“صباحی” اؤیکو اؤدولونون منصفلر هئیتی معین‌لشدی.
“صباحی اؤدولو” وبلاگی‌نین (http://sabahiodulu.blogfa.com) یایدیغی تکمیلی خبر اساسیندا، گنجعلی صباحی آدینا قورولان ایللیک اؤیکو اؤدولونون منصفلر هئیتی‌نین آدلاری آچیقلانیبدیر. بو خبره اساسن، منصفلر هئیتی‌نین آدلاری بئله‌دیر:
۱- مرتضی مجدفر ۲- نیگار خیاوی ۳- محمود مهدوی ۴- علی‌محمد بیانی ۵- رقیه کبیری ۶- حامد احمدی
بئله‌لیک‌له صباحی ایللیک تورکجه اؤیکو اؤدولونون ایلک ایلی ( ۱۳۹۲ ) اثرلری ییغماغا باشلاییبدیر. بوتون اؤیکو یازانلار شهریور آیینین سونونادک بیر اؤیکونو بو یاریشمایا قاتیلماق اوچون سئچیب، یاریشمانین ایمیل آدرسینه گؤندره بیلرلر. اثرلر آذربایجان تورکجه‌سینده و عرب الیفباسیندا یازیلمالی دیر و اثرلرین ایندی‌یه‌دک باشقا یئرده (کیتاب، درگی، سایت) چاپ اولونماماسی گرکلی دیر.
یاریشمانین سونوجو آذر آیینین ایلک گونونده بللی اولاجاق. بو ادبی یاریشمانین اؤدولو بیر میلیون تومن و ایلک اولان اؤیکونون یازارینا وئریله جک. باشقا ایلک ۹ اؤیکو هدیه لره لاییق گؤرونوب، بیرلیکده بیر کیتابدا یاییلاجاقلار.
یک پاسخ
خبرلریمیز یایماغینا گؤره سیزدن تشکورلر