آذربایجان تحکیه ادبیاتی ایله باغلی ایللرجه دوام ائدن آراشدیرمانین سونوجو «دوام ائدیر حئکایه‌میز» کیتابی‌نین بیرینجی جیلدی تورکیه‌نین Kalemşor یایین ائوینده ایشیق اوزو گؤردو. کیتابین مؤلفی حمید آرغیش جنابلاری بو آراشدیرمانین بیر قیسمینی ایلک اولاراق (۲۰۱۲م.۱۳۹۰ ش.) «۸۰ ایل حئکایه‌میز» آدلی اثرینده محدود بیر بیچیمده یاینلامیشدیر.
حمید آرغیش «دوام ائدیر حئکایه‌میز» اثرینده ایکی‌یه بؤلونموش آذربایجاندا حئکایه ادبیاتی‌نین تاریخی گلیشمه‌سی، الفبا، مطبوعات و ادبی واسیطه‌لر، قدیم و اورتا عصرده یازیلی متن‌لرده‌کی حئکایه فورمالاری، ترجمه‌لر، دینی روایت‌لر، صفوی دؤرونده حئکایه ادبیاتی‌‌نین گلیشمه‌سی، حئکایه ادبیاتیندا آشیق دستانلاری و ده‌‌ده‌قورقود کیتابی‌نین رولو، معاصیر نثریمیزین دوغولوشو و اونون گلیشمه‌سینه یؤن وئرن یازیچیلار، ۱۹-جو عصرین اورتاسیندا و ۲۰-جی عصرین اولینده آذربایجان نثری‌نین نئجه‌لیینه توخونوب.
«دوام ائدیر حئکایه‌میز» کیتابی‌نین بیرینجی جیلدینین سون فصلینده (۱۹۲۰م-۱۲۹۸ ش.) دن سونراکی حئکایه ادبیاتی‌ یئر آلیب. آرغیش بو فصیلده یازیچیلارین حیات حئکایه‌لرینی قید ائتمکله یاناشی یازیچیلارین ادبی یارادیجیلقلاریندان نمونه‌لر درج ائدیب.
بو اثرین ایکینجی جیلدینده میلّی حؤکومتین داغیدیلدیغیندان سونرا او تاریخی دؤرون تاثیری آلتیندا فورمالاشان ادبی پروسس آراشدیریلمیشدیر. اوچونجو جیلدده ایسه (۲۰۰۱ م.- ۱۳۸۰ش.) ایللرینه قدر معاصیر گونئی آذربایجان ادبیاتی آراشدیریلیب و تحلیل ائدیلمیشدیر. دؤردونجو جیلدی ایسه (۲۰۰۱ م. ۱۳۸۰ ش.) ایلیندن گونوموزه قدر جنوبی آذربایجان نثر اثرلری داخیل ائدیله‌جک.
بو اثرده دوکتور طوغرول آتابای‌یین «تاریخی املا» گلنه‌گی‌نین قورونماسی‌نین اؤنمی ایله باغلی یازیسی و پروفسور پروانه ممدلی‌نین اؤن سؤزو درج اولونموشدور.
حمید آرغیش جنابلارینا آراشدیرمالاریندا داها آرتیق باشاریلار دیله‌ییرم.
۱۴۰۵.۰۵.۰۶‌