خبر آژانسلاری‌نین یایدیقلاری خیره استنادا، تاسفله گؤرکملی ر‌سام اوستاد «پرویز حبیب‌پور» اوزون سورن خسته‌لیکدن سونرا بو گون سحر – شنبه گونو، آبانین ۱۶-سیندا وفات ائدیب.
اوستاد «پرویز حبیب‌پور» ۱۳۱۴-جو ایلده انز‌لی شهرینده فهله عائله‌سینده دونیایا گؤز آچیب و ۱۳۲۷-جی ایلده ابتدایی تحصیلینی باشا ووردوقدان سونرا یوخسوللوق سببیندن تحصیلینی دایاندیرماغا مجبور اولوب. بوندان سونرا بیر مدت چالیشیب و ۱۳۳۳-جو ایلده عائله‌سی ایله بیرلیکده تهرانا کؤچوب، بو شهرده ایشله‌مکله یاناشی، «اوستاد هوشنگ پیمان»ین نزدینده رساملیق اؤیره‌نیب؛ عین حالدا، تحصیلینی داوام ائتدیره‌رک، ادبیات اوزره دیپلوم آلا بیلیبدیر. بوندان سونرا او، تهران دانشگاهی‌نین صنعت فاکولته‌سینه داخیل اولماغا چالیشیب، لاکین چوخ یاشلی اولدوغونا گؤره قبول ائدیلمه‌ییب و رساملیق اؤیرنمک اوچون سرحدی پوزاراق کئچمیش شوروی‌یه کئچیب؛ آنجاق بو اؤلکه‌ده ده دانشگاها کئچه بیلمه‌ییب و نهایت اوچ ایلدن سونرا ایرانا قاییدیبدیر. بو مدت عرضینده او شوروی‌ده، روس و انگلیس دیللرینی اؤیره‌نیر و رساملیق صنعتی حاقیندا بیر چوخ معلومات‌لار و باجاریق الده ائدیر. ۱۳۴۸-جی ایلده ایرانا قاییدیر، آنجاق «ساواک» طرفیندن یاخالانیب و ۵ ایل حبس ائدیلیر. زنداندان آزاد ائدیلدیکدن سونرا، ۱۳۵۳-جو ایلده تهراندا اؤز رساملیق مکتبینی تاسیس ائدیب و ۱۳۵۵-جی ایلده عائله قورور.
اوستاد «پرویز حبیب‌پور» ایران رساملار بیرلیگی‌نین فخری عضوو ایدی و ۱۳۵۴-جو ایلدن عؤمرونون سون ایللرینه قده‌ر تهراندا و دیگر شهرلرده ۵۰-دن چوخ فردی و گروپ سرگیسی، همچنین اؤلکه‌دن خاریجده بیر نئچه فردی سرگی تشکیل ائتمیشدیر. اوستادین آذربایجان‌لا باغلی چکدیگی رسملردن: «آذربایجان»، «آنا»، «صفرخان»، «بابک‌لر»، «قاری»، «اؤزوم»، «پولادین کومانداسی»، «بئی و گلین» و «قورتولوش» کیمی اثرلرینی آد چکمک اولار.
اوستاد «پرویز حبیب‌پور» رساملیق صنعتی اوزره «تکنولوژی طراحی و نقاشی» و «کالبدشناسی تجسمی انسان» آدلاریندا کیتابلارین موللیفی‌دیر. او، همچنین «آذری» ژورنالی‌نین یازیچیلار هئیتی‌نین یاخین امکداشلاریندان و تهراندا فعالیت گؤسترن آذربایجان ادبی مدنی درنک‌لرینین ده اشتراکچیلاریندان اولوبدور.
«ایشیق»- آذربایجان ادبیات و اینجه‌صنعت سایتی- امکداشلاری آدیندان اوستاد «پرویز حبیب‌پور»ون ایتگیسینی اونون حؤرمتلی عائله‌سینه، صنعت اجتماعیاتینا، دوست و تانیشلارینا صمیمی قلبدن باش ساغلیغی وئریر، اوستادین عزیز خاطیره‌سینی حؤرمتله یاد ائدیریک.
«ایشیق»- آذربایجان ادبیات و اینجه‌صنعت سایتی
16/08/1405
