چوخ تاسفله حؤرمتلی قلمداشیمیز، «ساهر ادبی مدنه درنهیی»نین عضوی و «آذری» مجلهسینین امکداشی «احمد عسگرپور(پیام سارابلی)» خرداد آیینین ۶-جی گونو اوزون سورن خستهلیکدن سونرا یاشادیغی «مشهد» شهرینده آرامیزدان ابدیلیک آیریلدی.
دوستلار آراسیندا «داوود» آدی ایله تانینان احمد عسگرپور(پیام سارابلی) ۱۳۳۳-جی ایلده «ساراب» شهرینده دونیایا گؤز آچمیش، اوشاقلیق و گنجلیک ایللرینی همین شهرده کئچیرمیش، تحصیلینی ده اوردا باشا وورموشدو. گنجلیک ایللریندن آذربایجان مدنیتی و اینجهصنعتینه درین باغلیلیغی اولوب، عؤمرونون سونونادک بو باغلیلیغی لیاقتله قورویوب ساخلامیشدی. اونون اینسانسئورلیگی، عدالتطلبلیگی، تمیز حیات طرزی و معاصر دوشونجهسی شرفلی عؤمرونون آیریلماز معنوی کیفیتینه چئوریلمیشدی.
احمد عسگرپور(پیام سارابلی) یاشادیغی مشهد شهرینده ایلک دفعه اولاراق آذربایجانلی اؤیرنجیلری آنا دیلی و آذربایجان مدنیتی اطرافیندا بیر آرایا گتیرمیش، ادبی درنکلرین تشکیلینه شرایط یاراتمیشدیر. او بیر چوخ تانینمیش آذربایجان صنعتکارلارینین اشتراکی ایله بو شهرده یوبلئی گئجهلری، ادبی مدنی توپلانتیلار و مختلف مدنی گؤروشلر تشکیل ائتمیشدیر. بونونلا یاناشی، عؤمرونون بؤیوک بیر حصهسینی«آذربایجان تئاتر تاریخی» و «قیرخینجی ایللرده آذربایجاندا باشلانان معلملر حرکاتی» موضوعلارینین آراشدیرماسینا حصر ائتمیش، بو ساحهلر اوزره گئنیش حجملی مصاحبهلر، یوزلر صحیفهلیک یازیلار و سندلی دانیشیقلار حاضیرلامیشدیر. او، همچنین یئتمیشینجی ایللرین ایکینجی یاریسیندان اعتبارن اجتماعی و مدنی مسئلهلرله ماراقلانانلار اوچون اونمین عنواندان آرتیق معتبر و مرجع کیتابلاردان عبارت زنگین بیر کیتابخانا یاراتمیش، اونو آراشدیرماجیلار و ماراقلانان شخصلرین استفادهسینه وئرمیشدیر.
حؤرمتلی قلمداشیمیزین مشهددهکی اجتماعی و مدنی فعالیتینین مهم بیر حصهسینی ده «خراسان تئاترینین انکشافیندا آذربایجانلی مهاجرلرین رولو» موضوعسونا حصر اولموش آراشدیرمالار تشکیل ائتمیشدیر. او، بو ساحهده ده یوکسک باجاریق و بؤیوک مسئولیتله چالیشاراق، «شیفاهی تئاتر تاریخی» اوسلوبوندا یوزلرله ساعاتلیق گئنیش مصاحبهلر حاضیرلامیش و دهیرلی فاکتلار توپلامیشدیر.
«مشروطه حرکاتی» و «آذربایجان فولکلورو» موضوعلاری دا حؤرمتلی قلمداشیمیزین ان چوخ سئودیگی و ماراق گؤستردیگی ساحهلردن ایدی. اونون بو استقامتدهکی چالیشمالارینین دهیرلی بهرهسی کیمی، فارس دیلینده حاضیرلاییب نشر ائتدیگی «کتابنامه مشروطیت» و چئویردیگی «آذربایجان فولکلور رقصلری» اثرلرینی قئید ائتمک اولار. بوندان علاوه، او، ایلهام رحیملینین «تبریز آذربایجان تئاتری» کیتابینی دا عرب قرافیکاسینا کؤچورهرک نشر ائتدیرمیشدیر.
بو گون بیز – اونون قلمداشلاری و یولداشلاری- قلبیمیزده درین بیر کدر، لاکین سونسوز منتدارلیق حسی ایله عزیز دوستوموزلا وداعلاشیریق. او، بیزیم اوچون تکجه بیر تدقیقاتچی، صنعتکار و یا مدنی فعال دئییلدی؛ او، مهربانلیغین، یولداشلیغین و اومیدین سیغیناجاغی ایدی. اونون ایشیقلی خاطیرهسی، انسانیت دولو عؤمور یولو و بو تورپاغین اینسانلارینا و مدنیتینه بسلهدیگی تمناسیز سئوگیسی هئچ واخت بیزیم قلبیمیزده سؤنمهیهجک. آغیر ایتگیسینی خالقیمیزا، حؤرمتلی عائلهسینه، قلمداشلاریمیزا و آذربایجانین ادبی- مدنی جمعیتینه باش ساغلیغی وئریریک. عزیز و شرفلی خاطیرهسینه عشق اولسون!
«ایشیق»- آذربایجان ادبیات و اینجهصنعت سایتی
۰۷/۰۳/۱۴۰۵
