قیسا شعرلر(۱)
فریبا مرتضایی
(۱)
بو اوزون گئجه‌ده
سنسیزلیک
منی اؤلدوره‌جک
بیر آه یوللا چیلله‌لیک
باشیما چکیب یاتیم
(۲)
دونموش اوره‌یین
اووجلاریمدا
دؤن گل اریمه‌دن
گؤزلریم یولوندا
(۳)
گؤزل گونلریمیز
بو یاغان قار کیمی آغ
تر- تمیز اوره‌ییمیز
آه … قاییتمایان گونلریمیز!
(۴)
سوسقونلوق
یاشامین اوزون حئکایه‌سی‌دیر
اوجا اوخو
(۵)
گؤزلرین نؤقصانسیز سؤزلوکدور
کیرپیک چالدیقجا
یئنی صفحه‌لر دؤنور
حئیران قالمیشام
بو باخیشلارین سایسیز آنلامینا
(۶)
سنین یئرینه
ائویمین قاپسین
بو گونلَر شاختا چالیر
(۷)
گؤزلریوین گؤزللییندن سن سوروملوسان
منیم باخیشلاریمی سورغولاما
(۸)
بیر بولود اولایدیم
داملا- داملا دولایدیم
سسلی- سسلی یاغایدیم
سن گلن یول‌لارین
توزون, توپراغین آلایدیم
9 پاسخ
سلام حورمتلی دوستوم. شعرلرینیز چوخ اوره گه یاتیم و گوزلدیر. ال قولونوز آغریماسین.
سلام ائلمین عزیز و حؤرمتلی شاعیری خانیم مرتضایی شعر لریزی اوخدوم چوخ لذت اپاردیم وار اولون یئنی شعر لریزه منتظیرم
ایشیق امکداشلارینا سونسوز تشککورلر .
سلام. عزیز و حؤرمتلی خانیم مرتضایی، قیسا شعرلرینیز دویغو دولو و آنلام لی موتیولرله راحات جا ذئهین لرده قالیجی بیر ایز بوراخیر. ساغ اولون و اوغورلار سیزه.و بو گؤزل حیسّی بیزینن پایلاشدیغینیز اوچون، دیرلی ایشیق سایتینادا تشککور ائدیرم.
عزیز و مؤحترم خانیم مرتضایی اللریز اغریماسین اوخدوم لذت اپاردیم ایشق سایتتین امکداشلارینا سونسوز تشککورلر
سلام عزیز دوستوم حؤرمتلی خانیم ترقی چوخ ساغ اولون اللریز وار اولسون .
حؤرمتلی اسکویی بئی سونسوز تشککورلر سیزه اوغورلار ارزوسوایله
سلام فریبا ی عزیز بسیار زیبا ست . به امید تداوم شعرهایت
لذت بردم ..ممنون
خانم مرتضایی: ساغ اولون بو گؤزل شعرلرینیزه گؤره.لطفا گؤزل حیکایه لرینیزه ده بیزی قوناغ ائله یین.