منده اختیار اولسا
رسول رضا

من ایسته‌ییرم:
بولودلار آغلاسین
اوشاقلار آغلاماسین؛
آنالی یا آناسیز.
من ایسته‌ییرم:
گوللر آچیلسین،
گولله‌لر آچیلماسین،
آمانلی یا آمانسیز.
من ایسته‌ییرم:
قاپیلار قاپانسین
سویوق اولاندا هاوا.
گؤزلر قاپانماسین،
سؤزلر قاپانماسین.
من ایسته‌ییرم:
یانغین‌لار سؤنسون،
اومیدلر سؤنمه‌سین.
مئیوه‌لر دیسین اؤز فصلینده.
اورکلره سؤز دیمه‌سین.
بهردن بوداقلار اَییلسین.
اینسان باشینی اَیمه‌سین،
خجالتدن یا گوجسوزلوکدن.
آخسین بولاقلار گؤز یاشی کیمی،
تورپاغین اوزه‌رینده.
گؤز یاشی بولاق کیمی آخماسین
دونیانین هئچ بیر یئرینده.
هر شئی اینسانا باخسین.
اینسان اله باخماسین.
گئجه‌لر اولدوزلار اویاق اولسون.
اینسانلار یاتیب دینجلسین؛
قووت توپلاسین صاباحین
خئییرلی ایشلرینه.
آچسین گؤزلرینی
گله‌جه‌یین اومیدلی سحرینه.
من ایسته‌ییرم:
سئوینج، سعادت بول اولسون.
اورکدن-اوره‌یه،
اؤلکه‌دن-اؤلکه‌یه،
آچیق یول اولسون.
1964