسینی اعلان ائتدی.
