یاغیر، یاغسین
یاغماییر، یاغماسین
بو تورپاق باهارین تکلیفین
یئرینه یئتیرمهلیدیر؛
دانقاز بیر ال
آچیب قاپینی
سرمهلیدیر ائوی گون آلتینا،
یئله وئرمهلیدیر
اییلنمیش هاوانین قالیقلارین،
من بیر کیتاب شعیر یازمالییام
اولدوزلارین گولومسهمهسینه،
قایالارین چبچکلنمهسینه،
«ماحمود»ون تزه باشماقلارینا.
آمما دنیز سودا بوغولور
آرزولارین تنهالیغیندان؛
باغلی قاپیلار سیرتیق سیرتیق
قاش – گؤز ائدیر
اوزون سورن آنلاشیلمازلیغا.
بو یالقیز حیات
نئجه قورتارمالیدیر
قاسیرغالارین وحشی مرامیندان؟
توت الیمدن
لئیلکلرین قیریق قانادینی دوشونهرک.
آغاجین باشین کسیرلر
گؤزوموز باخا باخا،
ساحیلی فتح ائلهمکدهدیر
حرامیلر اردوسو،
آرخا دور وطنه!
۱۴۰۴/۱۲/۰۸
