پله‌لری ایکی ـ بیر چیخیردی. بئشینجی قات‌دا دایاندی. باشماقلارینی چیخاردا ـ چیخاردا، قاپینی دا آچدی. ایچری گیردیکده چانتاسینی بیر یانا بوراخیب، اجاق باشینا گئتدی. خانیمی ائوده دئییلدی. اونون ایش یئریندن دؤنه‌جک واختینا ایکی ساعات قالیردی هله. ایکی یومورتا پیشیریب، ایچیمی گمیرن جاناواری ساکن‌لشدیردیکده، چیخاجاغام دئیه‌رک، ال آتدی سویودوجونون قاپی‌سینا. دونن خانیمینین تاپشیردیغی چؤرک و یومورتا یادینا دوشدو. بوش سویودوجونون سویوق نفسی هئچ ده خوشا گلیم دئییلدی. ایسته‌دی قاییتسین، یادینا دوشدو قلیان آلتی یئرینه اداره ده بیر بیسکیوئت یئمیشدی. بیر شئی یئمه‌سم، گئجه‌یه کیمی آجیمدان اؤله‌رم میزیلدادی.
آخشام‌لار بازار آغزیندا بیر آیری شرکت‌ده حسابدارلیق ائدیردی. ایش یییه‌سی قارا قاباق بیر کیشی‌ایدی. گئجیکمه‌یه امکان یوخ‌ایدی. آج با سوسوز پله‌لری ائندی. قول‌لاری یانیندان آسیلیردی. آوتوبوس‌دا آجلیغینا رغماَ نئچه دیقه‌لیک گؤزونو قیزدیرماغا امکان تاپدی. دوز ساعات بئش‌ده اؤزونو یئتیردی شرکته. هله گئجیکمه‌میشدی شوکرو وارایدی. یوخسا ایت اخلاقلی بو آدامین آتماجالارینا دا دؤزمه‌لی‌ایدی.
ماسانین اوستونده استکانین چایی سویوموشدو. ایشدن چیخاندا توکان ـ بازار آچیق اولسایدی قیزینین گر‌ه‌یی اولان مکتب لوازماتینی آلاردی. هر نئچه دیقه‌دن بیر قارشیدا کی ساعاتا باخیردی. بو زهر ده کی هئچ ترپنمک ایسته‌میر سانکی. هاچان دوققوز اولاجاق گؤره‌سن؟
آیاغینی سکی‌یه قویدوقدا، سیر- صفتینی سویوق یوز یئردن سانجدی. قار کولک آدام‌لارین آیاغی کسیلدیکجه قودوروردو. ائله بیل شهرده حکومت دییشیر. بیر آرالیق ایتی باخمایاراق هاوانین سویوغونا، آرخین قیراغینداکی زیبیل‌لری بیر ـ بیر یوخلاییردی. ایکی گون بوندان اول، ائوه یئتیشدیکده، یئنی‌جه اون یاشینا گیرمیش قیزی نظامی کوماندان‌لاری یامسی‌لایاراق، اوندان رسم کاغیذی و بویالی مدادلار ایسته‌میشدی. ایندی ده یقین کی اوتوروب، گؤزون تیکیب قاپییا و آتاسینین الی دولو ایچری گیرمه‌سینی گؤزله‌ییر. چوخ آختاراندان سونرا بیر توکان تاپیب، تاپشیریلمیش شئی‌لری آلدی. سونرا دریندن بیر نفس آلیب، آرخایینجاسینا دوراغا ساری یئریدی. هله دوراغا یئتیشمه‌میشدی کی آوتوبوس یولا دوشدو. آرخادان ال ائله‌سه ده ساخلامادی، گئتدی.
گئجه و سویوق ال ـ اله وئریب، آدام‌لاری خیاوان‌لاردان قووماقدایدی. چاره‌سیزلیکدن تاکسی‌یا مینمک قرارینا گلدی. بیر آزدان تاکسی‌نین ایچینده اوتوروب، ایلیق هاوانین ییرغالاریندا یاتار ـ یاتماز کیمی والایلاییردی. شوفر اورتا یاشلی بیر کیشی‌ایدی. تئز ـ تئز و بعضاَ ده گره‌کسیز ـ گره‌کسیز دنده دییشیردی. اولوب قالان ماشین‌لارین آراسیندان گاه ساغا، گاه سولا دورتولوب، ایره‌لی‌له‌ییردی.
اوچ یولون باشینا یاخینلاشیردیلار. اوردا فرعی‌دن چیخماق ایسته‌ین باشقا بیر ماشین اونلارین گلیب کئچمه‌یینی و یولون آزاد اولماسینی گؤزله‌ییردی. بئش ـ اون ثانیه چکمه‌دن یئتیشدیلر اوچ یولون آغزینا و فرعی یولا دؤنمک ایسته‌دیلر. اؤنجه‌دن دایانان ماشینین شوفری غضب‌لنه‌رک دئدی:
فرعی‌یه دؤنه‌جکدین ایه‌ر، بس نییه راهنما چراغینی یاندیرماییرسان؟ اوندا بیر بئله دایانیب، گئجیکمزدیم.
شوفر الیمدن گلیر دئییب، یولونا دوام ائله‌دی.
