“دونیا ادبیاتیندان ترجمه لر” نشره بوراخیلدی
بوُ گونلر تهرانداکی پیشگامان پژوهش‌مدار کیتاب ائوی، دکتر مرتضی مجدفر و دکتر محرم آقازاده‌نین، دونیا ادبیاتیندان تورکجه‌یه ترجمه اتئدیکلری شعرلردن کیچیک بیر مجموعه‌نی، تورکجه کیتابلار بازارینا بوُراخمیشدیر. دامجی‌لار– دونیا ادبیاتیندان آذربایجانتورکجه‌سینه ترجمه اوْلان شعرلر؛ آدی ایله نشر اوْلونان بوُ کیتاب، ۶۴ صحیفه‌لیک و پالتویی بیچیمینده و مین یوز جیلد تیراژلا یاییلیبدیر. کیتابین بیرینجی چاپی، ۱۳۹۲- نجی ایلین یاز فصلینده بوُراخیلمیشدیر.
«آنالاریمیزین آغ بیرچک‌لری‌نین عظمتینه تقدیم ائدیریک»، بوُ جمله کیتابین ایلک صحیفه‌سینده دکتر مرتضی مجدفر و دکتر محرم‌آقازاده‌نین طرفیندن یازیلان سؤز دور. سوْنرا «مقدمه یئرینه» آدی ایله مشترک یازیلان، اؤن سؤز گتیریلمیشدیر. سوْنرا سیرا ایله شعرلر گلیر. شعرلر انگلیزجه، اسپانیولجا، عربجه و بعضاً فارسجادان ترجمه ائدیلیبدیر. کیتابدا گتیریلن شعرلر و شاعرلر بوُنلاردیر:
*دؤرد شعر«فدریکو گارسیا لورکا»دان
*لبنانلی شاعیر«جبران خلیل جبران» دان قوُم و کف آدلی بیر شعر
*«فرناندو پسوا» دان ایکی شعر
*«پی‌یر رووردی»، فرانسانین بؤیوک شاعیریندن گونش و یول آیریمیندان آدلی ایکی شعر
* فالکو، آخیجی دیللی موسیقی‌چی شاعیر
*سورگون عاشیغین ماهنی‌لاریندان، عبدالوهاب البیاتی
*«ویلیام بلیک» دن بیر شعر
*9 شاعیر، ۹ هایکو
*«ماتسوئو باسیو» و «موریتاکه» دن دؤرد هایکو
*«سمیع القاسم» و «محمود درویش»دن شعرلر
*آمریکالی شاعیرلر«لاری بایلی» و « هرمن بلوم» دان شعرلر
*شاعیری بللی اوْلمایان بیر انگلیزجه شعردن ترجمه
*انگلیزلی شاعیرلر«استفن اسپندر» و «جفری گریکسون» دان شعرلر
*هم ده « ناظم حکمت»، «محمد عاکیف» و «اورهان سیفی »دن ، تورک شاعیرلری‌نین آدلاری بو مجموعه‌ده اوُنودولماسین دئیه، آذری‌لشمیش بیر نئچه شعر.
شعرلردن سوْنرا، کیتابا ایکی قیسا مؤخره قوْیولوبدور: « محرم آقازاده بیر باخیشدا» و « مرتضی مجدفر بیر باخیشدا».
ناشیر ، بو کیتابا ۳ مین تومن قیمت قویموشدور. کیتابی تهراندا ۸۸۳۴۵۲۱۷- ۰۲۱ نمره‌لی تئلفونا زنگ آچماق ایله الده ائتمک اوْلار. هم ده تبریزده انتشارات ارک(ملا‌زاده)دن، اورمیه‌ده فضولی کیتاب ائویندن، زنجاندا کتابفروشی حکیم‌هیدجی‌دن، و مغان‌دا کتابفروشی تراکتوردان کیتابی آلماق اولار. ناشیرین تهرانداکی شعبه‌سی، کیتابی پست ایله، ایرانین هر بیر طرفیندن ایسته‌ینلره یوللاییر.
کیتابا دکتر مجدفر و دکتر آقازاده‌نین «یوردوموزا دامان دامجی لار» آدلی یازدیقلاری اورتاق مقدمه ده داخیلدیر کی، اونو سیز حؤرمتلی اوخوجولارا تقدیم ائدیریک.
مقدمه یئرینه
یوُردوموزا دامان دامجی‌لار
نئچه ایل دیر بیر چوْخ علمی یئرلرده بیرگه ایشله‌میشیک. نئچه ایل دیر بیرگه کیلاسلاریمیز و سمینارلاریمیز اوْلموشدور. ایللر بوْیو بیرگه یازیب- یاراتمیشیق. اوْرتاق اثرلریمیز منتشر اوْلوب و منتشر اوْلماقدادیر. نئچه ایل، تعلیم‌و‌تربیه وزارتخاناسی‌نین طرفیندن معلم‌لر و دیگر تربیتی حوْزه‌لرده چالیشانلار اوچون یاییلان رشد مجله‌لرینده، بیرلیکده یا آیری- آیری باش کاتیب، تحریریه عضوو و تدقیقی مقاله‌‌لرین یازاری اوْلموشوق. بیزی بیر- بیریمیزه یاخینلاشدیران و بیرلشدیرن علمی ساحه، تربیتی علم‌لر حوزه‌سی‌دیر. آنجاق بوُ اوْرتاق ایشلردن علاوه، بیزی بیر- بیریمیزله، ایللر بوْیو دوْست ساخلایان ساحه، آذربایجانلی اوْلدوغوموز، عادی سؤزلر و حتی علمی بحث‌لری تورکجه دانیشماغیمیز و بوُ آرادا، اؤز دیل و ادبیاتیمیزلا ماراقلانماغیمیز دیر. بیز علمی ایشلردن باش آچارکن، دینجلمک اوچون و روحوموزا ایلنجه وئرمک قصدیله، بیر دینج یئر تاپیب،اؤزوموز دئمیشکن دیمدیکله‌شیب، آنا دیلیمیزده یارادیلان شعر، حئکایه و ادبی- بدیعی یازیلاری اوْخوماقلا، جانلانارکن، یئنی‌دن علمی ایشلره قاریشماغیمیزا گوج تاپاریق. بوُ واختلار، بیزیم ذهنیمیزین دیرچلمک زامانلاری دیر.
نئچه ایللردیر همین قیسا زامانلاردا، دونیا ادبیاتیندان آذربایجان تورکجه‌سینه ترجمه ائتدیییمیز قیسا شعرلری و دیگر یازیلاری بیر- بیریمیزه اوْخویوروق. بوُ یازیلاری عمومیتله انگلیزجه‌دن، بعضاً عربجه‌دن و اسپانیولجادان و هردن ده فارسجا و دیگر دیللردن، آذربایجان تورکجه‌سینه چئویرمیشیک. بوُ ترجمه‌لر بیزیم دوْستلوق گونلریمیزین قالیجی ایزلری دیر.
نئچه ایل بوُ اوْرتاق ایشه باشلاماغیمیزدان سونرا، بیرلیکده بئله قرارا گلدیک کی همان اثرلردن بیر نئچه‌سینی، کیچیک بیر مجموعه شکلینده چاپ ائتدیره‌ک. مجموعه‌نین آدینی دامجی‌لار قوْیموشوق؛ دوْنیا ادبیاتیندان، اؤز تورکجه‌میزه ساری دامان بیر نئچه کیچیک دامجی. هر بیرترجمه‌نین کیمه عاید اوْلدوغونو قید ائتمه‌میشیک. چون کی هر اثری، ایکیمیزدن بیریمیز ترجمه ائتمیش اوْلساق دا، قاباغا گئتدیکجه دییشیلیب، آلت – اوست اوْلوب و نهایت اوْرتاق بیر ترجمه میدانا چیخمیشدیر. بوُ قیسا شعرلر، واختیله بیزی شنلندیریب؛ هله‌ده شنلندیریر و اومید ائدیریک سیزین‌ده حالینیزی خوْش ائتسین.
بیزیم اوْرتاق علمی فارسجا اثرلریمیز، اوْخوجولارین طرفیندن بیر چوْخ اوُغورلار الده ائتمیشدیلر و بیز بوُنا گؤره، اؤزوموزو چوخ بخته‌ور بیلیریک و امینیک کی ادبیاتیمیزا و ائلیمیزین دیلینه ساری دامان بوُ دامجی‌لار دا، آذربایجان شاعیر و ادیب‌لری، هم ده ائلیمیزین هوسکارلاری طرفیندن آلقیشلا قارشیلاناجاقدیر.
یک پاسخ
ساغ اولسونلار ائلیمیزه گونو – گوندن یئنی اثرلر باغیشلایان اوستادلاریمیز. دوکتور مجدفرین ایشلری اوخومالی و دیرلی دیر. یاشاسین و دیلیمیزده یئنی اثرلر بوراخسین.