سنین مهربان چؤره‌یین
دوست دئییل بس نه‌دیر؟!
بس نه‌دن دویمورام آجی چاییندان؟!
سؤزجوک‌لریم داریخاندا
سنی دانیشیر
سنه باش وورور.
بیر کلمه زلال چیخیشین
بیر باخچا موسیقی،
چای‌لارین یاراسین ساغالدان
گؤیرچین باخیشلی چشمه.
یول‌لار اوزونو
خلوتیمده
چییه‌لک دوشونورم،
کتاب دوشونورم
خسته‌لیییمده قورخو یاشایان
گیزلی گؤز یاشینی.
عصیانکار دنیز
هیجان‌لارین یاشایاراق
فیرتینادان جلالانیر؛
سن ائله بیل
یئر اوزونون قبله‌سی‌سن،
دنیزین اؤزو.
بعضا ده قوناق دئییرسن منی
گئجه‌نین کؤینه‌یینه سپیلن مؤجوزلره،
ساده سؤزلرین کهکشان‌لارینا؛
دوستو چتین گونده تانییارلار.
۱۴۰۴/۰۶/۱۸
