تییه اوستونده
کیان خیاو
یوللاری تییه اوستونده دؤیوروک،دوست!
داغلاری،چایلاری،شه هه رلری بئله.
سن اؤزونده منه دوغرو
من اؤزومده سنه دوغرو
بیز بیرلیکده هارا دوغرو؟
یوللاری تییه اوستونده دؤیوروک.
تورپاق تارلایا دؤنونجه
تارلا سونبوله دولونجا
و سونبوللرین ایچینده بیر قوش یووالانینجا،
دؤنمه یه جه ییک دئییریک بو یوللاردان
دؤنمه یه جه ییک دئییریک.
نه لرسه آختاردیغیمیز بیر شئیلر وار
هارداسا بیر دنیزلر
هارداسا بیر آدالار
هارداسا بیر چیچکلر،قوشلار،آداملار.
و هانکی سا بیر یوخولار
ایچینده بیر شئیلر گؤرمک ایسته دیییمیز یوخولار
بیر شئیلر ده گؤرمک ایسته مه دیییمیز.
قلبیمیزدن بیر چوخ شئیلر کئچه جک،دوست!
بیر چوخ پارا
بیر چوخ پالتار
بیر چوخ پلان.
و پلانلاری دوشلرکن خوشلاناریق
و پلانلار بئینیمیزدن اوغورلانار
و پلانلار بئینیمیزدن اوغورلانار آمما.
قازانمایان بیر طرفین یئنیلمه سی ییک،دوست!
نه تورپاق قالمیش،نه تارلا
نه سونبول،نه قوش یوواسی.
ایتگین دوشموش آختاردیغیمیز سئودالار
بیتگین دوشموش خیال-خولیالاریمیز
سورگون دوشموش یوخولار و خاطیره لر.
دونیانی تییه اوستونده سئیر ائدیریک،دوست!
دؤنوک آخیر بیر-بیرلرینه دنیزلر
دؤنوک دورور آدالار
دؤنوک چیچکلر،قوشلار،و آداملار.
دؤنوک
دؤنوک
دؤنوک
دؤنوشو اولمایان یوللار دا بئله،
بیر-بیرلریندن دؤنوک.
بیزسه دؤنمه یه جه ییک دئییریک هله
دؤنمه یه جه ییک دئییریک،آمما
یوللاری تییه اوستونده دؤیوروک،دوست!
یوللاری تییه اوستونده دؤیوروک.
آبان آیی ۱۳۸۶(۲۰۰۷)
یک پاسخ
چوخ ساغ اولون لذت اپاردیم بو گوزل شعیرینیز اوچون عزیز شاعیر و یازار کیان خیاو