شعرلر
لئیلی کحالی
(۱)
بیر آز داها اوزاقلاشیب
سئیر ائتمک ایسته‌ییرم اؤزومو!
سن گلن گونو گؤروب
سن یئتیشنده
من هانسی قوشام؟
بیلمک ایسته‌ییرم…
(۲)
بوگون سنی گؤردوم
۱۰ ایل اولوردو گؤرمه‌دیییم
۸ ایل اولور اؤلدویون…
گولوشونله باش باشایدین
دیلیمده دلی قوش اولدو سلام
دولاشدی چیرپیندی
ایچیمده قالدی…
بیریمیز اؤلموشدوک
بیلیردیم یقین
دئدیم بیلسک هانسیمیز
او بیری اؤلر…
سلام وئرمه‌دیم…
(۳)
هاردا آختاریم اؤزومو؟
سنین آدینی وئرسم
پلیس‌لر تاپارمی منی؟
کیم بیلیر
نه بؤیوک مملکت‌دیر
ایچیمده سنسیزلیک…
(۴)
قانادیم یوخدور
منی سس‌سیز بیر نوتا باغلا
کؤچری بیر قوشون گئدیشینده…
سونرا پنجره‌نی باغلا
قوشلار نه زامان قوش اولدولار
و کوچه
هانسی قاپیدا سیندی؟
اونو خاطیرلا…
2 پاسخ
سلام سنی همیشه خوش یاشیاسان چوخ لذت آپردم بو گوزل شعرلریندن
bəyəndim – sağ ol
عزیزیم داغلار آغلار
یارامی باغلار آغلار
بوردا بیر قریب اؤلوب
دردینه داغلار آغلار.