یئیینله‌‌مه‌‌ییمه جاواب اولاراق، او دا یئیینله‌‌ییردی. وار گوجومله قاچیردیم، فایدا وئرمیردی. دایاندیقدا دایانیردی. گؤزونو بیر آن مندن یاییندیرمیردی؛ گئند‌‌ن باخان دئیه‌‌ردی بس منی قوروماغا چالیشیر، حال بو کی طالعیمه دوشن ایشکنجه‌‌لری شعله‌‌لندیریب، عزرائیلی یامسی‌‌لاماق ایسته‌‌ییردی. گئتدیکجه ده بؤیویوردو، شیشیردی. ائله بیل دره‌‌نین هاواسین تمامی‌‌له اودوب، قارنیندا ساخلاییردی.

آغزی کؤپوکلو سولار دره‌‌نی قاتمیشدی قاباغینا. قیزمیش ده‌‌وه کیمی اؤزون قایالارا چارپاراق یورویوردو. بو  توققوشمادان قوپان شاققیلتی‌‌لاری ائشیده بیلمیردیم آمما. بارماغیملا قولاغیمی قوردالادیم بیر آز، بئکارا بیر ایش‌‌ایدی، کار اولموشدوم ائله بیل. قوش‌‌لارین دا نغمه‌‌سی باتمیشدی. ایسته‌‌دیم دؤنوب گؤرم آرخامجا گلیر یوخسا یوخ، دؤنه بیلمه‌‌دیم. او بؤیوکلوکده دئوین اوزونه نئجه باخاجاقسان؟ آدامین جانی چیخماز می اوندا؟

 یامان یورولموشدوم. اوز ـ گؤزومده‌‌ن تر آخیردی. هردن دئییردیم بس قیچ‌‌لاریم توتولور. دئدیم بیر آز دینجه‌‌لیم بلکه، جرأت ائله‌‌مه‌‌دیم. آرخانجا گلن زیرپی جاناوار عنقریب سنی توتاجاق، شاققالایاجاق و اوشاق‌‌لارینا یئم ائله‌‌یه‌‌جک. نه دینجلمه‌‌سی؟ دایانما، یورو! دایانمادان یورودوم ده.

 گؤره‌‌سن بوینوزلارینین اوجو زهرلی‌‌دیر منی قووالایان بو دئو بالاسی‌‌نین؟  قیرمیزی گؤزلری نه یئکه‌‌لیکده دیر؟ یقین کی اوشاق چاغلاریمدا دینله‌‌دیییم قاری ننه‌‌مین ناغیل‌‌لاریندا‌‌ کی دئولر کیمی اونون‌دا گؤزلری قان گؤلودور. گؤره‌‌سن آدامی یئمه‌‌میشدن اول اؤلدور‌‌ر، یوخسا ائله دیری ـ دیری یئیه‌‌جک منی؟ گاواهین دیش‌‌لرینی گؤوده‌‌مین هر یئرینه باتیرسا ایشیم بیته‌‌جک، بیلیرم بونو.

نفسینین سسینده‌‌ن باشقا هئچ نه‌‌یی ائشیتمیردیم. نفسیندن آلوو پوسکوروردو. نفسینین ایستی‌‌سیندن بیتکی‌‌لر قوورولوردو. دره‌‌نی بوروین هئچ دومان دئییل، سویون، چاییرین جانی بوغلاییردی. جایناغینی دوشوننده یوزلرله قمه کوره‌‌ییمه، بئلیمه تاخیلیردی، اوره‌ییمده‌‌ن، بؤیره‌‌ییمد‌‌ن کئچیردی و سونرا قارنیمین ایچینده اوج ـ اوجا گلیب، سون نفسیمه یول آچیردی.

 دره‌‌نین استقامتی ده‌‌ییشمه‌‌یه باشلادی. هاوانین دومانسیز و بولودسوز گون‌‌لرینده سؤیودلرین گؤلگه‌‌سینه سیغینیب، رومانتیک شاعرلرین شعرینه سیزان قایالار، سولارا سینه گریب، اونلاری شمالا ساری یؤنلدیردیلر. من‌سه کؤلگه‌‌می ایزله‌‌یه‌‌رک، ایره‌‌لی‌‌له‌‌ییردیم